கூடுதல் விலை கொடுக்கிறோம்; தருவீர்களா?

கூடுதல் விலை கொடுக்கிறோம்; தருவீர்களா?-தலையங்கம்


பண்டைய காலத்தில் காடுகளில் விலங்குகளைபோல வாழ்ந்த மனிதன், கொஞ்சம் கொஞ்சமாக நாகரீக உலகுக்குள் நுழைந்தான். அவன் நாகரீக உலகுக்குள் நுழைந்த முதல்படியே எல்லாவற்றையும் பச்சையாக சாப்பிட்டுக்கொண்டிருந்த மனிதன், நெருப்பு மூட்டி, சுட்டு சாப்பிட தொடங்கிய காலம்தான். அதன்பிறகு வேக வைத்து சாப்பிட்டான். இப்படித்தான் ருசியான சமையல் பிறந்தது. இப்போது விறகோ, மண்எண்ணெய் ஸ்டவ்வோ வீடுகளில் பார்க்க முடியாது. அநேகமாக எல்லா குடும்பங்களிலும் கியாஸ் சிலிண்டர் மூலம்தான் சமையல் நடக்கிறது. அரசும் இலவச அடுப்புகளை கொடுத்தபிறகு, சமையல் கியாஸ் சிலிண்டர்களுக்கு கடுமையான தட்டுப்பாடு ஏற்பட்டுள்ளது.

சமையல் கியாஸ் சிலிண்டர் என்பது, மக்களின் வாழ்க்கையில் ஒரு அன்றாட தேவையாகிவிட்டது, அத்தியாவசிய தேவையாகிவிட்டது. சமையல் கியாஸ் சிலிண்டருக்கு அரசின் சார்பில் 320 ரூபாய் 38 காசுகள் மானியமாக கொடுக்கப்படுகின்றன. தற்போது சென்னை நகரில் சமையல் கியாஸ் சிலிண்டரின் விலை ரூ.393.50 ஆகும். தமிழ்நாடு முழுவதும் சிலிண்டர் சப்ளையை பெரும்பாலும் இந்தியன் ஆயில் நிறுவனம் வழங்குகிறது. இதுமட்டுமல்லாமல், இந்துஸ்தான் பெட்ரோலியம் கார்ப்பரேஷன் லிமிடெட் (எச்.பி.சி.எல்.), பாரத் பெட்ரோலியம் கார்ப்பரேஷன் லிமிடெட் (பி.பி.சி.எல்.) நிறுவனமும் வழங்குகின்றன. இந்தியன் ஆயில் நிறுவனத்தின் சார்பில் தமிழ்நாடு முழுவதும் 79 லட்சம் வீடுகளுக்கு கியாஸ் சிலிண்டர் வழங்கப்படுகின்றன. இதுபோல, இந்துஸ்தான் பெட்ரோலியம் நிறுவனம் சார்பில் 20 லட்சம் பேர்களுக்கும், பாரத் பெட்ரோலியம் கார்ப்பரேஷன் சார்பில் 35 லட்சம் பேர்களுக்கும் வழங்கப்படுகின்றன.

சமீபகாலமாக கடுமையான சிலிண்டர் தட்டுப்பாட்டால் மக்கள் அவதிப்பட்டுக்கொண்டிருக்கிறார்கள். கியாஸ் சிலிண்டர் தீர்நëதுவிட்ட நிலையில், எப்படி சமைப்பது? என்ற குழப்பம் ஒரு பக்கம். பல வீடுகளில் ஓட்டலில் சாப்பிட வேண்டிய நிர்ப்பந்தத்துக்கு ஆளாகியுள்ளனர். சில இடங்களில் சிலிண்டர்கள் சப்ளைக்கு ஒரு மாதத்துக்கு மேலாகி விடுகிறது. ஏன் சிலிண்டர் சப்ளை தாமதமாகிறது? என்று அதிகாரிகளிடம் கேட்டால், வேலை நிறுத்தம் ஒரு காரணம், எந்திரக் கோளாறு ஒரு காரணம் என்கிறார்கள். கியாஸ் சிலிண்டர் என்பது அத்தியாவசிய பணிகளில் வருவதாகும். எனவே, சம்பந்தப்பட்டவர்கள் வேலைநிறுத்தம் செய்தால், பாதிக்கப்படுவது மக்கள்தான். ஆகவே, வேலைநிறுத்தம் என்ற ஆயுதத்தை பயன்படுத்தி, மக்களை வாட்டி வதைக்காமல், பேச்சுவார்த்தை என்ற சாத்வீக முறையை பயன்படுத்தி, பிரச்சினைகளை தீர்த்துக்கொள்ளலாமே? என்பது வேலைநிறுத்தம் செய்பவர்களுக்கு மக்கள் விடுக்கும் வேண்டுகோளாகும். இது அத்தியாவசிய பணி என்ற வகையில், சமையல் கியாஸ் சிலிண்டர் விஷயத்தில் வேலைநிறுத்தம் குறித்து தடைவிதிப்பது பற்றி அரசு பரிசீலிக்கவேண்டும். மொத்தத்தில் மக்கள் பாதிப்புக்குள்ளாகக்கூடாது.

இது ஒருபுறம் இருக்க, ஒரே வீட்டில் வேறு வேறு பெயர்களில் பல இணைப்புகள் வாங்கியிருப்பதை எண்ணெய் நிறுவனங்கள் கண்டுபிடித்துள்ளன. இந்த நிறுவனங்கள் பயன்படுத்தும் சாப்ட்வேர் மூலம் ஒரே முகவரியில் எத்தனை இணைப்புகள் இருக்கிறது? என்பதை கண்டுபிடித்து, இந்தியன் ஆயில் நிறுவனம் மட்டும் 71/2 லட்சம் இணைப்புகளை நிறுத்தி வைத்திருக்கிறார்கள். இந்துஸ்தான் பெட்ரோலியம் நிறுவனம் 77 ஆயிரம் இணைப்புகளையும், பாரத் பெட்ரோலியம் கார்ப்பரேஷன் நிறுவனம் 2 லட்சத்து 30 ஆயிரம் இணைப்புகளையும் நிறுத்தி வைத்திருக்கிறார்கள். இது, நிச்சயமாக நல்ல நடவடிக்கைதான். இத்தனை இணைப்புகளுக்கும் சிலிண்டர் சப்ளையை ரத்து செய்தால், மற்றவர்களுக்கு விரைவில் சப்ளை செய்ய ஏதுவாகத்தான் இருக்கும். சில வீடுகளில் சிலிண்டர்கள் அரசு எதிர்பார்க்கும் நாட்களுக்கு முன்பே முடிவடைந்து விடுகிறது. நிறைய உறுப்பினர்களை கொண்ட வீடுகளிலும், ஏதாவது சந்தர்ப்பங்களில் விருந்தினர்கள் அதிகம்பேர் வந்துவிட்டாலும், சமையல் கியாஸ் சிலிண்டர் சீக்கிரம் தீர்ந்துவிடுகிறது. அப்படிப்பட்ட வீடுகளில் புது சிலிண்டருக்கு பதிவு செய்து, அது கிடைப்பதற்கு நாட்களாகி விடுகின்றன. இதைத் தவிர்க்க, எண்ணெய் நிறுவனங்கள் அரசின் மானியத்தொகை இல்லாமல், உண்மையாக ஒரு கியாஸ் சிலிண்டருக்கு ஆகும் தொகையை, அதாவது ரூ.393.50 காசுகளுடன், அரசு மானியத்தொகையான ரூ.320.38 காசையும் சேர்த்து ஆக மொத்தம் ரூ.713.88 காசுகளை ஒரு வீட்டில் கொடுக்கத்தயாராக இருந்தால், அவசர தேவைக்காக அவர்களுக்கு உடனடி `டோர் டெலிவரி' அதாவது, உடனடியாக அவர்களது வீட்டில் சமையல் கியாஸ் சிலிண்டர் வழங்கும் முறையை அரசும், எண்ணெய் நிறுவனங்களும் அமல்படுத்த முன்வரவேண்டும் என்று பொதுமக்கள் கேட்கிறார்கள்.

இந்தியன் ஆயில் நிறுவனம் தனது நிறுவனத்தில் பணிபுரியும் அல்லது ஏஜென்ட்களை திருட்டுத்தனமாக உணவகங்களுக்கு காஸ் விநியோகிப்பத்தை நிறுத்த நடவடிக்கை எடுக்குமேயானால் நாடும் வீடும் நலம் பெறும் என்பது என் கருத்து.

ஜேன் செல்வகுமார் wrote:இந்தியன் ஆயில் நிறுவனம் தனது நிறுவனத்தில் பணிபுரியும் அல்லது ஏஜென்ட்களை திருட்டுத்தனமாக உணவகங்களுக்கு காஸ் விநியோகிப்பத்தை நிறுத்த நடவடிக்கை எடுக்குமேயானால் நாடும் வீடும் நலம் பெறும் என்பது என் கருத்து.