சரியாக செயல்படாத அதிகாரிகளுக்கு ஓய்வு கொடுக்க மத்திய அரசு அறிவுரை!

thavamani · thavamani Mon Jul 02, 2012 1:21 am

:"அகில இந்திய பணியில் உள்ள அதிகாரிகளின் செயல்பாடுகளை, மாநில அரசுகள் ஆய்வு செய்ய வேண்டும். சரியாக செயல்படாத அதிகாரிகளுக்கு, ஓய்வு கொடுக்க வேண்டும்' என, மத்திய அரசு கேட்டுக் கொண்டுள்ளது.மத்திய பணியாளர் நலத்துறை, அனைத்து மாநில அரசுகளுக்கும் கடிதம் ஒன்றை எழுதியுள்ளது. அதில் கூறியுள்ளதாவது:

குறைந்தபட்சம் 15 ஆண்டுகள் பணியில் இருந்த ஐ.ஏ.எஸ்.,- ஐ.பி.எஸ்., மற்றும் ஐ.எப்.எஸ்., அதிகாரிகளின் செயல்பாடுகளை, மாநில அரசுகள் ஆய்வு செய்ய வேண்டும். அப்படி 15 ஆண்டுகள் அல்லது 25 ஆண்டுகள் அல்லது 50 வயதை எட்டிய அதிகாரிகள், அரசில் உயர் அதிகாரி அந்தஸ்தில் உள்ள நிர்வாக பதவிக்கு தகுதியானவராக இருக்க வேண்டும். அப்படி இல்லாமல், அவர் ஒரு பயணி போல, உயர் அதிகாரி அந்தஸ்த்தில் வெறுமனே உட்கார்த்திருந்தால், அது ஏற்றுக் கொள்ள முடியாத ஒன்று. அதனால், சரியாக செயல்படாத அதிகாரிகளுக்கு பணி ஓய்வு கொடுக்கலாம்.இவ்வாறு கடிதத்தில் தெரிவிக்கப்பட்டுள்ளது.

முதலில் அமலில் இருந்த அகில இந்திய பணி விதிகளின்படி, ஒருவர், 30 ஆண்டு காலம், அகில இந்திய பணியில் இருந்த பின்னரே, அவரின் செயல்பாடுகள் எப்படி உள்ளன என்பதை மாநில அரசுகள் ஆய்வு செய்ய வேண்டும். ஆனால், இந்த அகில இந்திய பணி விதிகள் 16(3)ல், கடந்த ஜனவரி மாதத்தில் திருத்தங்கள் கொண்டு வரப்பட்டன.
அதில், ஒருவர், குறைந்தபட்சம் 15 ஆண்டுகள் அகில இந்திய பணியில் இருந்தாலே, அவரின் செயல்பாடுகளை ஆய்வு செய்யலாம். அப்போது அவரின் செயல்பாடுகள் சரியில்லை என தெரிய வந்தால், பொதுநலன் கருதி, அவருக்கு, ஓய்வு கொடுக்கலாம் என, தெரிவிக்கப்பட்டுள்ளது. இதன்பின் 25 ஆண்டுகள் பணி முடித்த பின்னரோ அல்லது 50 வயதை ஒருவர் அடைந்த பின்னரோ, அவரின் செயல்பாடுகளை மாநில அரசுகள் மறுபடியும் ஆய்வு செய்யலாம்