விமானம் விழுந்தது, விமானி காப்பாற்றப்பட்டார்

by **சிவா** Tue Jan 27, 2009 11:25 pm

மலேசியாஇன்று

நேற்று ஜோகூரில் காணாமல்போன செஸ்னா விமானத்தின் விமானி, ஏழு மணி நேரத்துக்குப் பின்னர் கண்டுபிடிக்கப்பட்டார்.

சிங்கப்பூரரான சஞ்சாய் புருசோத்தம், 40, விபத்துக்குள்ளான விமானத்திலேயே சிக்கிக்கொண்டிருந்தார்.

மீட்புப் பணியாளர்கள் இன்று காலை மணி ஏழுக்கு அவரை மீட்டனர். நேற்று இருட்டும் கடும் புகை மூட்டமும் மீட்புப் பணிக்கு இடையூறாக இருந்தன.

புருசோத்தமுக்கு தொடை எலும்பு முறிந்ததுடன் உடலில் தீக்காயங்களும் ஏற்பட்டிருந்தன. அவர் இப்போது ஜோகூர் பாரு சுல்தானா அமினா மருத்துவமனையில் சிகிச்சை பெற்று வருகிறார்.

நேற்று மாலை சுமார் ஐந்து மணிக்கு மீட்புப் பணியாளர்கள், ஒரு மரக்கிளையில் விமானம் சிக்கிக்கொண்டிருப்பதைக் கண்டார்கள் என பெர்னாமா கூறுகிறது.

இரண்டு பேர் அமரக்கூடிய அவ்விமானம் எந்த நேரத்திலும் விழுந்து விடும் அபாயத்தில் இருந்தது.

புருசோத்தமும் விமானத்திலிருந்து வெளியேற முடியாமல் அதிலேயே சிக்கிக்கொண்டிருந்தார் என கூலாய் ஜெயா போலீஸ் தலைவர் சுப்பிரிண்டெண்டெண்ட் சுல்கிப்ளி யாக்யா கூறினார்.

போலீஸ், தீ அணைப்பு மற்றும் மீட்புப் படையைச் சேர்ந்த 60 பேர் புருசோத்தமைத் தேடும் பணியில் ஈடுப்பட்டதாக அவர் சொன்னார்.

விபத்து நடந்த இடத்தில், கடும் புகை மூட்டமாக இருந்ததால் அவரை ஆகாயமார்க்கமாக வெளியேற்றுவது தடைப்பட்டது.

நேற்று காலை மணி 9.40 க்கு செனாய் விமான நிலையத்திலிருந்து புறப்பட்ட புருசோத்தம், மலாக்கா பத்து பிரண்டாம் விமான நிலையத்தை காலை மணி 10.15 க்கு அடைந்திருக்க வேண்டும்.

ஆனால் காற்று பலமாக வீசியதால் அவர் செனாய்க்கே திரும்பிச் செல்ல முடிவு செய்து அதற்கான அனுமதியும் பெற்றார். சுமார் 10.15 அளவில் அவருடனான தொடர்பு அறுந்தது.