எனைத் தன்வசம் ஆக்கிவிட்டாள்!

**சாமி** · **சாமி** Fri May 18, 2012 7:21 pm

கமலம் அடுக்கிய செவ்விதழால் – மலர்க்
காட்டினில் வண்டின் இசை வளத்தால்
கமழ் தரு தென்றல் சிலிர் சிலிர்ப்பால் – கருங்
கண்மலரால் முல்லை வெண்ணகைப்பால்

அமையும் அன்னங்கள் மென்னடையால் – மயில்
ஆட்டத்தினால் தளிர் ஊட்டத்தினால்
சமையும் ஒருத்தி – அப்பூஞ்சோலை – எனைத்
தன்வசம் ஆக்கிவிட்டாள் ஒருநாள்.

சோலை அணங்கொடு திண்ணையிலே – நான்
தோளினை ஊன்றி இருக்கையிலே
சேலை நிகர்த்த விழியுடையாள் – என்றன்
செந்தமிழ்ப் பத்தினி வந்து விட்டாள்!

சோலையெலாம் ஒளி வானமெலாம் – நல்ல
தோகையர் கூட்ட மெலாம் அளிக்கும்
கோல இன்பத்தை யென் உள்ளத்திலே – வந்து
கொட்டிவிட்டாள் எனைத் தொட்டிழுத்தாள்!

தமிழ்க்காதல் – பாவேந்தர் பாரதிதாசன் பாடல்