குப்பிளானில் 250 ஏக்கர் நிலத்தினை அபகரித்தது படைத்தரப்பு!

குப்பிளான்வடக்கில் வெடிபொருட்கள் அகற்றப்பட்டு கடந்த 22 வருடங்களின் பின் பொதுமக்கள் மீளக்குடியேற அனுமதிக்கப்பட்ட 250 ஏக்கர் பகுதியை மீண்டும் முள்வேலிகளை அமைத்து படையினர் கையகப்படுத்தியுள்ளதாக அப்பகுதி மக்கள் குற்றஞ்சாட்டியுள்ளனர்.22 வருடங்களின் பின்னராவது சொந்த இடங்களில் மீள்குடியேறலாம் என்ற தமது ஆசை இதன்மூலம் மீண்டும் நிராசையாகி விட்டதாகவும் அந்த மக்கள் கண்ணீருடன் தெரிவித்தனர்.

2011ஆம் ஆண்டு அக்டோர் மாதம் இப்பகுதியில் முழுமையாக கண்ணிவெடியகற்றப்பட்டு அதற்கான சான்றிதழும் வழங்கப்பட்டது. தொடர்ந்து மீள்குடியேற்றத்திற்கான அனுமதியும் வழங்கப்பட்டது.

மக்கள் தமது சொந்த இடங்களுக்குத் திரும்பி, காசுக்கான வேலைத்திட்டத்தின் கீழ் தமது வாழ்விடங்களை துப்புரவு செய்து வந்தனர்.

இந்நிலையில் புன்னாலைக்கட்டுவன் பகுதியில் போர்க்காலத்தில் படையினரால் அமைக்கப்பட்டு அகற்றப்பட்டு வந்த மண் அணைகளை அகற்றும் பணிகள் சில வாரங்களாக திடீரென நிறுத்தப்பட்டுள்ளது.


இதன் தொடர்ச்சியாக கடந்த மாதத்தின் இறுதிப்பகுதியிலிருந்து, மீள்குடியேற்றத்திற்கு அனுமதிக்கப்பட்ட பகுதிக்கூடாகச் செல்லும் மண் அணையில் உயர்பாதுகாப்பு வலயத்திற்கான வேலிகளை படையினர் அமைத்து வருகின்றனர்.

இதன்படி உயர்பாதுகாப்பு வலயமாகவிருந்து விடுவிக்கப்பட்ட பகுதியில் 250 ஏக்கர் நிலம் இராணுவத்தினரால் மீண்டும் பாதுகாப்பு வலயம் என்ற போர்வையில் ஆக்கிரமிக்கப்பட்டுள்ளது.

இந்த மீள் ஆக்கிரமிப்பைத் தொடர்ந்து அச்சம் காரணமாக படையினர் கையகப்படுத்திவரும் நிலப்பகுதிக்கு முன்னாலுள்ள பகுதியிலும் மக்கள் மீள்குடியேற மறுத்து வருகின்றனர்.

22 வருடங்களின் பின்னர் மீள்குடியேற்றத்திற்கான அனுமதி வழங்கப்பட்டுள்ள போதும் மீளக்குடியேற முடியாத நிலையில் 200 இற்கும் மேற்பட்ட குடும்பங்களைச் சேர்ந்த மக்கள் தொடர்ந்தும் உறவினர்களதும், நண்பர்களதும் வீடுகளிலும், வாடகை வீடுகளிலும் வாழ்ந்து வருகின்றனர்.
http://thaaitamil.com/%E0%AE%95%E0%AF%81%E0%AE%AA%E0%AF%8D%E0%AE%AA%E0%AE%BF%E0%AE%B3%E0%AE%BE%E0%AE%A9%E0%AE%BF%E0%AE%B2%E0%AF%8D-250-%E0%AE%8F%E0%AE%95%E0%AF%8D%E0%AE%95%E0%AE%B0%E0%AF%8D-%E0%AE%A8%E0%AE%BF%E0%AE%B2/