வானூர் அருகே கரும்பு தோட்டத்தில் பாலியல் பலாத்காரம் செய்து சிறுமி கொலை

**சிவா** · **சிவா** Wed May 02, 2012 11:58 am

வானூர் அருகே கரும்பு தோட்டத்தில் பாலியல் பலாத்காரம் செய்து கொலை செய்ததாக வாலிபர் ஒருவரை போலீசார் கைது செய்தனர்.

சிறுமி மாயம்

விழுப்புரம் மாவட்டம் வானூர் வட்டம் செங்கமேடு மாரியம்மன் கோவில் தெருவை சேர்ந்தவர் அரிதாஸ் (வயது 31). கூலி தொழிலாளி. இவரது மகள் பெயர் நந்தினி (வயது 5)

இந்தநிலையில் நந்தினி நேற்று முன்தினம் வீட்டின் எதிரே அந்த பகுதியில் உள்ள சிறுவர், சிறுமிகளுடன் விளையாடி கொண்டு இருந்தாள். வெகுநேரம் ஆகியும் அவள் வீட்டுக்கு வரவில்லை. இதனால் சந்தேகம் அடைந்த அவளது பெற்றோர்கள் அவளை உறவினர்கள் மற்றும் நண்பர்கள் வீடுகளில் தேடி பார்த்தனர். ஆனால் நந்தினியை பற்றி எந்த தகவலும் கிடைக்கவில்லை.

இதைத் தொடர்ந்து இதுகுறித்து வானூர் போலீசில் அரிதாஸ் புகார் செய்தார். புகாரின் பேரில் போலீசார் வழக்குப் பதிவு செய்து சிறுமி நந்தினியை தேடி வந்தனர்.

கரும்பு தோட்டத்தில் பிணம்

இதற்கிடையே வீட்டின் அருகே உள்ள கரும்பு தோட்டத்தில் நந்தினி பிணமாக கிடப்பதாக அவரது தந்தை அரிதாசுக்கு தகவல் கிடைத்தது. உடனே அவர் சென்று பார்த்தபோது நந்தினி அங்கு பிணமாக கிடந்தது தெரிய வந்தது.

அதைத்தொடர்ந்து அவர் இதுகுறித்து வானூர் போலீசுக்கு தகவல் தெரிவித்தார். உடனே வானூர் போலீஸ் இன்ஸ்பெக்டர் முரளி மற்றும் போலீசார் சம்பவ இடத்துக்கு விரைந்து சென்று விசாரணை நடத்தினார்கள். பின்னர் நந்தினியின் உடலை கைப்பற்றி பிரேத பரிசோதனைக்காக கனகசெட்டிக்குளத்தில் உள்ள பிம்ஸ் மருத்துவமனைக்கு அனுப்பி வைத்தனர். மேலும் இந்த சம்பவம் குறித்து வானூர் போலீசார் வழக்குப்பதிவு செய்து கொலையாளியை வலைவீசி தேடி வந்தனர்.

வாலிபரிடம் விசாரணை

இந்தநிலையில் நந்தினி கொலை சம்பவம் தொடர்பாக அதே பகுதியில் உள்ள அங்காளம்மன் கோவில் தெருவை சேர்ந்த பெருமாள் என்பவரது மகன் ஜெயப்பிரகாஷ் என்பவரை சந்தேகத்தின்பேரில் போலீசார் பிடித்து விசாரணை நடத்தினார்கள்.

விசாரணையில், நந்தினியை பாலியல் பலாத்காரம் செய்து கொலை செய்ததை ஒப்புக்கொண்டார். விசாரணையில் அவர் மேலும் கூறியதாவது:-

காரணம் என்ன?

சம்பவத்தன்று நந்தினி வீட்டின் எதிரே அதே பகுதியில் உள்ள சிறுவர், சிறுமிகளுடன் விளையாடி கொண்டு இருந்தாள். அப்போது அவள் வாயில் `விசில்' வைத்து கொண்டு ஊதிக்கொண்டு இருந்தாள். இதை பார்த்த நான் எனக்கு அந்த விசிலை கொடு என்று பலமுறை கேட்டேன். ஆனால் அவள் தர மறுத்து விட்டாள்.

இதனால் கோபம் அடைந்த நான், அந்த விசிலை பறித்துக் கொண்டு அருகே உள்ள கரும்பு தோட்டத்துக்குள் ஓடினேன். அவள் என்னை விடாமல் துரத்தி கொண்டே ஓடி வந்தாள்.

பாலியல் பலாத்காரம்

இதனால் ஆத்திரம் அடைந்த நான் திடீரென்று நந்தினியை கட்டிப்பிடித்து அவளது வாயை பொத்தினேன். பின்னர் அவளை பாலியல் பலாத்காரம் செய்து கழுத்தை நெரித்து கொலை செய்தேன். அதன்பிறகு அங்கு இருந்து நான் தப்பி ஓடிவிட்டேன்.

இதற்கிடையே, நந்தினியிடம் விளையாடிக்கொண்டு இருந்த சிறுவர், சிறுமிகள் கொடுத்த தகவலின்பேரில் போலீசார் என்னை பிடித்து விசாரணை செய்தனர். விசாரணையில் நான் நந்தினியை கொலை செய்ததை ஒப்புக்கொண்டேன்.

இவ்வாறு ஜெயப்பிரகாஷ் தனது வாக்குமூலத்தில் கூறியுள்ளார்.

கைது

அதைத்தொடர்ந்து ஜெயப்பிரகாஷை போலீசார் கைது செய்தனர். கைது செய்யப்பட்ட ஜெயப்பிரகாஷ் அந்த பகுதியில் சில சிறுமிகளிடம் இதுபோன்று சில்மிஷம் செய்து இருப்பதும் விசாரணையில் தெரிய வந்துள்ளது. தொடர்ந்து அவரிடம் போலீசார் விசாரணை நடத்தினார்கள். பின்னர் கோர்ட்டு உத்தரவுப்படி செஞ்சி ஜெயிலில் ஜெயப்பிரகாஷ் அடைக்கப்பட்டார்.

தினத்தந்தி