லட்சக்கணக்கான ரூபாய் நோட்டுகளை கிழித்து குப்பையில் வீசியது யார்?

திருச்சியில் லட்சக்கணக்கான பணம் சுக்கல், சுக்கலாக கிழிக்கப்பட்டு குப்பை தொட்டியில் கிடந்தது. இதனால் பெரும் பரபரப்பு ஏற்பட்டது.
திருச்சி உறையூர் களத்துமேடு சுபானியாபுரத்தில் பல அடுக்குமாடி குடியிருப்புகள் உள்ளன. இதன் அருகில் மாநகராட்சியின் 2 குப்பை தொட்டிகள் வைக்கப்பட்டுள்ளன. நேற்று காலை, குப்பை தொட்டிகளுக்கு அருகே 50, 100, 500, 1000 ரூபாய் நோட்டுகள் கிழிந்த நிலையில் சிதறி கிடந்தன. கிழிந்த நோட்டுகள் காற்றின் போக்கில் பறந்து கொண்டிருந்தன.
அப்போது, குப்பை தொட்டியில் பிளாஸ்டிக் பொருட்களை சேகரித்து விற்கும், தில்லைநகரைச் சேர்ந்த ஈஸ்வரி உள்ளிட்ட சில பெண்கள் அந்த வழியாக வந்தனர். குப்பை தொட்டிகளுக்கு அருகில் கிழிந்த ரூபாய் நோட்டுகள் சிதறி கிடப்பதைக் கண்டு அதிர்ச்சி அடைந்தனர். உடனே, 2 குப்பைத் தொட்டிகளிலும் தேடினர். ஒரு தொட்டிக்குள் கேரி பேக் மூட்டையாக கட்டி போடப்பட்டிருந்தது. அதை வெளியே எடுத்து ஈஸ்வரி பார்த்த போது, அதன் உள்ளே சுக்கல், சுக்கலாக ரூபாய் நோட்டுக்கள் கிழிக்கப்பட்டு கிடந்தன
அவை கள்ள நோட்டாக இருக்கலாம் என எண்ணி இது குறித்து அப்பகுதியில் துப்புரவு பணியில் ஈடுபட்டிருந்த மாநகராட்சி ஊழியர்களிடம் ஈஸ்வரி தெரிவித்தார். துப்புரவு தொழிலாளர்கள், அந்த கேரி பேக்கை வாங்கி பார்த்தனர். இதற்கிடையில் தகவல் அறிந்து வந்த உறையூர் போலீஸ் ஏட்டு அமல்ராஜ் மற்றும் போலீசார், அந்த கேரி பேக்கை போலீஸ் நிலையத்துக்கு கொண்டு சென்றனர். அந்த பையில் 100, 500, 1000 ரூபாய் நோட்டுகள் பயன்படுத்த முடியாத அளவுக்கு சுக்கல், சுக்கலாக கிழிக்கப்பட்டு கேரி பேக்கில் திணித்து வைக்கப்பட்டிருந்தன. அந்த ரூபாய் நோட்டுக்கள் நெடுங்காலமாக புழக்கத்தில் விடாமல் வைத்து இருந்ததைப் போன்று காணப்பட்டன. அதில் இருந்த பணம் பல லட்சம் இருக்கும். ஒவ்வொரு ரூபாய் நோட்டும் நான்கைந்து துண்டுகளாக கிழிக்கப்பட்டிருந்தன. எனவே உடனடியாக அதை எண்ண முடியவில்லை. அது கள்ள நோட்டாக இருக்கலாம் என சந்தேகித்த போலீசார் கள்ள நோட்டு தடுப்பு போலீசுக்கு தகவல் தெரிவித்தனர்.
எஸ்.ஐ. மலர்விழி வந்து ஆய்வு செய்தபோது, அந்த பணம் முழுவதும் நல்ல நோட்டுகள் என தெரியவந்தது. நல்ல நோட்டுகளை ஏன் பயன்படுத்த முடியாத அளவுக்கு கிழித்தனர். கிழித்தவர்கள் யார் என போலீசார் விசாரித்து வருகிறார்கள். இந்த கிழிந்த நோட்டு விவகாரம் உறையூர் பகுதியில் பரபரப்பை ஏற்படுத்தியுள்ளது.

http://www.dinakaran.com/News_Detail.asp?Nid=16930

அடப் பாவிங்களா - நல்ல நோட்டை நல்ல விஷயத்துக்கு பயன்படுத்தும் தொண்டு நிறுவனங்களிடம் கொடுத்திருக்கலாமே!!!!!!