தூக்கு தண்டனையை எதிர்த்து கசாப் தாக்கல் செய்த மனு மீதான விசாரணை முடிந்தது

மும்பை: மும்பை தாக்குதல் வழக்கில் தனக்கு விதிக்கப்பட்ட மரண தண்டனையை ரத்து செய்யக் கோரி சுப்ரீம் கோர்ட்டில் கசாப் தாக்கல் செய்த மனு மீதான விசாரணை முடிந்து தீர்ப்பு ஒத்திவைக்கப்பட்டது. 2008ம் ஆண்டு நவம்பர் 26-ம் தேதி இரவு பாகிஸ்தானை சேர்ந்த அஜ்மல் கசாப் உட்பட 10 தீவிரவாதிகள் கராச்சியில் இருந்து படகு மூலமாக மும்பை வந்து சி.எஸ்.டி. ரயில் நிலையம், காமா மருத்துவமனை, தாஜ், டிரைடென்ட் ஓட்டல்கள் உட்பட முக்கிய இடங்களில் கண்மூடித்தனமாக துப்பாக்கிச் சூடு நடத்தினர். 3 நாட்கள் தெடர்ந்து நடந்த இந்த பயங்கர தாக்குதல் சம்பவத்தில் 166 பேர் கொல்லப்பட்டனர்.

பாதுகாப்பு படையினர் நடத்திய எதிர் தாக்குதலில் 9 தீவிரவாதிகள் சுட்டுக் கொல்லப்பட்டனர். கசாப் மட்டும் உயிருடன் பிடிபட்டான். இது தொடர்பான வழக்கை விசாரித்த மும்பை தனி நீதிமன்றம், கசாப்புக்கு தூக்கு தண்டனை விதித்து தீர்ப்பளித்தது. 2010-ம் ஆண்டு மே மாதம் 6-ம் தேதி இந்த தீர்ப்பு வழங்கப்பட்டது.
கடந்த ஆண்டு பிப்ரவரி 21-ம் தேதி மும்பை உயர் நீதிமன்றம் கசாப்புக்கு விதிக்கப்பட்ட மரண தண்டனையை உறுதி செய்தது. இந்திய தேசத்துக்கு எதிராக போர் தொடுத்தல், பாஸ்போர்ட் சட்டம், ரயில்வே சட்டம் உட்பட 19 சட்டப்பிரிவுகளின் கீழ் கசாப்பை குற்றவாளியாக கருதி உயர் நீதிமன்றம் தூக்கு தண்டனையை உறுதி செய்தது.

இதனை எதிர்த்து கசாப் உச்ச நீதிமன்றத்தில் மேல்முறையீடு செய்தான். ஆர்தர் ரோடு சிறையில் அடைக்கப்பட்டிருக்கும் அவன், சிறை அதிகாரிகளின் மூலமாக இந்த மனுவை தாக்கல் செய்தான். இந்த மனு மீது நீதிபதிகள் அப்தாப் ஆலம் மற்றும் சி.கே.பிரசாத் ஆகியோரை கொண்ட பெஞ்ச் இரண்டரை மாதங்களாக விசாரணை நடத்தியது. இந்த விசாரணை நேற்றுடன் முடிவுக்கு வந்தது. இதைத் தொடர்ந்து தேதி குறிப்பிடாமல் நீதிபதிகள் தீர்ப்பை ஒத்திவைத்தனர்.

கசாப் தனது மனுவில் இந்திய தேசத்துக்கு எதிராக தான் சதி செய்யவில்லை என்றும், போர் தொடுக்கவில்லை என்றும் குறிப்பிட்டிருந்தான். தன்னை ரோபோவை போல மூளை சலவை செய்து தாக்குதலுக்கு பயன் படுத்திவிட்டனர் என்றும், இளம் வயது கருதி தூக்குத் தண்டனையை ரத்து செய்ய வேண்டும் என்றும் கோரியிருந்தான். தனக்காக வாதாட திறமையான வக்கீலை நியமிக்க அனுமதிக்கப்படவில்லை என்றும் அவன் தெரிவித்திருந்தான். கசாப்புக்காக வாதாட சுப்ரீம் கோர்ட் மூத்த வழக்கறிஞர் ராஜு ராமச்சந்திரனை நியமித்திருந்தது குறிப்பிடத்தக்கது.


நன்றி

இவனுக்காக இன்னும் எவளவு செலவு செய்வாங்க

அடப் பாவிங்களா தூக்கில் போட விடுவீங்களா இல்லியான்னு கேட்டு தர்ணா செஞ்சு அந்த நீதிபதி கடைசியில் தொங்காம இருந்தா சரி.