தம்புள்ளை ஜும்ஆப்பள்ளிவாசல் சிங்கள பேரினவாதிகளால் உடைத்தழிப்பு

தம்புள்ளை ஜும்ஆப்பள்ளிவாசல் சிங்கள பேரினவாதிகளால் உடைத்தழிப்பு

தம்புள்ளை ஒரு புனித பூமி என்பதன் காரணமாக அங்கு இருக்கும் பள்ளிவாசலை அகற்றும் படி கூறி நேற்று பிக்குமார் ஆர்ப்பாட்டம் ஒன்றில் ஈடுபட்டுள்ளனர்.

கந்தலம பகுதியில் அமைந்திருக்கும் பள்ளிவாசலை அகற்றக் கோரியே மேற்படி ஆர்ப்பாட்டத்தை மேற்கொண்டதாக தெரிவிக்கப்படுகிறது

சுமார் 3000க்கும் மேற்பட்டோரைக் கொண்ட குழுவினர் பள்ளிவாசல் வளாகத்துக்குள் நுழைந்து கட்டுப்பாட்டுக்குள் வைத்திருந்தாகவும் பள்ளிவாசல் நிர்வாகிகள் தெரிவிக்கின்றனர்.

நேற்றுக் காலை தம்புள்ளையிலுள்ள ரங்கிரி தம்புள்ள விஹாரை ஒன்றில் ஒன்றுதிரண்ட சுமார் 3000க்கும் மேற்பட்ட பெரும்பான்மை இனத்தவர்கள் பௌத்த பிக்குகள் உட்பட அந்த விகாரையின் பிரதான தேரர் தலைமையில் பேரணியாகச் சென்று இப் பள்ளிவாசல் மீது கல் வீசித் தாக்கியதாகவும் பின்னர் பள்ளிவாசல் வளாகத்திற்குள் நுழைந்து தாக்குதலில் ஈடுபட்டுள்ளதுடன் பள்ளிவாசலை உடைக்கப்பட்டுள்ளதாக சம்பவத்தை நேரில் கண்டவர்கள் தெரிவிக்கின்றனர்.

சம்பவ இடத்தில் பொலிஸாரும் விசேட அதிரடிப் படையினரும் பாதுகாப்புக் கடமையில் ஈடுபட்டிருந்தபோதிலும் அவர்களது கட்டுப்பாட்டையும் மீறியே இச்சம்பவம் இடம்பெற்றுள்ளதாகவும் தெரிவிக்கப்படுகிறது.

இதன்காரணமாக நேற்று வெள்ளிக்கிழமை வழக்கமாக இடம்பெறும் ஜும்ஆ பிரசங்கமும் தொழுகையும் இடம்பெறவில்லை எனவும் தெரிவிக்கப்படுகிறது.

இது தொடர்பில் கண்டன அறிக்கை ஒன்றை அகில இலங்கை ஜம்இய்யதுல் உலமா வெளியிட்டுள்ளது.

அவ்வறிக்கையில் பாரிய அசம்பாவிதங்கள் எதுவும் ஏற்படாதிருக்கும் வகையிலும் பள்ளிவாசலைப் பாதுகாக்கும் நோக்கிலும் பிரார்த்தனைகளில் ஈடுபடுமாறு இலங்கை வாழ் முஸ்லிம்களைக் கோரியுள்ளதுடன் இச்சம்பவம் தொடர்பில் உரிய கவனம் செலுத்துமாறு கோரி உலமா சபையினால் ஜனாதிபதிக்கு அவசரக் கடிதம் ஒன்றும் அனுப்பி வைக்கப்பட்டுள்ளது.