இஸ்ரோ சார்பில் "ரிசாட்-1'' புதிய செயற்கைகோள் 26-ந் தேதி விண்ணில் ஏவப்படுகிறது

**சிவா** · **சிவா** Tue Apr 24, 2012 1:31 pm

இஸ்ரோ சார்பில் தயாரிக்கப்பட்டுள்ள "ரிசாட்-1'' செயற்கைகோள் வருகிற 26-ந் தேதி ஸ்ரீஹரிகோட்டாவில் இருந்து பி.எஸ்.எல்.வி. ராக்கெட் மூலம் விண்ணில் ஏவப்படுகிறது. இதற்கான 71 மணிநேர கவுண்ட்டவுன் நேற்று தொடங்கியது.

புதிய செயற்கைகோள்

பெங்களூரில் இந்திய விண்வெளி ஆராய்ச்சி நிறுவனம் (ஐ.எஸ்.ஆர்.ஓ.) உள்ளது. இஸ்ரோ சார்பில் "ரிசாட்-1'' என்ற செயற்கைகோள் தயாரிக்கப்பட்டுள்ளது. ஸ்ரீஹரிகோட்டாவில் உள்ள சதீஷ்தவான் விண்வெளி ஏவுதளத்தில் இருந்து இந்த செயற்கைகோள் பி.எஸ்.எல்.வி.-சி19 என்ற ராக்கெட் மூலம் விண்ணில் செலுத்தப்படுகிறது.

இந்த செயற்கைகோளை வருகிற 26-ந் தேதி (வியாழக்கிழமை) மாலை 5.47 மணிக்கு விண்ணில் ஏவுவதற்கான அனுமதியை செயற்கைகோள் ஏவும் ஆணைய போர்டு அனுமதி வழங்கியுள்ளது.

கவுண்ட்டவுன் தொடங்கியது

இந்த செய்கைகோளை விண்ணில் செலுத்துவதற்கான 71 மணி "கவுண்ட்டவுன்'' நேற்று காலை 6.47 மணிக்கு தொடங்கியது. இடைப்பட்ட நேரத்தில் ராக்கெட்டிற்கு தேவைப்படும் எரிபொருள் போன்றவற்றை நிரப்பும் பணிகள் மேற்கொள்ளப்படும். மேலும் ராக்கெட்டை சோதனை செய்யும் பணிகளும் நடத்தப்படும்.

பேட்டரி சார்ஜ் செய்யும் பணி, ராக்கெட்டில் தேவையான பொருட்களை நிரப்பும் பணி போன்றவை சரிபார்க்கப்படும். ராடார் கருவிகள், தகவல் தொடர்புகள் போன்ற தரைப்பகுதியில் தயாராக உபகரணங்களும் பலமுறை சோதிக்கப்படும்.

நுட்பமான செயற்கைகோள்

4 நிலைகளை கொண்ட பி.எஸ்.எல்.வி.-சி19 ராக்கெட் மூலம் ஏவப்படும் ரிசாட்-1 செயற்கைகோள், 480 கிலோ மீட்டர் தொலைவில் வான்வெளியில் 97.552 டிகிரி சரிவான நிலையில் நிலை நிறுத்தப்படும். இந்த செயற்கைகோளை தயாரிக்க 10 ஆண்டுகளுக்கும் மேல் ஆகியுள்ளது.

நெடுந்தொலைவில், எளிதில் சென்றடைய இயலாத இடத்தில் தகவல்களை சேகரிக்கும் மிகவும் நுட்பமான செயற்கைகோள் இதுவாகும். இது பூமியில் மழை, வெயில், மேகமூட்டம், பனி மற்றும் புயல் போன்ற அனைத்து சீதோஷ்ணநிலையிலும் படம் எடுக்கும் திறன் கொண்டது ஆகும்.

இஸ்ரோ வெளியிட்டுள்ள அறிக்கையில் மேற்கண்ட தகவல் தெரிவிக்கப்பட்டு உள்ளது.

**சிவா** · **சிவா** Tue Apr 24, 2012 1:33 pm

ரிசாட்-1 செயற்கைகோளின் திட்ட இயக்குனர் தமிழகத்தை சேர்ந்த பெண் விஞ்ஞானி வளர்மதி

வியாழக்கிழமை அன்று, ரிசாட்-1 செயற்கை கோள் விண்ணில் ஏவப்படுவது தமிழகத்துக்கு பெருமை சேர்க்கும் நிகழ்ச்சியாகும். இந்த செயற்கைகோளின் திட்ட இயக்குனராக தமிழகத்தைச் சேர்ந்த பெண் விஞ்ஞானி என்.வளர்மதி பொறுப்பு ஏற்று இருப்பதே அதற்கு காரணம்.

பெங்களூரில் உள்ள ஐ.எஸ்.ஆர்.ஓ. மையத்தில் பணிபுரிந்துவரும் வளர்மதி, செயற்கை கோள் திட்ட இயக்குனராக பொறுப்பு வகிக்கும் தமிழகத்தின் முதல் பெண் விஞ்ஞானி ஆவார். அகில இந்திய அளவில் இந்த பணியை ஏற்கும் 2-வது விஞ்ஞானி இவர் என்ற பெருமையும் இவருக்குக் கிடைத்து உள்ளது.

கடந்த ஆண்டு, பெங்களூரைச் சேர்ந்த பெண் விஞ்ஞானி டி.கே.அனுராதா தலைமையில் ஜி சாட்-12 செயற்கை கோள் விண்ணில் ஏவப்பட்டது குறிப்பிடத்தக்கது.

தினத்தந்தி

இஸ்ரோ சார்பில் "ரிசாட்-1'' புதிய செயற்கைகோள் 26-ந் தேதி விண்ணில் ஏவப்படுகிறது

இஸ்ரோ சார்பில் "ரிசாட்-1'' புதிய செயற்கைகோள் 26-ந் தேதி விண்ணில் ஏவப்படுகிறது

Re: இஸ்ரோ சார்பில் "ரிசாட்-1'' புதிய செயற்கைகோள் 26-ந் தேதி விண்ணில் ஏவப்படுகிறது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக