அவர் ஒரு சமுத்திரம்!

by **சாமி** Sun Jun 17, 2012 7:37 am

பல பக்தர்களுக்கு மத்தியில் அமர்ந்து உரையாடிக் கொண்டிருந்தார் வாரியார். பத்து விரல் மோதிரம் பளபளக்க, பல்லிலும் தங்கம் மின்ன அங்கு வந்த பணக்காரர் ஒருவர்,""சாமி, கூட்டத்தில் பேசும்போது என்னைப் பற்றியும் ஒரு தடவை சொல்லுங்களேன்'' என்றார். கூட்டத்தில் வாரியாரும்,""இவர் பெரிய சமுத்திரம், அள்ள அள்ளக் குறையாத கடல் மாதிரி, பெரிய செல்வந்தர்...சமுத்திரம்னா சமுத்திரம்தான், ஏரி, குளம் மாதிரி சின்ன ஆளு இல்லை'' என்றார். பாராட்டை வாங்கிக்கொண்டு சந்தோஷமாக கிளம்பினார் செல்வந்தர். பக்தர்களில் ஒருவர் எழுந்து தயக்கத்துடன்,""சாமியைப் போன்ற பெரியவர்கள் இப்படிப் பொய்யாகப் பாராட்டலாமா? அந்த ஆள் பெரிய கஞ்சன். ஒரு நல்ல காரியத்துக்கும் உதவியதில்லையே'' என்றார்.

""அதைத்தானே நானும் சொன்னேன்...புரியலையா? சமுத்திரம் ரொம்பப் பெரிசு. ஏகப்பட்ட தண்ணீர் வெச்சிருக்கும். ஒரு வாய் தண்ணி ஒருத்தனுக்கு பயன்படுமா? எவன் தாகத்தையும் தீர்க்காது. இந்த ஆளும் சமுத்திரம் மாதிரி கொட்டி வச்சிருக்கார். ஒருத்தனுக்கும் பயன்பட்டதில்லை. புரிஞ்சுதா? உட்கார்'' என்று வாரியார் போட்டாரே ஒரு போடு!

(நன்றி-தினமணி )