ரூபாய் மதிப்பு வீழ்ச்சி:இந்திய பொருளாதாரம் சவால்களை முறியடித்து மீண்டுவிடும்- பிரணாப் முகர்ஜி நம்பிக்கை

புதுடெல்லி, மே.24-

அமெரிக்க டாலருக்கு எதிரான இந்திய ரூபாயின் மதிப்பு 56 ரூபாயாக வீழ்ச்சி அடைந்துள்ளது. இதனால், இறக்குமதி செலவு அதிகரிக்கும் அபாயம் உள்ளது. கச்சா எண்ணெய் இறக்குமதி செலவு அதிகரித்துவிட்டதால், பொதுத்துறை எண்ணெய் நிறுவனங்கள், பெட்ரோல் விலையை லிட்டருக்கு 7 ரூபாய் 50 காசுகள் உயர்த்தி விட்டன.
.

இந்நிலையில், இந்திய பொருளாதார பணி புரபஷனரி அதிகாரிகள் கூட்டத்தில் மத்திய நிதி மந்திரி பிரணாப் முகர்ஜி கலந்து கொண்டார். அங்கு அவர் பேசியதாவது:-

யூரோ நாணயத்தை பின்பற்றும் நாடுகளில் நிலவும் சில சிக்கல்கள் காரணமாக, இந்திய பொருளாதாரம் சில சவால்களை சந்தித்து வருகிறது. இந்திய பொருளாதாரத்தின் மீள்திறன் மீது எனக்கு நம்பிக்கை உள்ளது.

இந்த சவால்களை எல்லாம் முறியடித்து இந்திய பொருளாதாரம் மீண்டுவிடும். இதற்கு முன்பும் இதுபோன்று இந்திய பொருளாதாரம் மீண்டு வந்துள்ளது.

பணவீக்கத்தை கட்டுப்படுத்த மத்திய அரசு நடவடிக்கை எடுத்து வருகிறது. இத்தகைய நடவடிக்கைகளால், இந்திய பொருளாதாரம் உயர் வளர்ச்சி பாதையில் நடைபோடும்.

கூட்டணி ஆட்சி என்பதால், எல்லா முடிவுகளுக்கும் மற்ற கூட்டணி கட்சிகளையும் சம்மதிக்க செய்ய வேண்டி உள்ளது. அதனால்தான் சிறிது காலதாமதம் ஆகிறது. ஆனால், இறுதியில் முடிவு எடுத்து அமல்படுத்தி விடுவோம். சேவைத்துறையும், வேளாண்மைத்துறையும் நல்ல வளர்ச்சி அடைந்துள்ளன. நல்ல மழை பெய்யும் என்று எதிர்பார்க்கப்படுவதால், விவசாய துறை வளர்ச்சி நன்றாக இருக்கும் என்று கருதுகிறோம்.

இவ்வாறு பிரணாப் முகர்ஜி கூறினார்.

-மாலை மலர்

நடக்கட்டும் நடக்கட்டும்

ஏதோ... திரு.பிராணாப் ஜி...

உங்களைத்தான் நம்பியிருக்கிறோம்...

ம்...ம்... நடப்பது நல்லதாக நடக்கட்டும்.