முதிர்ந் தேன் + தெரியவில்லை( 2 கவிதைகள்)

**kirikasan** · **kirikasan** Tue May 15, 2012 11:18 pm

படித்தேன் குடித்தேன் பழமாய் சுவைத்தேன்
பழகும் விதத்தில் பூவாய்தேன்
வடித்தேன் அளித்தேன் வகையில் மாறி
வளர்ந்தேன் அறியா வளைந்திட்டேன்
அடித்தேன் உடைத்தேன் அறமும் உறவும்
எனத்தான் இல்லா இளமைத்தேன்
முடித்தேன் , முயலேன் ,முள்ளை வைத்தே
முனையேன் இனியும் முயலா,தேன்

எடுத்தேன் தமிழை இனித்தேன் சொரியும்
எனத்தான் எண்ணி அளித்தேன் சொல்
அடுத்தென் கவிகள் அனைத்தும் ஏதென்
றறியேன் அதற்கு முகமேதான்
கெடுத்தே கொள்ளா இயல்பென் கவிதை
குறைத்தேன் எனவும் குறைதோன்றா
கொடுப்பேன் கிடப்பேன் குலவும்தமிழில்
கடப்பேன் துயரம் கனியும்தேன்

இடம்தேன் தமிழின் எழில் தேன்காவென்
றுணர்ந்தேன் எதைநான் மலர்வித்தேன்
விடம்தேன் என்று வெளிவைத்தேனா
விருந்தேன் விரும்பா விளைவும் ஏன்
குடம்தேன்கொட்டக் குழவிக் கொடுக்காய்
குடைந்தே னாயின் குறைவேண்டேன்
கடந்தேன் கனலும் கடலும் குளித்தேன்
கவிதை மழையும் காணுந்தேன்

படர்ந்தேன் ஆயின் பந்தல்மீது
பிணைந்தேன் எனவே கொடியாவேன்
அடர்ந்தே மாவின் அழிகுருவிச்சை
ஆகேன் அகந்தை அகம்கொள்ளேன்
நடந்தேன் எனிலும் நல்லோர் பாதை
நடப்பேன் அன்பே நிலைகொண்டேன்
புடந்தான் இட்டோர் பொன்னாவேன் மண்
போகா இருப்பேன் பிறிதாகேன்

************

**சிவா** · **சிவா** Wed May 16, 2012 12:03 am

தமிழையும், உங்கள் செயலையும் தேனான வரிகளால் சுவையாகப் படைத்துள்ளீர்கள் அண்ணா! அன்பு மலர்

**T.N.Balasubramanian** · **T.N.Balasubramanian** Wed May 16, 2012 7:17 am

முதிர்ந்(தேன்)தோன்,
மகிழ்ந்தேன் ,
வாழ்த்துக்கள். அன்பு மலர்

ரமணியன்.

**kirikasan** · **kirikasan** Wed May 16, 2012 5:52 pm

சிவா wrote:தமிழையும், உங்கள் செயலையும் தேனான வரிகளால் சுவையாகப் படைத்துள்ளீர்கள் அண்ணா!

T.N.Balasubramanian wrote:முதிர்ந்(தேன்)தோன்,
மகிழ்ந்தேன் ,
வாழ்த்துக்கள்.

ரமணியன்.

பெருமதிப்புக்குரிய சிவா தங்களுக்கும்
ரமணியன் ஐயா, தங்கள் இருவருக்கும் என் அன்புவணக்கங்களும் நன்றிகளும்

உரைப்பேன் எதையோ உள்ளுள்நின்று
உணரா, உளறி உலைபொங்க
கரைப்பேன் பாகைக் கரைவேன் நானும்
காகம்போலும் கரையோடும்
திரைபோ லுலைவேன் திருந்தேன் தினமும்
தருவேன் தொல்லை தமிழாலே
உரைப்பேன் கவிதை ஓவென்றலறி
உள்ளே இனிமை உடைத்தாக

நன்றிகள்

**பிளேடு பக்கிரி** · 01/03/2010

படித்தேன்.. சுவைத்தேன்.. சூப்பருங்க

**kirikasan** · **kirikasan** Wed May 16, 2012 7:15 pm

பிளேடு பக்கிரி wrote:படித்தேன்.. சுவைத்தேன்..

மிக்க நன்றிகள்!

**kirikasan** · **kirikasan** Wed May 16, 2012 7:17 pm

௨. தெரியவில்லை புரியவில்லை

தெத்தத் தெத்தத் தெரிதெரி தெரிதெரி
தெரியவேதெரியாது
எத்தெத் திசைதனில் இருளும் விடியும்
எதுவுமே தெரியாது
தத்தத் தருதரு தருதரு தரணியில்
தருவது எவர் பாடு
தலைகால் புரியா ஆடும் உயிர்கள்
தவறிடும் நிலைகூறு

சித்தம் மறுகிச் சிதைவுறும் மனதும்
சேர்வது எதனூடு
சத்தம்குன்றிச் சலனமும் அற்றே
சரிவதின் நிழலூடு
உத்தம நிலையில் உயிரின் கீதம்
உடைபடும் நிலையாது
அத்தம் கொள்ளும் அறிவின் மந்தம்
அனைத்தும் அதனூடு

சுற்றுசூழல் எதுவும் காணச்
சோர்வுறும் நிலையேது
அற்றும் வாழ்வில் அந்தம் என்னில்
அதனின் பொருள் ஈது
முற்றும் போனால் முடிவின் எல்லை
முன்வரும் போலுணர்வு
கற்கள் வைத்த பாதையின் முடிவை
காணும் நிலைப்பாடு

சொற்கள் கூறும் மனதில் வெறுமை
தோன்றுவ தெதனூடு
சற்றும் குறையா விதியும் உடலை
சித்திர வதைசெய்து
நிற்கும் போது கற்பனை என்ன
நினவெழும் ஒருகாடு
விற்றல் வாங்கும் உலகும் ஏனோ
வினைகள் புறப்பாடு

என்ன இன்னும் இருந்தாய் போதும்
எழுநட எனும்போது
பின்னும்வார்த்தை பேசும்பொருளும்
பிதற்றிடும் நிலைப்பாடு
மின்னும் உயிரும் மேலா கீழா
மயங்கிடும் நினைவோடு
இன்னுமின்னும் எகிறும் வார்த்தை
இதைவிடப் பொருளேது

தெள்ளெனும்நீரில் கல்லை எறிந்தால்
தொலையும் பிம்பங்கள்;
கள்ளின் நிறமும் பாலும் ஒன்றாய்
காணும் மாயைகள்
உள்ளம்மீது இல்லைக் குற்றம்
எழுதும் வார்த்தைகள்
தள்ளும் போது மலையில் உருளத்
தலைகீழ் தெரியும் கொள்

காலச் சக்கரம் உருளும் போது
காட்சிகள் மாறுவதும்
நீலக் கருமை மேகம் மறைத்து
நிற்கும் நிலைமாறி
கோலம் மாற்றம் கொண்டே விண்ணின்
கோடி ஒளிதெரியும்
ஞால வாழ்வின் முடிவும்காண
நாளை புரிந்துவிடும்!

Sponsored content · Sponsored content

முதிர்ந் தேன் + தெரியவில்லை( 2 கவிதைகள்)

முதிர்ந் தேன் + தெரியவில்லை( 2 கவிதைகள்)

Re: முதிர்ந் தேன் + தெரியவில்லை( 2 கவிதைகள்)

Re: முதிர்ந் தேன் + தெரியவில்லை( 2 கவிதைகள்)

Re: முதிர்ந் தேன் + தெரியவில்லை( 2 கவிதைகள்)

Re: முதிர்ந் தேன் + தெரியவில்லை( 2 கவிதைகள்)

Re: முதிர்ந் தேன் + தெரியவில்லை( 2 கவிதைகள்)

தெரியவில்லை புரியவில்லை

Re: முதிர்ந் தேன் + தெரியவில்லை( 2 கவிதைகள்)

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக