அண்ட்ரோய்ட் பாவனையாளர்களுக்கு ஒரு நற்செய்தி

**முத்துராஜ்** · **முத்துராஜ்** Thu Apr 19, 2012 8:46 pm

கூகுள் தனது பாவனையாளர்களின் நீண்ட நாள் கோரிக்கையொன்றை நேற்று நிறைவேற்றியது.

ஆம், கூகுள் தனது அண்ட்ரோய்ட் இயங்குதளத்தின் மூலம் செயற்படும் சாதனங்களுக்கான குரோம் உலாவியின் சோதனைத் தொகுப்பினை நேற்று வெளியிட்டது.

இதன் மூலம் தனது பாவனையாளர்களின் நீண்டநாள் வேண்டுகோளை நேற்று நிறைவேற்றியது.

எனினும் அண்ட்ரோய்ட் இயங்குதள வரிசையின் கடைசித் தொகுப்பான 4.0 ' ஐஸ்கிரீம் சென்விச்' மூலம் இயங்கும் சாதனங்களுக்குமட்டுமே இக் குரோம் உலாவி செயற்படும்.
கணனிகளுக்கான தொகுப்பினைப் போலவே இதுவும் வேகமாகவும், இலகுவாகவும் உபயோகிக்கக் கூடியவாறு உருவாக்கப்பட்டுள்ளதாக கூகுள் தெரிவிக்கின்றது. மேலும் உங்கள் கணனியில் உள்ள குரோம் உலாவியில் 'புக்மார்க்' செய்யப்பட்டவை உங்கள் அண்ட்ரோய்ட் சாதனத்தில் உள்ள குரோம் உலாவியிலும் 'புக்மார்க்' செய்யப்படும் வசதியையும் இது கொண்டுள்ளது.

இதற்கு உங்கள் கூகுள் கணக்குகளை இணைப்பது மட்டுமே அவசியம்.

தற்போது சில நாட்டுப் பாவனையாளர்களுக்கு மட்டுமே இவ் உலாவியை அண்ட்ரோய்ட் சந்தையின் ஊடாக தரவிறக்கம் செய்துகொள்ளக்கூடியதாகவிருக்கும்.

எனினும் கூடியவிரைவில் மற்றைய நாட்டுப் பாவனையாளர்களும் இதனைப் பெறக்கூடியதாகவிருக்கும்.

தற்போது தினசரி 700,000 அண்ட்ரோய்ட் சாதனங்கள் உலகளாவிய ரீதியில் 'எக்டிவேட்' செய்யப்படுவதாக கூகுள் தெரிவிக்கின்றது.

இது கையடக்கத்தொலைபேசிச் சந்தையில் மிகப்பெரும் வளர்ச்சியாகும்.

இதேபோல கூகுள் குரோம் உலாவியும் அதிவேகமாக உலாவிச் சந்தையில் ஆதிக்கம் செலுத்தி வருகின்றது.

சுமார் 3 வருடங்களுக்கு முன்னரே இவை இரண்டும் சந்தைக்கு அறிமுகம் செய்யப்பட்டன.
அன்று முதல் அண்ட்ரோய்டில் குரோமின் தேவை தொடர்பில் வலியுறுத்தப்பட்டு வந்த நிலையில் நேற்றே கூகுள் இவ் வெளியீட்டை மேற்கொண்டுள்ளது.