அவதி - புதிய மின் மீட்டர் கிடைக்காததால் ....... அலைகழிப்பால் பலரும் அதிருப்தி

மின் மீட்டர்களை கடைகளில் வாங்கிக் கொள்ளலாம் என்ற அறிவிப்பால், ஏற்கனவே மீட்டருக்கு பணம் கட்டியவர்கள், புதிய மீட்டர் வழங்கப்படாததால், அதைத் தேடி மின்வாரிய அலுவலகங்களுக்கு அலைக்கழிக்கப்படுகின்றனர். தமிழகத்தில் மின் தட்டுப்பாடு பிரச்னை பல்வேறு விழிப்புணர்வை நுகர்வோரிடம் ஏற்படுத்தி இருந்தபோதும், புதிய மின் மீட்டர் தேவையும், அது உடனடியாகக் கிடைக்காத நிலையும் தொடர்ந்து நீடிக்கிறது.தமிழக மின்வாரியத்தில், புதிய மீட்டர்கள் வாங்க, பல்வேறு "டெண்டர்'கள் அறிவிக்கப்பட்ட நிலையில், தனியார் நிறுவன வழக்குகளால், "டெண்டர்'களைத் திறக்க முடியவில்லை. இதையடுத்து, மீட்டர் கொள்முதலை மின்வாரியம் தற்காலிகமாக தள்ளி வைத்துள்ளது.

மின்வாரியம் அறிவிப்பு: இதனால் ஏற்பட்டுள்ள மீட்டர் தட்டுப்பாட்டைப் போக்க, மின்சார ஒழுங்குமுறை ஆணைய உத்தரவுப்படி, லார்சன் அன்ட் டூப்ரோ மற்றும் லிங்க்வெல் டெலி சிஸ்டம் ஆகிய நிறுவனங்களின் மீட்டர்களை, கடைகளில் வாங்கிக் கொள்ளலாம் எனவும்; அதற்கான கடைகளையும், மின்வாரியம் அறிவித்துள்ளது. சென்னை உள்பட அனைத்து மாவட்டங்களிலும், சில குறிப்பிட்ட இடங்களில் மட்டுமே, இந்தக் கடைகள் உள்ளன. வாங்கப்படும் மீட்டர்களை மின்வாரிய அதிகாரிகள், தங்களது சோதனைக் கூடங்களில் ஆய்வுசெய்து, அந்த மீட்டர்களை நிராகரித்தால், நுகர்வோர்கள் மீண்டும் பல கிலோ மீட்டர் தூரம் பயணித்து, வாங்கிய கடைக்குச் சென்று மீட்டர்களை மாற்றிக் கொள்ள நேரிடும். அப்போது கடைகளில் இருப்பு இல்லாவிடில், மீண்டும் ஒரு முறை கடைக்கு அலைய வேண்டிய அவலமும் அவதியும் உள்ளது.

திரிசங்கு நிலை : இதற்கிடையில், மீட்டர்களுக்காக ஏற்கனவே பணம் கட்டிய ஆயிரக்கணக்கானோர், மின்வாரிய அலுவலகங்களுக்கு அலைக்கழிக்கப்படுகின்றனர். கடைகளில் வாங்குவதா அல்லது மின்வாரியமே மீட்டர் தருமா என்பதற்கு, மின்வாரிய அலுவலகங்களில் அதிகாரிகள்பதிலளிக்கவில்லை. அதனால் பணத்தையும் கொடுத்து விட்டு, மீட்டரும் கிடைக்காமல், நுகர்வோர்கள் வேதனை அடைந்துள்ளனர்.கடைகளில் மீட்டர் வாங்கலாம் என்ற அறிவிப்பைத் தொடர்ந்து, கடந்த ஒரு வாரத்தில், 8,000 மின் மீட்டர் விற்பனை ஆகியுள்ளதாக, மின்துறை வட்டாரங்கள் தெரிவித்துள்ளன.

விலை நிர்ணயத்தில் குளறுபடியோ குளறுபடி : மின்வாரியம் குறிப்பிட்டுள்ள பல கடைகளில், பல நேரங்களில் மீட்டர்கள் இருப்பு இல்லை. மீட்டர் வாங்கச் செல்லும் நுகர்வோர்களிடம், "பணம் கட்டிவிட்டு செல்லுங்கள்; இரண்டு நாளில் மீட்டர் தருகிறோம்' என, கடைக்காரர்கள் முன்கூட்டியே பணம் வசூலிக்கின்றனர்.இதுகுறித்து, சென்னை பட்டாபிராமில் செயல்படும், தமிழ்நாடு முற்போக்கு நுகர்வோர் மைய ஒருங்கிணைப்பாளர் சடகோபன் கூறியதாவது:நுகர்வோர் சட்டத்தில், தாங்கள் வாங்கும் பொருட்களுக்கு கடைகளைத் தேர்ந்தெடுக்க, நுகர்வோருக்கு உரிமை உண்டு. மீட்டர் விவகாரத்தில் மின்வாரியமே குறிப்பிட்ட கடைகளை வலியுறுத்துகிறது. இது பெரும் சந்தேகத்தை ஏற்படுத்தியுள்ளது. கடைகளில் இருப்பு வைக்காமல், நுகர்வோரிடம் முன்கூட்டியே பணம்வசூலிக்கின்றனர். மின்வாரியம் குறிப்பிட்ட விலையை விட அதிக விலைக்கு மீட்டர்களை விற்கின்றனர். இந்த முயற்சி, சில குறிப்பிட்ட தனியார் வர்த்தகர்களை ஊக்குவிக்கும் முயற்சியாக உள்ளது.இவ்வாறு அவர் கூறினார்.

மீட்டர் விலை என்ன? மின்வாரியம் வெளியிட்ட அறிவிப்பில், ஒரு முனை இணைப்பு மீட்டர், 785.79 ரூபாய்; மும்முனை இணைப்பு மீட்டர், 2,216.75 ரூபாய் என, நிர்ணயிக்கப்பட்டுள்ளது. இத்துடன் வரி மற்றும் சேவைக் கட்டணங்கள் கூடுதலாக வசூலிப்பர் என, பொத்தாம் பொதுவாகக் கூறப்பட்டுள்ளது.அதனால், ஒவ்வொரு கடையினரும் தங்கள் விருப்பத்திற்கு ஏற்றாற்போல், தட்டுப்பாடு நிலைமையைப் பொறுத்து, 500 ரூபாய் முதல், கூடுதல் விலை நிர்ணயித்துள்ளனர்

நன்றி:- தினமலர்

ஓகோ இதத் தான் அம்மா சர்ப்லஸ் மின்சாரம் ன்னு சொன்னாங்களா?

மீட்டருக்கு அலையை விட்டு மீட்டர் இல்லாததால கரண்ட்டு குடுக்காம சர்ப்லஸ் கணக்க கட்சிதமா போட்டிருக்காங்களோ?