ஆணவத்துக்கு விழுந்த "அடி'

தென் ஆப்ரிக்காவில் சாம்பியன்ஸ் டிராபி (மினி உலக கோப்பை) தொடர் நடந்து வருகிறது. இந்தியா, ஆஸ்திரேலியா, தென் ஆப்ரிக்கா உள்ளிட்ட எட்டு அணிகள் மட்டும் இந்த தொடரில் பங்கேற்றன. இரு பிரிவுகளாக பிரிக்கப்பட்டு போட்டிகள் முதலில் லீக் முறையில் நடந்தது. பெயருக்குத் தான் லீக் முறையில் போட்டிகள். ஆனால் பங்கேற்கும் அணிகள் எல்லாமே பலமான அணிகள் என்பதால், ஒவ்வொரு போட்டியும் அந்தந்த அணிகளுக்கு வாழ்வா... சாவா... நிலையிலேயே இருந்தன.
இந்நிலையில் தொடர் துவங்குவதற்கு முன்பு வழக்கம் போல ஒவ்வொரு அணியின் கேப்டன்கள், வீரர்கள் கருத்துக்கள், பேட்டிகள் ஒவ்வொரு விதமாக இருந்தது. ஆனால் தென் ஆப்ரிக்க அணியினரின் கருத்து சற்று அதிகமாக இருந்தது. ஏற்கனவே சிறந்த வீரர்கள் விருது பட்டியலில் ஒருவரது பெயர் கூட இடம் பெறாத சோகத்தில் இருந்த இந்த வீரர்கள்,"" விருது பட்டியலில் பெயர் இல்லாதது குறித்து எங்களுக்கு கவலையில்லை. சர்வதேச கிரிக்கெட் கவுன்சிலின் (ஐ.சி.சி.,) இந்த செயல், சாம்பியன்ஸ் டிராபி தொடரில் சாதிக்க ஊக்கமாக இருக்கும்,'' என்றனர்.
இதற்கு ஒருபடி மேலே போன தென் ஆப்ரிக்க வேகப்பந்து வீச்சாளர் ஸ்டைன் கூறுகையில்,""சாம்பியன்ஸ் டிராபி தொடரில் பங்கேற்கும் அணிகளில், எந்த அணியும் எங்களுக்கு எதிராக விளையாட தகுதியில்லாதது. நாங்கள் கட்டாயம் சாதிப்போம்,'' என ஆணவத்தோடு தெரிவித்து இருந்தார்.
தொடர் துவங்கியதும் முதல் போட்டியில் தென் ஆப்ரிக்க அணி, இலங்கையிடம் வாங்கிக்கட்டிக் கொண்டது. அடுத்து நியூசிலாந்து எதிரான போட்டியில் 5 விக்கெட் வித்தியாசத்தில் வெற்றி கண்டது. முக்கியமான கடைசி லீக் போட்டியில் இங்கிலாந்திடம் 22 ரன்கள் வித்தியாசத்தில் வீழ்ந்து, "பி' பிரிவில் இருந்து முதல் ஆளாக தொடரை விட்டு வெளியேறியது. இது அந்த அணி வீரர்களின் ஆணவத்துக்கு கிடைத்த சரியான அடி.
இதுகுறித்து அணியின் கேப்டன் ஸ்மித் கூறுகையில்,"" சாம்பியன்ஸ் டிராபி தொடரை வெல்வதற்கு எங்களுக்கு அதிக வாய்ப்புகள் இருந்தது. சரியான நேரத்தில் எல்லாம் நன்றாக நடந்தது. ஆனால் எப்படி தோல்வியடைந்தோம் என்று தெரியவில்லை. வெகுவிரைவில் தொடரில் இருந்து வெளியேறியது மிகுந்த ஏமாற்றத்தை அளித்துள்ளது. அடுத்த ஆண்டு நடக்கும் சர்வதேச "டுவென்டி-20' உலக கோப்பை தொடரில் சாதிப்போம் என்ற நம்பிக்கை உள்ளது,'' என்றார்.
இந்த தொடர் துவங்கும் முன்பு, ஆஸ்திரேலியாவிடம் ஒரு நாள் போட்டித் தொடரை 1-6 என இழந்து இருந்தது இங்கிலாந்து அணி. ஆனால் அமைதியாக அடியெடுத்து வைத்த இங்கிலாந்து வீரர்கள் ஆர்ப்பாட்டமான வெற்றிகளை பெற்று, முதல் ஆளாக அரையிறுதிக்கு நுழைந்து சாதித்துள்ளனர்.
-----

அப்படியா ஓகே ஓகே