ரயில் பூக்கள்

by **கே. பாலா** Fri May 25, 2012 3:00 pm

ரயில் பூக்கள்

கவிஞர் முகுந்த் ராஜன்

பெட்டியில் இருந்த பெண்களை எல்லாம்
‘அக்கா’ என்று அழைத்தபடி
பூ விற்றுக் கொண்டிருந்தாள்,
சின்ன கைகளால் முழம் போட்டபடி.
முழம் சின்னதாக இருப்பதாக
முணுமுணுத்தவளுக்கு
தன் கை ரொம்ப பெரியது என்று
சொல்லிச் ச்மாதான செய்தாள்.
ஒரு சில அக்காக்களுக்கு அவளே
தலையில் வைத்துவிட்டாள்.
கைக்குழந்தைக்கு ஒன்றிரண்டு உதிரிப்
பூக்களைக் கொடுத்துக் கொஞ்சினாள்.
வியாபாரம் முடித்ததும்
கூடையை காலி சீட்-ட்ல் வைத்துவிட்டு
பெட்டியின் வாசலில் வந்து நின்றாள்;,
வேகக் காற்று கூந்தல் கலைக்க.
பாவாடையைக் கையில் பிடித்துகொண்டு
‘லா-லா’ என்று பாடிக்கொண்டு
மயில் போல முன்னும் பின்னும் மெதுவாக
ஆடிக்கொண்டிருந்தாள்,
அடுத்த ஸ்டேஷனில் நிற்கும் முன்னே
பூக்கூடையுடன் குதித்து இறங்கி
அடுத்த பெட்டிக்குப் போகும் வரை.