கோடை டிப்ஸ்

இரவு படுக்கும் முன் படுக்கையறையின் ஜன்னலுக்குப் பக்கத்தில் ஒரு டேபிள் வைத்து அதன்மேல் அகலமான டிரேயில் தண்ணீர் ஊற்றிவைத்தால், குளிர்ந்த காற்று உங்களை நிம்மதியாக தூங்கச் செய்யும்.

தண்ணீரில் யுடிகோலன், சந்தனம், பன்னீர் ஆகியவற்றைக் கலந்து அதில் பழைய காட்டன் புடவையை நனைத்துப் பிழிந்து, படுக்கையறை ஜன்னல்களில் தொங்கவிட்டால், காற்றும் குளிர்ச்சியாக இருக்கும். மனமும் மனதுக்கு இதமாக இருக்கும்.

எலுமிச்சம்பழச்சாற்றைப் பிழிந்து மெல்லிய வடிகட்டியில் வடிகட்டி ஃப்ரீஸர் டிரேயில் ஊற்றி ஃபிரிட்ஜினுள் வைத்துவிடுங்கள். லெமன் ஜூஸ் தேவைப்படும்போது இந்த கியூப்களைப் பயன்படுத்தி சட்டென தயாரித்துவிடலாம்.

குழந்தைகளுக்கு எலுமிச்சை ஜூஸ், சாத்துக்குடி ஜூஸ் குடிக்கக் கொடுக்கும்போது சிட்டிகை உப்பும் மிளகுத்தூளும் கலந்து கொடுத்தால் சளி பிடிக்காது. சுவையும் கூடுதலாக இருக்கும்.

வீட்டில் ஐஸ்கிரீம் செய்யும்போது ஐஸ்கிரீம் கலவையை பிளாஸ்டிக் டப்பாவில் போட்டு இறுக்கமாக மூடி ஃப்ரீஸரில் வைத்துவிட்டால் ஐஸ்கிரீம் மிருதுவாக இருக்கும்.

வெயிலிலி விளையாடிவிட்டு வரும் குழந்தைகளுக்கு குளிர்ந்த நீர் அல்லது குளிர்பானம் கொடுத்தால் சளி பிடிக்கலாம். அதனால் பத்து நிமிடம் கழித்து, அறையில் தட்பவெப்ப நிலைக்கு அவர்கள் உடல் வந்த பிறகு குளிர்ந்த பொருட்களைத் தரலாம்.

வெந்தயத்தை ஊறவைத்து மிக்ஸியில் அரைத்து மோருடன் கலந்த பிறகு அந்த மோரில் மிளகாயை ஊறவைத்தால் மோர் மிளகாய் வாசனையாகவும் காரம் குறைவாகவும் இருக்கும். மோர் மிளகாயுடன் பாகற்காயையும் வட்டமாக நறுக்கி ஊறவைத்தால் பொரித்துச் சாப்பிடும்போது சுவை கூடுதலாக இருக்கும்.

சிலருக்கு எவ்வளவு தண்ணீர் குடித்தாலும் நாக்கு வறட்சியாகவே இருக்கும். பார்லியை கஞ்சி வைத்து அந்தக் கஞ்சியுடன் சிறிது தேன் கலந்து சாப்பிட்டு வர நா வறட்சி நீங்கும்.

இளசான நுங்குகளை சின்ன சின்ன துண்டுகளாக நறுக்கி, நன்றாகக் காய்ச்சி ஆறிய பாலில் போட்டு சிறிது சர்க்கரை, ஏலப்பொடி சேர்த்து சாப்பிட்டால் உடல் சூடு தணியும்.

&என்.ஜரினாபானு, திருப்பட்டினம்.

நுங்கினுள் இருக்கும் சாறைப் பூசினால், வியர்க்குரு அடங்கும், உடலும் குளுமை பெறும்.

விளாம்பழத்தினுள் இருக்கும் சதைப்ப்குதியை மசித்து அதனுடன் சிறிது வெல்லம் சேர்த்து சாப்பிட்டால் பித்தம் குறைவதுடன் நா வறட்சியும் அடங்கும்.

தினமும் இரவில் பப்பாளிப் பழத்துண்டுகளைச் சாப்பிட்டு வர, சூட்டினால் ஏற்படும் மலச்சிக்கலைத் தவிர்க்கலாம்.

பத்து கிராம் சீரகம், ஆறு பனங்கற்கண்டு இரண்டையும் மூன்று டம்ளர் தண்ணீரில் போட்டு கொதிக்க வைக்கவும். வெயில் நாட்களிலும் மாதவிடாய் சமயத்திலும் ஏற்படும் தசைப்பிடிப்பு இருக்காது.
& ரம்யா ராமகிருஷ்ணன், காயக்காடு.

குளிக்கும் நீரில் வேம்பு, துளசி இலைகளை முதல்நாள் இரவே போட்டுவைத்து, மறுநாள் இந்த நீரில் குளித்தால் அதிக வியர்வையால் தோல் மீது ஏற்படும் பூஞ்சைத்தொற்றைத் தவிர்க்கலாம்.

உஷ்ணத்தால் குழந்தைகளுக்கும் பெரியவர்களுக்கும் வறட்டு இருமல் அதிகம் வரும். அதிமரத்தைச் சாப்பிட்டு வந்தால் இருமல் மட்டுப்படும்.

சிறிது மணத்தக்காளி இலைகளை மிக்ஸியில் அரைத்து சாறெடுத்து ஒரு டம்ளர் நீர் சேர்த்துக் குடித்தால் உடல் சூடு குறைந்துவிடும். வயிற்றுப்புண், வாய்ப்புண் போன்றவை குணமாகும்.

கசகசாவை விழுதாக அரைத்து, அதை கொதிக்க வைத்த பாலுடன் சேர்த்துக் குடித்தால் வெயில் சூட்டினால் வரும் வயிற்றுவலி நீங்கும். ஒரு டம்ளர் பாலுக்கு ஒரு டீஸ்பூன் சர்க்கரை, இரண்டு டீஸ்பூன் கசகசா விழுதைச் சேர்க்கலாம். இதுபோல பதினைந்து நாட்களுக்குக் குடித்துவந்தால் கோடை சூட்டினால் வரும் எந்த வியாதியும் நெருங்காது.
& ஏ.மெஹ்னாஸ், கீழக்கரை.

வெயில் காலத்தில் ஃபிரிட்ஜ் தண்ணீரைத் தவிர்த்து மண்பானை தண்ணீரைக் குடிக்கலாம்.

வெயில் காலத்தில் அதிகம் பவுடர் பூசாதீர்கள். வியர்வைத்துளைகள் அடைபட்டு, வியர்வை வெளியேறுவதில் சிரமம் ஏற்படும்.

சந்தனத்தை அரைத்து முகத்தில் பூசினால் வியர்க்குருவைத் தவிர்க்கலாம்.

வெள்ளரிப்பிஞ்சு மற்றும் தர்பூசணியை அதிகமாக எடுத்துக் கொள்ளுங்கள். மோர், எலுமிச்சை ஜூஸ் குடித்துவந்தால் நீர்க்கடுப்பு வராது.

புழுங்கல் அரிசி அரை கப், முழு உளுந்து 2 டேபிள் ஸ்பூன், வெந்தயம் 2 டீஸ்பூன், 1 டீஸ்பூன் சீரகத்துடன் சிறிது உப்பு சேர்த்து நன்றாகக் குழையவைத்து கஞ்சி குடித்தால் உடல் சூடு குறையும்.
& ஆதிரை வேணுகோபால், சென்னை&94.

வல்லாரை மற்றும் கொத்தமல்லியை அடிக்கடி உணவில் சேர்த்துக் கொள்ளுங்கள். சிறுநீர்ப்பாதை எரிச்சல், நீர்க்கடுப்பு இவற்றுக்கு நல்லது. நன்னாரி வேரை நசுக்கி தண்ணீரில் போட்டு கொதிக்கவைத்து சாறெடுத்துக் குடித்தால், உடல் குளிர்ச்சி பெறும்.

நன்றி : இணையம்