கிரிக்கெட்டில் இருந்து ஓய்வு பெற்ற பிறகு ராணுவத்தில் சேவை செய்வேன்: காஷ்மீரில் கேப்டன் டோனி பேட்டி

இந்த நிலையில் 30 வயதான கேப்டன் டோனி ஜம்மு-காஷ்மீர் மாநிலத்தில்
பாகிஸ்தான் எல்லை பகுதியில் அமைந்துள்ள பூஞ்ச் ராணுவ முகாமுக்கு நேற்று
சென்றார். ராணுவ சீருடை அணிந்து சென்ற அவரை ராணுவ அதிகாரிகள் மற்றும்
வீரர்கள் வரவேற்று அழைத்து சென்றனர்.

எல்லை
பகுதியில் எந்நேரமும் விழிப்புடன் சவால்களை எதிர்கொள்ளும் ராணுவ வீரர்களின்
செயல்பாடுகளை டோனி ஆர்வமாக கேட்டறிந்தார். ராணுவ வீரர்களின்
குடும்பத்தினர் மத்தியில் டோனி பேசினார். அவருடன் வீரர்கள் பலர்
குடும்பத்துடன் புகைப்படம் எடுத்து கொண்டனர். வருகிற 7-ந் தேதி வரை
ஜம்மு-காஷ்மீர் மாநிலத்தில் சுற்றுப்பயணம் செய்ய திட்டமிட்டுள்ள டோனி,
சியாச்சின் மற்றும் உதாம்பூரில் உள்ள வடக்கு மண்டல ராணுவ தலைமையகம் உள்பட
14 ராணுவ முகாம்களை நேரில் பார்வையிடுகிறார்.

இன்று
பாரமுல்லாவில் நடைபெறும் காஷ்மீர் பிரிமியர் லீக் கிரிக்கெட் போட்டியின்
இறுதி ஆட்டத்தையும் டோனி பார்க்கிறார். டோனியின் வருகை கடுமையான
சூழ்நிலையில் பணியாற்றும் ராணுவ வீரர்களுக்கு உத்வேகமும், ஊக்கமும்
அளிப்பதுடன், உள்ளூர் இளைஞர்கள் ராணுவத்தில் சேர ஆர்வத்தை தூண்டும் என்று
ராணுவ செய்தி தொடர்பாளர் மகிழ்ச்சி தெரிவித்தார்.

ராணுவ வீரர்களை சந்தித்து உரையாடிய பின்னர் கேப்டன் டோனி நிருபர்களிடம் கூறியதாவது:-

நான்
இங்கு வர முடிந்ததற்கு கிரிக்கெட் தான் காரணம். கிரிக்கெட் ஆட்டத்தில்
இருந்து ஓய்வு பெற்ற பின்னர் நான் நிச்சயம் ராணுவத்துக்கு சேவை செய்ய
விரும்புகிறேன். எல்லை பகுதிக்கு செல்ல நான் முயற்சி செய்வேன். அதனை
பார்ப்பது உணர்ச்சிப் பூர்வமான மகிழ்ச்சியாக இருக்கும்.

ராணுவ
அதிகாரிகள் அங்கு சந்திக்கும் சவால்களை நேரில் பார்த்து தெரிந்து கொள்ள
விரும்புகிறேன். நான் ராணுவத்தை தூரத்தில் இருந்து தான் பார்த்து
இருக்கிறேன். தற்போது ராணுவத்தின் செயல்பாடுகளை அருகில் இருந்து பார்க்கும்
வாய்ப்பு கிடைத்துள்ளது.

முதல்முறையாக நான் ராணுவ
சோதனை முகாமுக்கு வந்து இருக்கிறேன். இந்தியா-பாகிஸ்தான் அணிகள் இடையிலான
கிரிக்கெட் போட்டியை மீண்டும் தொடங்க வேண்டியது முக்கியமானதாகும். ஏனெனில்
விளையாட்டு ஒன்று தான் தடைகளை தகர்க்க கூடிய சக்தி வாய்ந்ததாகும்.

இரு
நாடுகள் இடையிலான போட்டி நடைபெறுவது குறித்து இரு கிரிக்கெட் வாரியங்கள்
தான் முடிவெடுக்க வேண்டும். நாங்கள் அங்கு சென்று விளையாட வேண்டும். எனவே
நாம் பொறுத்து இருந்து பார்ப்போம்.
இவ்வாறு டோனி கூறினார்.

-மாலை மலர்