ரூ.250 கோடி முதலீடு செய்யும் நிறுவனங்களுக்குத் தடையற்ற மின்சாரம்: தமிழக அரசு தகவல்

ரூ.250 கோடி முதலீடு செய்யும் நிறுவனங்களுக்குத் தடையற்ற மின்சாரம்: தமிழக அரசு தகவல்
First Published : 10 May 2012 03:12:46 AM IST

சென்னை, மே 9: தமிழகத்தில் ரூ.250 கோடிக்கு மேல் முதலீடு செய்து தொழில் தொடங்கும் நிறுவனங்களுக்கு தடையற்ற மின்சாரம் வழங்கப்படும் என்று தமிழக அரசு அறிவித்துள்ளது.

பிற்படுத்தப்பட்டோர், மிகப் பிற்படுத்தப்பட்டோர் மற்றும் சிறுபான்மையினர் நலன், சிறு, குறு மற்றும் நடுத்தர தொழில்கள் துறைகள் மானியக் கோரிக்கை மீதான விவாதம் பேரவையில் புதன்கிழமை நடைபெற்றது. இதில் மார்க்சிஸ்ட் கம்யூனிஸ்ட் கட்சி எம்.எல்.ஏ. ஆர். ராமமூர்த்தி (விக்கிரவாண்டி) பேசியதாவது: ஆவடி அருகே மோரை என்கிற இடத்தில் சிறு தொழில் செய்வதற்கான இடத்தை அண்ணா பல்கலைக்கழகத்தின் முன்னாள் மாணவர்கள் பெற்றுள்ளனர். ஆனால், நிலத்துக்கான உரிய அனுமதி இன்னும் தரப்படவில்லை.

அமைச்சர் கே.ஏ.செங்கோட்டையன்: நிலம் வகை மாற்றம் செய்யப்பட வேண்டும். நீர்வழிப் புறம்போக்கு என்ற வகையில் உள்ளது.

ஆர். ராமமூர்த்தி: அந்த இடம் தொழில் துறைக்கானது என மறுவகைப்பாடு செய்யப்பட்டுள்ளது. ஆனால், சென்னை பெருநகர வளர்ச்சிக் குழுமத்தில் அந்த இடம் வேளாண்மைத் துறை பயன்பாட்டுக்கானது எனக் குறிப்பிடப்பட்டுள்ளது. சிறுதொழில் நிறுவனங்களுக்கு தடையில்லாத மின்சாரம் அளிக்கப்பட வேண்டும். பன்னாட்டுத் தொழில் நிறுவனங்களுக்கு எந்தத் தடையும் இல்லாமல் மின்சாரம் கொடுக்கப்படுகிறது.

அமைச்சர் நத்தம் விஸ்வநாதன்: ரூ.250 கோடிக்கு மேல் முதலீடு செய்யும் எந்த நிறுவனமாக இருந்தாலும் அதற்கு தடையில்லாத மின்சாரம் அளிக்கப்படுகிறது. பன்னாட்டுத் தொழில் நிறுவனங்களுக்கு இதுவரை 213 மெகாவாட் மின்சாரம் மட்டுமே கொடுக்கப்பட்டுள்ளது என்றார்.

தினமணி

நல்ல செய்தி.

இதைப் பெற தனியா இருட்ல வந்து
அம்பது கோடி எந்த கேடிக்கும் கொடுக்க வேணாமே?