பிரெஞ்ச ஓபன்: சானியா-பூபதி ஜோடி சாம்பியன்!

மகா பிரபு · மகா பிரபு Fri Jun 08, 2012 5:59 am

பிரெஞ்ச் ஓபன் டென்னிஸ் கலப்பு இரட்டையர் பிரிவில் இந்தியாவின் மகேஷ் பூபதி-சானியா மிர்சா ஜோடி முதல் முறையாக சாம்பியன் பட்டம் வென்று அசத்தியது.

பிரான்ஸ் தலைநகர் பாரிசில் கிராண்ட்ஸ்லாம் அந்தஸ்து பெற்ற பிரெஞ்ச் ஓபன் டென்னிஸ் தொடர் நடக்கிறது. நேற்று நடந்த கலப்பு இரட்டையர் பைனலில் பூபதி-சானியா ஜோடி, கிளாடியா ஜான்ஸ் இக்னேசிக்(போலந்து), சான்டியாகோ கொன்சாலசை(மெக்சிகோ) எதிர்கொண்டது. ஆரம்பத்தில் இருந்தே பூபதி-சானியா தூள் கிளப்பினர். "டை-பிரேக்கர் வரை சென்ற முதல் செட்டை 7-6 என வென்றனர். இரண்டாவது செட்டிலும் ஆதிக்கம் செலுத்திய இவர்கள், மிக எளிதாக வெற்றியை வசப்படுத்தினர். இறுதியில் பூபதி-சானியா ஜோடி 7-6(7/3), 6-1 என்ற நேர் செட்களில் வெற்றி பெற்று, சாம்பியன் பட்டத்தை கைப்பற்றியது.

இது பூபதிக்கு 12வது கிராண்ட்ஸ்லாம்(இரட்டையர் 4+ 8 கலப்பு இரட்டையர்) பட்டம். சானியாவுக்கு சீனியர் பிரிவில் 2வது கிராண்ட்ஸ்லாம் பட்டம். முன்னதாக பூபதியுடன் சேர்ந்து 2009ல் ஆஸ்திரேலிய ஓபன் கலப்பு இரட்டையரில் பட்டம் வென்றார்.

வெற்றி குறித்து சானியா கூறுகையில்,""நேற்று பிறந்த நாள் கொண்டாடிய பூபதிக்கு சாம்பியன் பட்டம் தான் சிறந்த பரிசு,என்றார்.

சாரா இரானி
எழுச்சி: பெண்கள் ஒற்றையர் பைனலுக்கு இத்தாலியின் சாரா இரானி முன்னேறினார். நேற்று, மழை காரணமாக போட்டி தாமதமாக துவங்கியது. முதலில் நடந்த பெண்கள் ஒற்றையர் அரையிறுதியில், தரவரிசையில் 6வது இடத்திலுள்ள ஆஸ்திரேலியாவின் சமந்தா ஸ்டோசர், 21வது இடத்தில் இருக்கும் இத்தாலியின் சாரா இரானியை சந்தித்தார்.

முதல் செட்டை கடுமையான போராட்டத்துக்குப் பின் 7-5 என, இரானி கைப்பற்றினார். இரண்டாவது செட்டில் எழுச்சி பெற்ற ஸ்டோசர், 6-1 என கைப்பற்றி பதிலடி கொடுத்தார்.

வெற்றியாளரை நிர்ணயிக்கும் மூன்றாவது மற்றும் கடைசி செட்டில், 3-0 என இரானி முன்னிலை பெற்றார். அடுத்து தொடர்ந்து 3 "கேம்களை ஸ்டோசர் கைப்பற்ற 3-3 என சமன் ஆனது. பின், எழுச்சி பெற்ற இரானி தொடர்ந்து 3 "கேம்களையும் வென்றார். முடிவில், 7-5, 6-1, 6-3 என்ற செட்கணக்கில் வெற்றி பெற்ற சாரா இரானி, கிராண்ட்ஸ்லாம் தொடர் டென்னிசில், முதன் முறையாக பைனலுக்கு முன்னேறினார்.

தினமலர்