4 ஆண்டுகளாக நீதிமன்றங்களில் வாதாடிய போலி வக்கீல் பிடிபட்டார்

மதுரை, : மதுரை நீதிமன்றங்களில் கடந்த 4 ஆண்டுகளாக வக்கீலாக ஆஜராகி வந்த சட்டக்கல்லூரி மாணவரை வக்கீல் சங்கம் பொறி வைத்துப் பிடித்தது. மதுரை வளர்நகரில் வசிப்பவர் கிருஷ்ணமூர்த்தி(41). இவர் பி.இ. முடித்தபின், எம்ஏபிஎல் படித்துள்ளதாகவும், பார் கவுன்சிலில் தனது பதிவு நம்பர் "306பி039" என்று குறிப்பிட்டு உயர்நீதிமன்ற கிளை மற்றும் மாவட்ட நீதிமன்றங்களில் பல்வேறு வழக்குகளில் ஆஜராகி வந்தார். வக்கீல்கள் நடத்திய போராட்டங்களில் கல்வீச்சு சம்பவங்களில் ஈடுபட்டதால், இவர் மீது மற்ற வக்கீல்களுக்கு சந்தேகம் வலுத்தது.

இவர் வக்கீல்தானா என்பதை விசாரிக்கக் கோரி வக்கீல்கள் முத்துக்குமார், அருண்குமார் ஆகியோர் சங்கத்தில் புகார் அளித்தனர். விசாரணையில், அவர் மதுரை சட்டக்கல்லூரி 3ம்ஆண்டு மாணவர் என தெரிய வந்தது. நேற்று மதியம் மாவட்ட நீதிமன்றத்திற்கு வந்த கிருஷ்ணமூர்த்தியை, வக்கீல்கள் பிடித்து சங்கத்தில் ஒப்படைத்தனர். வக்கீல் சங்கத்தலைவர் தர்மராஜ், செயலாளர் ஏகே.ராமசாமி, பார் கவுன்சில் உறுப்பினர்கள் ராஜேந்திரன், கோவிந்தன் ஆகியோர் அவரிடம் விசாரித்தனர்.

அவர் பதிவு செய்த வக்கீல் இல்லை என்பது உறுதியானது. அவரது சொந்த ஊர் தஞ்சாவூர் என்றும், மதுரை வளர்நகரில் வசித்து வருவதாகவும் கூறினார். சங்க அவசர பொதுக்குழுக்கூட்டம் கூடி, அவரை போலீசில் ஒப்படைத்து கிரிமினல் நடவடிக்கை எடுக்க வலியுறுத்துவது, பார் கவுன்சிலில் அவரை வக்கீலாக பதிவு செய்யக் கூடாது என பரிந்துரை செய்வது என தீர்மானிக்கப்பட்டது. அண்ணாநகர் போலீசில் அவர் ஒப்படைக்கப்பட்டார். சங்க செயலாளர் ராமசாமி கூறுகையில், ‘வக்கீல் என்ற போர்வையில் தலைமை நீதிபதி முன்பாக கூட ஆஜராகி வாதாடியுள்ளார். கடந்த 4 ஆண்டுகளாக பொது மக்கள் பலரிடமும் வழக்கு நடத்துகிறேன் எனக்கூறி பணம் பறித்துள்ளார்’ என்றார்.

எப்படி எல்லாம் மோசடி பண்ணுறாங்க