இப்போதைக்கு அரசியலுக்கு வரமாட்டேன்: உதயநிதி ஸ்டாலின்

மதுரை, ஏப். 22: நான் சினிமாவுக்கு வருவேன் என நினைத்துக்கூட பார்த்ததில்லை, ஆனால் சினிமா தயாரிப்பாளராக, நடிகராகியுள்ளேன். "இப்போதைக்கு' அரசியலுக்கு வரமாட்டேன் என உதயநிதி ஸ்டாலின் தெரிவித்தார்.

"ஒரு கல் ஒரு கண்ணாடி' படத்தை தயாரித்து, அதில் கதாநாயகனாக நடித்துள்ள உதயநிதி ஸ்டாலின் மதுரையில் செய்தியாளர்களிடம் ஞாயிற்றுக்கிழமை அளித்த பேட்டி:

சினிமா தயாரிப்பில் மட்டுமே எனது கவனம் இருந்தது. பெரும்பாலான நடிகர்கள் எனது நெருங்கிய நண்பர்கள்.
அவர்களும், எனது குடும்பத்தினரும் ஊக்கப்படுத்தியதால் நடிக்க ஒப்புக் கொண்டேன். எனது முதல் படத்தில் பல்வேறு குறைகளை பத்திரிகைகள் சுட்டிக்காட்டியுள்ளன. அடுத்தபடம் முதல், அந்தக் குறைகளை நிவர்த்தி செய்ய முயற்சிப்பேன். தொடர்ந்து எனது சொந்த தயாரிப்பிலேயே நடிக்கத் திட்டமிட்டுள்ளேன். காமெடி கலந்த கதாபாத்திரத்திலேயே நடிப்பேன். எனது அடுத்த படத்திலும் நடிகர் சந்தானம் கண்டிப்பாக இருப்பார்.

பதவி வேண்டாம்: இன்னும் 5 ஆண்டுகளுக்கு சினிமா தயாரிப்பு, நடிப்பில் மட்டும் முழு கவனம் செலுத்துவேன். அரசியலுக்கு வரும் எண்ணம் இப்போதைக்கு இல்லை. அதே சமயம், எதிர்காலத்தில் என்ன நடக்கும் என்பதை இப்போதே சொல்ல முடியாது.
என்னை திமுக இளைஞரணி செயலாளராக்கப் போவதாக பத்திரிகைகளில் செய்திகள் வருகின்றன.
கட்சியில் உழைத்தவர்களுக்கு அந்தப் பதவி கொடுக்கப்பட வேண்டும். அந்தப் பதவியை எனக்குக் கொடுத்தாலும், ஏற்றுக்கொள்ள மாட்டேன்.

மதுரை திரையரங்கம் பிரச்னை: நான் நடித்த படத்தை தமிழ்நாடு முழுவதும் திரையரங்குகளில் வெளியிடுவதில் எவ்வித நெருக்கடியும் இல்லை. கூடுதல் கட்டணம் வசூலிக்கப்படுவதாக மதுரையிலுள்ள திரையரங்கில் போலீஸôர் நடவடிக்கை எடுத்ததாகக் கேள்விப்பட்டேன். கூடுதல் கட்டணம் வசூலித்திருந்தால் அது தவறு தான்.

எனது திரைப்படத்துக்கு கேளிக்கை வரிவிலக்கு கேட்டு நீதிமன்றத்தை அணுகியுள்ளேன். இது தொடர்பாக, முதல்வரிடம் கோரிக்கை வைக்கும் எண்ணம் இல்லை.

மதுரை திமுக நிர்வாகிகள் சந்திப்பு

மதுரையில் உதயநிதி ஸ்டாலினை, அவர் தங்கியிருந்த ஹோட்டலில் முன்னாள் அமைச்சர் பொன். முத்துராமலிங்கம், திமுக மாநகர் மாவட்டச் செயலாளரும், முன்னாள் எம்.எல்.ஏ.வுமான கோ. தளபதி, முன்னாள் மாநகர் மாவட்டச் செயலாளர் வேலுச்சாமி, இளைஞரணி செயலாளர் ஜெயராமன் மற்றும் சிலர் ஞாயிற்றுக்கிழமை காலை சந்தித்தனர்.

கடந்த வாரம் மதுரையில் மு.க. ஸ்டாலின் பங்கேற்ற இளைஞரணி நிர்வாகிகள் நேர்காணல் மற்றும் பொதுக்கூட்ட நிகழ்ச்சிகளிலும் இவர்கள் பங்கேற்றிருந்தனர். அந்தக் கூட்டத்தில் பங்கேற்காத மு.க. அழகிரியின் ஆதரவாளர்களுக்கு திமுக தலைமை நோட்டீஸ் அனுப்பியுள்ளது குறிப்பிடத்தக்கது.

தினமணி

ஆண்டியப்பா ஏன் இவனுகளுக்கு நடுவுல என்ன பெத்த ?