இந்தோனேசியாவில் விமான விபத்தில் 47 பேர் பலி

by **சிவா** Fri May 11, 2012 7:08 am

இந்தோனேசியாவில் காணாமல் போனதாக கருதப்பட்ட விமானம், மலை உச்சியில் நொறுங்கி விழுந்தது. இதில், 47 பேர் பலியானார்கள்.

சோதனை ஓட்டம்

ரஷியாவைச் சேர்ந்த சுகோய் விமான தயாரிப்பு நிறுவனம், இந்தோனேசியாவுக்கு 42 சுகோய் சூப்பர்ஜெட்-100 ரக விமானங்களை விற்க திட்டமிட்டுள்ளது. இது, கடந்த 20 ஆண்டுகளில் ரஷியா தயாரித்துள்ள முதலாவது பயணிகள் விமானம் ஆகும். 68 பேர் முதல் 103 பேர் வரை இத்தகைய விமானங்களில் பயணம் செய்யலாம்.

இந்த விமானத்தின் சோதனை ஓட்டம், இந்தோனேசிய தலைநகர் ஜகார்தாவில் நேற்றுமுன்தினம் நடைபெற்றது. விமானத்தை வாங்க திட்டமிட்டிருந்த தொழில் அதிபர்களும், பத்திரிகையாளர்களும் விமானத்தில் ஏற்றி செல்லப்பட்டனர். முதலில் ஒரு சோதனை ஓட்டம் முடிந்தவுடன், மற்றொரு குழுவுடன் இரண்டாவது சோதனை ஓட்டம் தொடங்கியது.

மாயம்

ஜகார்தா விமான நிலையத்தில் இருந்து விமானம் புறப்பட்ட 21 நிமிடங்களில், அது ராடார் பார்வையில் இருந்து மறைந்தது. விமானம் அப்போதுதான் 8 ஆயிரம் அடி உயரத்தில் இருந்து 6 ஆயிரம் அடி உயரத்தில் பறக்க தொடங்கி இருந்தது. விமானம் மாயமாக மறைந்ததால், அதில் பயணம் செய்த 47 பேரின் கதி என்ன ஆயிற்றோ? என்ற அச்சம் ஏற்பட்டது.

கண்டுபிடிப்பு

இந்நிலையில், நேற்று தேடுதல் வேட்டை தொடங்கியது. ராணுவம், போலீசார் உள்பட 800-க்கும் மேற்பட்டோர் தேடுதல் வேட்டையில் ஈடுபட்டனர். இதுதவிர, 4 ஹெலிகாப்டர்கள் மூலமாகவும் தேடும் பணி நடைபெற்றது.

ஒரு ஹெலிகாப்டரில் சென்ற மீட்புக் குழுவினர், சலாக் மலை உச்சியில் மூடுபனிக்கிடையே விமானத்தின் சேத பாகங்கள் கிடப்பதை கண்டுபிடித்தனர். இதன்மூலம், சலாக் மலை உச்சியில் விமானம் நொறுங்கி விழுந்திருப்பது உறுதி செய்யப்பட்டது.

47 பேர் சாவு

இதையடுத்து, ஹெலிகாப்டர் மூலமாக அந்த பகுதியில் மீட்புக்குழுவினர் இறங்கினர். அவர்கள் விமானம் விழுந்து கிடந்த இடத்தில், யாராவது உயிருடன் இருக்கிறார்களா? என்று தேடிப் பார்த்தனர். ஆனால் யாருமே உயிருடன் இல்லை. விமானத்தில் சென்ற 47 பேரும் பலியாகி இருப்பது உறுதி ஆகியுள்ளது. அவர்களின் உடல்கள், ஆங்காங்கே சிதறிக் கிடந்தன.

பலியானவர்களில், 37 பேர் இந்தோனேசியர்கள், 8 பேர் ரஷியர்கள், ஒருவர் அமெரிக்க ஆலோசகர், மற்றொருவர் பிரான்சுகாரர் ஆவார்.

விமானம் விழுந்து கிடந்த இடம், தரைமட்டத்தில் இருந்து 5,500 அடி உயரத்தில் இருக்கிறது. தலைநகர் ஜகார்தாவில் இருந்து 64 கி.மீ. தூரத்தில் விபத்து பகுதி இருக்கிறது.

விபத்து பற்றி முழுமையான விசாரணை நடத்தப்படும் என்று அதிபர் சுசிலோ பாம்பங் யுதோயோனோ தெரிவித்தார்.

தினத்தந்தி