குறுக்கு வழி

கதிர்வேல், மணி இருவரும் ஒரே வகுப்பில் எட்டாவது படிக்கும் மாணவர்கள்.

இருவருக்குள்ளும் போட்டி மனப்பான்மை இருந்தது. தேர்வு வந்ததால், தேர்வில் யார் அதிக மதிப்பெண் எடுப்பது? என்று போட்டி வைத்துக் கொண்டனர்.

மணி பந்தயத்தில் ஜெயிப்பதற்காக கூடுதல் கவனத்துடன் படித்தான். ஆனால் கதிர்வேலுவோ குறுக்கு வழியில் ஜெயிக்க நினைத்தான்.

அன்று தேர்வு ஆரம்பமானது. மணி முழுமையாக தன்னை தயார்படுத்திக் கொண்டு வந்திருந்தான், தேர்வு அறையில் மாணவர்கள் வரிசையாக அமர்ந்து தேர்வெழுதிக் கொண்டிருந்தனர்.

தலைமையாசிரியர் ஒவ்வொரு வகுப்பாக பார்வையிட்டுக் கொண்டே வந்தார். கதிர்வேலுவின் வகுப்புக்குள் தலைமை ஆசிரியர் நுழைந்தார். பதட்டமாக எழுதிக் கொண்டிருந்த கதிர்வேலுவை எழுப்பி சோதனை செய்தார். அவனிடம் நிறைய `பிட்' பேப்பர்கள் இருந்தது. பயந்துபோன கதிர்வேல் தேம்பி அழ ஆரம்பித்தான்.

"உனக்கு தேர்வு எழுத அனுமதியில்லை. நீ வெளியே போகலாம்'' என்று சொல்லிவிட்டு அடுத்த வகுப்பை நோக்கி நடைபோட்ட தலைமை ஆசிரியரின் பின்னால் எழுந்து ஓடினான் மணி.

"சார்''

"சொல்லு மணி எதுக்கு தேர்வு எழுதறதை விட்டுட்டு ஓடிவர்றே'' தலைமை ஆசிரியர் கேட்டார்.

மணி தனக்கும் கதிர்வேலுவுக்கும் ஏற்பட்ட போட்டியைப் பற்றி தலைமை ஆசிரியரிடம் கூறினான். "அதிக மதிப்பெண் எடுக்கணும்ங்கற ஆசையில் இப்படி செய்துட்டான். அவனை மன்னிச்சி தேர்வு எழுத அனுமதிங்க சார்'' என்று கெஞ்சினான்.

கதிர்வேலுவை அழைத்த தலைமை ஆசிரியர், "கதிர்வேல், லட்சியத்தை அடைய என்றைக்கும் குறுக்கு வழியில் போகக்கூடாது. போனால் உன்னை மாதிரிதான் அசிங்கப்பட நேரிடும். இனி மேலாவது நேர்மையா படிச்சி, மார்க் வாங்குற வழியைப் பாரு'' என்று எச்சரித்து

அனுப்பினார்."சரி'' என்று தலையாட்டிவிட்டு வெளியே வந்தான் கதிர்வேல்.

மணிக்கு நன்றி சொன்ன கதிர்வேல், நேர்மையான முறையில் தேர்வு எழுத ஆரம்பித்தான்.

ஏ.மூர்த்தி