ஒரு குருவியின் குரல்.

by **rameshnaga** Mon 25 Jun 2012 - 20:58

கூடுகளில் இருந்து
இரை தேடச் செல்லும் பறவைகள்..

தங்களின் குரல்களையும்
எடுத்துச் சென்று விடுகின்றன...
தம்முடன்.

நிசப்தமாகிவிட்ட மரத்தின் கீழ்
சிறு விதைகள்
பொறுக்கிக் கொண்டிருந்த சிறுமி...
ஒரு சின்னஞ்சிறு குருவியின் குரலைக்
கண்டெடுக்கிறாள்...
அது உதிர்த்திருந்த சிறகிலிருந்து.

பெரும் சிரிப்புடன்...
அதை எடுத்துச் சென்றவள்...
அதை ஒளித்துவைக்கிறாள்...
தன புத்தகத்தின் ஊடாய்.

மனம் திரிந்துவிட்ட மனிதர்களிடம்
தன் இயல்பைப் பகிர விரும்பாத குருவிகள்...

தினம்..தினம்...சிரித்து மகிழ்கின்றன..
அந்தச் சிறுமியிடம்
பின்...இரசித்து மகிழ்கின்றன
அந்தச் சிறுமியின் சிரிப்பையும்...

அந்தச் சிறுமி அணிந்து மகிழும்...
அவைகளின் சிறகுகளின் ஊடாய்.