மந்திராலயம் கோவிலுக்குள் 3 பக்தர்களின் பிணங்கள் மீட்பு

மந்திராலயம் ராகவேந்திரர் கோவிலுக்குள் புகுந்த வெள்ளம் வடிந்து விட்டது. அங்கு இருந்த 3 அடி உயர சேறு-சகதி அப்புறப்படுத்தப்பட்டது. கோவில் வளாகத்தில் கிடந்த 3 பிணங்களும் மீட்கப்பட்டன.

ஆந்திர மாநிலம் கர்னூல் மாவட்டத்தில் பிரபலமான மந்திராலயம் ராகவேந்திரர் கோவில் உள்ளது. இந்த கோவில் அருகே ஓடும் துங்கபத்திரா நதியில் கடந்த வெள்ளிக்கிழமை நள்ளிரவில் ஏற்பட்ட வெள்ளப்பெருக்கால் மந்திராலயம் தண்­ரில் மூழ்கி விட்டது. நேற்று தான் மழை நீர் வடியத்தொடங்கியது. இதனால் மீட்பு படையினர் கோவிலுக்குள் நுழைய முடிந்தது. மந்திராலய கோவிலில் ராகவேந்திரர் மடம் மற்றும் கோவிலுக்குள் 3 அடி உயரத்திற்கு சேறும், சகதியும் நிரம்பி உள்ளது. கோவில் வளாகத்தில் 3 பக்தர்களின் பிணங்களும், கோவில் கேட்டில் ஒரு பிணமும் தொங்கியபடி கிடந்தன. கோவில் முன்புறம் நின்ற ஒரு பஸ்சில் ஒரு பக்தரும், கோவிலுக்கு வெளியே 4 பக்தர்களின் பிணங்களும் கிடந்தன.

கோவிலுக்குள் குவிந்து இருக்கும் மணல் குவியலை அகற்றும் பணியில் தீயணைப்பு வீரர்களும், போலீசாரும் ஈடுபட்டுள்ளனர். ஆலய அர்ச்சகர்கள் ராகவேந்திரா சுவாமியின் மூல பிருந்தாவனத்தில் உள்ள சேற்றை அகற்றி சுத்தம் செய்து பூஜை செய்தனர். மந்திராலயத்தில் 20 அடி உயரத்துக்கு வெள்ள நீர் சூழ்ந்து இருந்ததால் ஆலயத்தின் முகப்பு வாயில் மற்றும் அந்த பகுதியில் இருந்த கடைகள், குடியிருப்புகள் அனைத்தும் அடித்துச்செல்லப்பட்டு விட்டன. மேலும் கோவிலில் இருந்து துங்கபத்திரா நதிக்கு செல்லும் சாலையும் துண்டிக்கப்பட்டு உள்ளது.

மந்திராலய மடத்துக்கு சொந்தமான 65 கறவை மாடுகள் உள்பட 160 மாடுகள் தண்­ரில் மூழ்கி இறந்து கிடந்தன. இந்த மாடுகள் அனைத்தும் கட்டிப்போட்ட நிலையிலே இறந்து கிடந்ததை பார்க்க பரிதாபமாக இருந்தது. கோவில் வெளியே உள்ள கடைகள் மற்றும் லாட்ஜுகளிலும் மணல் நிரம்பி கிடக்கிறது. அந்த பகுதி தற்போது மின்சாரம் இல்லாமல் இருள் சூழ்ந்தும், மக்கள் நடமாட்டம் இன்றியும் காட்சி அளிக்கிறது.

திருப்பதி தேவஸ்தான அர்ச்சகர் குழு ஒன்று நேற்று மந்திராலயத்துக்கு சென்று கோவிலை தூய்மைப்படுத்தும் பணியில் ஈடுபட்டது. பரிகார பூஜைகள் செய்த பிறகு பக்தர்கள் தரிசனத்திற்கு அனுமதிக்கப்படுவார்கள் என அர்ச்சகர்கள் தெரிவித்தனர். மந்திராலயத்தை சீரமைப்பதற்காக கர்நாடக முதல்-மந்திரி எடியூரப்பா ரூ.10 கோடி நன்கொடை வழங்கப்படும் என அறிவித்து உள்ளார்.