தாத்தாவின் பெருமை

தேர்வுக்கு கணக்குகளைப் போட்டுப் பார்த்துக் கொண்டிருந்தான் கோகுல்.

ஆண்டு இறுதித் தேர்வில் கணக்கில் 100-க்கு 100 வாங்கிவிட வேண்டும் என்று கடுமையாக முயற்சித்துக் கொண்டிருந்தான்.

ஒரு கணக்கு மட்டும் அவனுக்குத் தெரியவில்லை. அவன் அம்மாவிடம் கேட்டான்.

அவனது அம்மாவும் போட்டுப்பார்த்து விடை வராமல் போகவே, `அப்பாவைக் கேள்' என்று சொல்லிவிட்டார்.

`எனக்குப் படிக்கும்போதே சுட்டுப் போட்டாலும் கணக்குவராது, உன் நண்பன் அரவிந்தனிடம் கேள்' என்று அவனிடம் அனுப்பினார்.

அரவிந்தனிடம் கணக்கை கேட்டுத் தெரிந்து கொள்வதற்காக அவனது வீட்டை நோக்கி புறப்பட்டான் கோகுல். அரவிந்தன் வீட்டில் நுழையும் முன் அவன் கண்ட காட்சி அவனுக்கு ஆச்சரியத்தைத் தந்தது. அங்கே தனது தாத்தா அரவிந்தனுடன் உட்கார்ந்திருப்பதைக் கண்டான் கோகுல்.

இங்கே தன் தாத்தா என்ன செய்கிறார், என்று கவனித்தபோது அரவிந்தனுக்குக் கணக்குப் பாடம் சொல்லிக் கொடுத்துக் கொண்டிருந்தார். கொஞ்ச நேரம் மறைந்திருந்து கவனித்தான் கோகுல்.

`தாத்தா இந்தக் கணக்கு, தேர்வுக்குக் கண்டிப்பாய் வரும் என்று என் கணக்கு ஆசிரியர் கூறியுள்ளார். எனக்குத் தெரியாததை எல்லாம் உங்களிடம் கேட்டுத் தெரிந்து கொள்வதால்தான் என்னால் வகுப்பில் முதல் மாணவனாக வர முடியுது' என்று அரவிந்த், கோகுலின் தாத்தாவிடம் கூறினான்.

அப்படியா, சமர்த்து... தொடர்ந்து நல்லா படிக்கணும் சரியா பேராண்டி' என்றார் தாத்தா.

`எனக்கு சொல்லித் தரும் உங்களுக்குத்தான் என்னால் எதுவும் செய்ய முடியவில்லை' என்று வருத்தப்பட்டான் அரவிந்தன்.

`எனக்கு நீயும் ஒரு பேரன் மாதிரிதான். உன் அம்மா வீட்டு வேலை செய்து உன்னை படிக்க வைக்கிறாள், உன்னால் பணம் கொடுத்து டிïசன் படிக்க முடியாது. நான் அந்தக் காலத்து கணக்குப் பட்டதாரி. என் பேரனுக்கு சொல்லிக் கொடுத்தா பணமா வாங்குவேன். அதே மாதிரிதான் உனக்கும். நீ நல்லா படித்தால் அதுவே போதும்' என்று சொல்லிவிட்டு வீட்டிற்குப் புறப்பட்டார்.

எல்லாவற்றையும் மறைந்திருந்து கேட்ட, கோகுல் வெட்கப்பட்டான்.

அம்மாவும், அப்பாவும், என் தாத்தாவை ஒன்றுக்கும் உதவாதவர் என்று ஒதுக்கி வைத்திருந்தார்கள். அதனால் நானும் அவரை கண்டுகொள்ளாமல் ஒதுங்கியே இருந்துவிட்டேன். தாத்தாவுக்கோ அம்மாவுக்கும், அப்பாவுக்கும் தெரியாத கணக்கு கூட தெரிந்திருக்கிறது. அதைப் பயன் படுத்திக் கொண்டே அரவிந்த் முதல் மார்க் வாங்கியிருக்கிறான். கையில் வெண்ணையை வைத்துக் கொண்டு நெய்க்கு அலைந்த கதையாக, நானோ என் தாத்தாவை பயன்படுத்திக் கொள்ளாமல், கணக்குப் புரியாமல் தவித்திருக்கிறேன். இனிமேல் நானும் தாத்தாவை மதிப்பேன். அவரிடம் கணக்குப் பாடம் கற்றுக் கொண்டு நூற்றுக்கு நூறு மதிப்பெண் வாங்குவேன்' என்று மனதுக்குள் நினைத்துக் கொண்டு வீட்டிற்கு திரும்பினான்.

வீட்டுக்குள் ஒரு மூலையில் ஒதுங்கி இருந்த தாத்தாவின் அறைக்கு ஓடினான்.

`தாத்தா எனக்கு இந்தக் கணக்குச் சொல்லித் தாங்க தாத்தா'

`என்ன கணக்கு கோகுல், கொண்டா சொல்லித் தரேன்' என்று தாத்தாவும் சந்தோஷமாக கணக்கை சொல்லிக் கொடுக்க

ஆரம்பித்தார்.இப்போது கோகுலுக்கு அவனது தாத்தாவின் அறையே டிïசனாக மாறிவிட்டது.

- தா.ஆறுமுகம்

இருக்கும் இடத்தை விட்டு இல்லாத இடம் தேடி அலைவது என்பது இது தானோ...

நல்ல கதை.

சூப்பர் கதை சிவா.

பேரன் பேத்தி எடுக்கற வயசா உங்களுக்கு?

நல்லபடியா சொல்லிக் குடுங்க - பசங்களாவது பாஸ் பண்ணட்டும்.