குண்டர் தடுப்பு சட்டம் பாயுமா?? திமுக ஆதரவு ரவுடிகள் கலக்கம்..!

**அருண்** · **அருண்** Wed Jun 20, 2012 12:39 pm

மாஜி அமைச்சர் வீரபாண்டி ஆறுமுகம், நேற்று முன்தினம், குண்டர் தடுப்பு சட்டத்தில் கைது செய்யப்பட்டதை அடுத்து, அவரின் ஆதரவு தி.மு.க., ரவுடிகள் மீது, இந்த சட்டம் பாயும் என தகவல் பரவி உள்ளது. இது, ரவுடிகள் மத்தியில் பீதியை ஏற்படுத்தி உள்ளது.ங்கம்மாள் காலனி நில அபகரிப்பு வழக்கு உட்பட மொத்தம் ஆறு வழக்குகளில், அனைத்திலும் முதல் எதிரியாக, தி.மு.க., மாஜி அமைச்சர் வீரபாண்டி ஆறுமுகம் சேர்க்கப்பட்டுள்ள நிலையில், ஒவ்வொரு வழக்கிலும் அவரின் ஆதரவாளர்கள், பத்துக்கும் மேற்பட்டோர் எதிரிகளாக சேர்க்கப்பட்டுள்ளனர். இவ்வாறு சேர்க்கப்பட்டவர்களில் வீரபாண்டி ஆறுமுகத்தின் தம்பி மகன், பாரப்பட்டி சுரேஷ்குமார் முதல் ஆளாக குண்டர் தடுப்பு சட்டத்தில் கைது செய்யப்பட்டார். அவரை தொடர்ந்து "ஜிம்' ராமு, உதவியாளர் கவுசிக பூபதி ஆகியோரும் குண்டர் தடுப்பு சட்டத்தில் கைது செய்யப்பட்டு சிறையில் அடைக்கப்பட்டுள்ளனர். கடைசியாக, பனமரத்துப்பட்டி அருகே குள்ளப்பநாயக்கனூரை சேர்ந்த ராஜாவை, குண்டர் தடுப்பு சட்டத்தில் கைது செய்த போலீசார், நேற்று முன்தினம் வீரபாண்டி ஆறுமுகத்தை குண்டர் தடுப்பு சட்டத்தில் கைது செய்தனர்.இந்நிலையில், இந்த வழக்குகளில் சிக்கி, தற்போது சிறையிலும், தலைமறைவாக வெளியிலும் உலாவிக் கொண்டு இருக்கும் பலரை, குண்டர் தடுப்பு சட்டத்தில் கைது செய்ய போலீசார் தயாராகி வருகின்றனர். அந்த வகையில் மாஜி அமைச்சரின் உதவியாளர் ஒருவரும், தி.மு.க., ஆதரவு ரவுடிகளில், பத்துக்கு மேற்பட்டோரும் உள்ளனர். இது, ரவுடிகள் மத்தியில் பீதியை ஏற்படுத்தி உள்ளது.
இதுகுறித்து துணை கமிஷனர் ஒருவர்
கூறியதாவது: "சேலம் மாநகரில் நடப்பாண்டில் இதுவரை, 33 பேரை குண்டர் தடுப்பு சட்டத்தில் கைது செய்துள்ளோம். இவர்களில் பலர் தி.மு.க., ஆதரவாளர்களாக இருக்கலாம். தற்போது வழக்கு எண்ணிக்கையின் அடிப்படையில் ரவுடிகளின் பட்டியல் தயாராகி வருகிறது. விரைவில், ரவுடிகளில் பலரை, குண்டர் தடுப்பு சட்டத்தில் கைது செய்ய உள்ளோம். கைது நடவடிக்கை தொடரும்' என்றார்.
குண்டர் சட்டத்தில் சிறை வாசம் எத்தனை நாள்? குண்டர் சட்டத்தில் கைது செய்யப்பட்ட, தி.மு.க., முன்னாள் அமைச்சர் வீரபாண்டி ஆறுமுகம், கட்டாயம் 100 நாள், சிறையில் கழிக்க வேண்டிய நிலைக்கு தள்ளப்பட்டுள்ளதாக, போலீஸ் வட்டாரங்கள் தெரிவித்தன. ஜூன் 4ம் தேதி, சென்னையில் கைது செய்யப்பட்ட வீரபாண்டி ஆறுமுகம், வேலூர் சிறையில் அடைக்கப்பட்டார். இந்நிலையில், வீரபாண்டி ஆறுமுகத்தை போலீசார், நேற்றுமுன்தினம் குண்டர் சட்டத்தின் கீழ் கைது செய்தனர். குண்டர் சட்டத்தில் கைது செய்யப்படும் ஒருவர், அதற்கான ஆட்சேபனை இருப்பின், 20 நாட்களுக்கு பின், அட்வைசரி கமிட்டியில் முறையீடு செய்யலாம். அந்த வகையில், முன்னாள் அமைச்சர் ஜூலை 8ம் தேதிக்கு பின், அட்வைசரி கமிட்டிக்கு செல்ல முடியும். அப்படி அவர், அட்வைசரி கமிட்டிக்கு சென்றாலும், அவர்கள் புகார் மீதான விசாரணையை துவக்க குறைந்த பட்சம், ஏழு நாட்களுக்கு மேல் ஆகி விடும் என்பதால், ஜூலை 15ம் தேதிக்கு பின்தான், முன்னாள் அமைச்சர் வீரபாண்டி ஆறுமுகத்தின் மேல் முறையீடு மனு விசாரணைக்கு வரும். எனவே, 34 நாட்கள் அவருக்கு கட்டாய சிறை வாசம் என்பது, இப்போதே முடிவாகி விட்டது. அத்துடன்,
இவர் தலைமையில் செயல்பட்டதாக வழக்கு பதிவு செய்யப்பட்டு, குண்டர் சட்டத்தில் அடைக்கப்பட்டுள்ள இவரின் உதவியாளர் கவுசிகபூபதி, தம்பி மகன் பாரப்பட்டி சுரேஷ்குமார், முன்னாள் கவுன்சிலர் ஜிம்மு ராமு ஆகியோர், ஏற்கனவே அட்வைசரி கமிட்டிக்கு சென்று, குண்டர் தடுப்புச் சட்டம் உறுதி செய்யப்பட்டு விட்டது. அதே வழக்குகளில் தான் இவரும் சம்பந்தப்பட்டுள்ளார். அது மட்டுமின்றி, மூவருமே வழக்கின் மூன்றாவது குற்றவாளிகள் தான், அவர்களின் மனுக்கள் தள்ளுபடி செய்யப்பட்டுள்ள நிலையில், முதல் குற்றவாளியான இவரின் கோரிக்கை மனு, கண்டிப்பாக தள்ளுபடியாகும் என, சேலம் மாநகர போலீசார் நம்பிக்கை தெரிவித்தனர். இதனால், வீரபாண்டி ஆறுமுகத்துக்கு, 100 நாள் சிறை என்பது, தற்போதே உறுதியாகிவிட்டது.
இன்ஸ்பெக்டர் ஒருவர் கூறியதாவது: குண்டர் சட்டத்தில் கைது செய்யப்படும் ஒருவர், தன்னை குண்டர் சட்டத்தில் கைது செய்ய முகாந்திரம் இல்லை எனக்கூறி விடுவிக்க விரும்பினால், சென்னை சிங்கார வேலர் மாளிகையில் இயங்கும், மூன்று ஓய்வு பெற்ற நீதிபதிகள் கொண்ட அறிவுரை குழுமத்துக்கு (அட்வைசரி கமிட்டி), கைது செய்யப்பட்ட 20 நாட்களுக்கு மேல் விண்ணப்பிக்கலாம். குண்டர் சட்டத்தின் கீழ் கைது செய்யப்பட்டது தவறு என்பது உறுதியானால் மட்டுமே, மனுதாரர் குண்டர் தடுப்புச் சட்ட வழக்கில் இருந்து விடுவிக்கப்படுவார். ஆனால், அதற்கான சாத்தியக் கூறுகள் குறைவாக உள்ளதால், முன்னாள் அமைச்சர் வீரபாண்டி ஆறுமுகம் குறைந்த பட்சம், 100 நாள் வரை சிறையில் இருந்தே ஆக வேண்டும் என்ற நிலை உருவாகி உள்ளது. மனு தள்ளுபடி ஆகும் பட்சத்தில், அவர் குண்டர் சட்டத்தின் தண்டனை காலம் முழுமைக்கும் சிறையில் இருக்க வேண்டியது கட்டாயம் என்றார்.

தினமலர்