நீ சரியான ஆளுப்பா!

**சிவா** · **சிவா** Thu Apr 26, 2012 4:50 am

கிரி என்றொரு பணக்காரன் இருந்தான். அவன் மகா கஞ்சன். அவன் வாசு என்ற ஓவியனிடம் தன்னைப் போல ஓவியம் வரையச் சொன்னான்.

""அந்தக் கஞ்சன் உனக்கு பணம் தரமாட்டான். எதற்காக அவன் படத்தை வரைகிறாய்?'' என்று எல்லாரும் கேவலப்படுத்தினர்.

""நான் எப்படியும் அவரிடமிருந்து பணத்தை பெற்றே தீருவேன்,'' என்றான்.

வாசுவும் அதேபோல அவன் படத்தைத் தத்ரூபமாக வரைந்து கொடுத்து, அதற்கு ஊதியமாக ஐநூறு ரூபாய் கேட்டான்.

அவ்வளவு பணம் தர விரும்பாத கிரி, ""இது என்னைப் போல இல்லை,'' என்றான்.

""அப்படியானால், இது என் படம் இல்லை என்று படத்திற்குப் பின்னால் எழுதிக் கொடுங்கள்,'' என்றான் வாசு.

கிரியும் அப்படியே எழுதிக் கொடுத்தான்.

நான்கு நாட்கள் சென்றன-

வாசு, கிரியின் படத்தை அவன் வீட்டிற்கு எதிரே கொண்டு வந்து நிறுத்தி, அதன் அடியில், ""படத்தில் காண்பவன் ஒரு மோசக்காரன்; கொள்ளைக்காரன்; கொலைக்காரன் என்று எழுதி வைத்தான்.

அதைக் கேள்விப்பட்டு அங்கு வந்த கிரி, ""என் படத்தை நடுத்தெருவில் வைத்து அவமானம் செய்கிறாய். போலீசில் புகார் செய்வேன்,'' என்று கத்தினான்.

""இது என் படம் இல்லை என்று எழுதிக் கையெழுத்துப் போட்டு கொடுத்ததை மறந்து விட்டீர்களா? போலீஸ் என்னை என்ன செய்ய முடியும்?'' என்று கேட்டான் வாசு.

தன்னை நன்றாகப் பழி வாங்கி விட்ட வாசுவை எதுவும் செய்ய முடியாமல், மானத்தைக் காப்பாற்றிக் கொள்வதற்காக, ஐநூறு ரூபாயைக் கொடுத்து, படத்தை வாங்கிச் சென்றான் கிரி.

விஷயத்தை கேள்விப்பட்ட மக்கள் வாசுவை, "நீ சரியான ஆளுப்பா!' என்று சொல்லி பாராட்டினர்.

சிறுவர் மலர்