பரிசற்றதல்ல எந்த வாழ்வும்....

by **rameshnaga** Tue Jun 05, 2012 4:12 pm

எல்லாக் கனவுகளும்
நமக்குப் பரிசளிக்கின்றன...
ஒரு துளி நம்பிக்கையையாவது.

எல்லாத் தேடல்களும்
நமக்குப் பரிசளிக்கின்றன...
ஒரு தடத்தின் புதிய காலடியையாவது.

எல்லாப் பகல்களும்
நமக்குப் பரிசளிக்கின்றன....
ஒரு விடியலின் சிறு கீற்றையாவது.

எல்லாப் பூக்களும்
நமக்குப் பரிசளிக்கின்றன...
தினமும்...புதிதாய்ப்
பூப்பதின் இரகசியத்தை.

எல்லாக் கேள்விகளும்
நமக்குப் பரிசளிக்கின்றன....
ஒளிந்திருக்கும் பதில்களின் மறைவிடங்களை.

எல்லாத் தவறுகளும்
நமக்குப் பரிசளிக்கின்றன...
ஒரு சரியானதின் ஆரம்ப நுனியை.

எல்லாப் பிரார்த்தனைகளும்
நமக்குப் பரிசளிக்கின்றன....
நம்மிடம் ஒளிந்திருக்கும்....
கடவுளைப் பகிர்ந்து கொள்ள.

எல்லாக் காதல்களும்
நமக்குப் பரிசளிக்கின்றன...
ஒரு அன்பின் சிறுதுளியை...
நாம் வெளிப்படுத்த.

எல்லா நட்புகளும்
நமக்குப் பரிசளிக்கின்றன...
பகிர்தலின் மேன்மையை புரிந்துகொள்ள.

எல்லா உறவுகளும்
நமக்குப் பரிசளிக்கின்றன...
ஒரு பிரிவின் வலியை உணர்ந்துகொள்ள.

எல்லா மனிதர்களும்
நமக்குப் பரிசளிக்கின்றனர்....
வெகுமதியற்ற....
ஒரு நீண்ட வாழ்வின் வலியை.

எல்லா மரணங்களும்
நமக்குப் பரிசளிக்கின்றன...
ஒரு ஞானத்தின் சிறு துளியையாவது.