பன்றி காய்ச்சலுக்கு கல்லூரி மாணவி பலி, 13 நாட்கள் தீவிர சிகிச்சைக்கு பின் இறந்தார்

பன்றி காய்ச்சலுக்கு விழுப்புரம் கல்லூரி மாணவி பரிதாபமாக இறந்தார்.

பன்றி காய்ச்சல்

தமிழகத்தில் சென்னை, கோவை உள்ளிட்ட பல்வேறு மாவட்டங்களில் கடந்த சில நாட்களாக பன்றி காய்ச்சல் வேகமாக பரவி வருகிறது. இதனை கட்டுப்படுத்த தமிழக அரசின் சுகாதாரத்துறை தீவிர நடவடிக்கை எடுத்து வருகிறது.

ஆஸ்பத்திரிகளில் பன்றி காய்ச்சலுக்கான தனி வார்டுகள் அமைத்து சிகிச்சை அளிக்க மருந்துகளுடன் டாக்டர்கள் தயார் நிலையில் இருந்து வருகின்றனர்.

இந்நிலையில் பன்றி காய்ச்சலுக்கு விழுப்புரத்தை சேர்ந்த கல்லூரி மாணவி ஒருவர் பலியானார். அதுபற்றிய விவரம் வருமாறு:-

கல்லூரி மாணவி பலி

விழுப்புரத்தில் காட்பாடி ரெயில்வே கேட் அருகில் இயங்கி வரும் தமிழ்நாடு சேமிப்பு கிடங்கு நிறுவனத்தில் மேலாளராக பணியாற்றி வருபவர் முருகன். இவருடைய சொந்த ஊர் கடலூர்.

இவருடைய மகள் நிவேதா (வயது 20). இவர் விழுப்புரம் அருகே உள்ள ஒரு தனியார் கல்லூரியில் பி.ஏ. முதலாம் ஆண்டு படித்து வந்தார். இவருக்கு கடந்த 2-ந் தேதி உடல்நிலை பாதிக்கப்பட்டது. கடுமையான காய்ச்சலால் அவதிப்பட்டு வந்த இவரை புதுச்சேரி காலாப்பட்டில் உள்ள ஒரு தனியார் ஆஸ்பத்திரியில் 4-ந் தேதி சிகிச்சைக்காக சேர்த்தனர்.

அங்கு அவருக்கு தீவிர சிகிச்சை அளிக்கப்பட்ட போதிலும் நிவேதாவின் உடல்நிலையில் எந்த வித முன்னேற்றமும் ஏற்படவில்லை. தொடர்ந்து காய்ச்சல் இருந்து வந்தது.

சென்னை ஆஸ்பத்திரியில்

இதனால் மேல்சிகிச்சைக்காக சென்னையில் உள்ள ஒரு தனியார் ஆஸ்பத்திரியில் கடந்த 6-ந் தேதி நிவேதா அனுமதிக்கப்பட்டார். அங்கு அவரது ரத்தத்தை டாக்டர்கள் பரிசோதனை செய்து பார்த்ததில் பன்றி காய்ச்சல் இருப்பது தெரியவந்தது.

இதனை தொடர்ந்து தீவிர சிகிச்சை பிரிவில் நிவேதா அனுமதிக்கப்பட்டு அவருக்கு தொடர்ந்து சிகிச்சை அளிக்கப்பட்டு வந்தது. 13 நாட்கள் தீவிர சிகிச்சை பெற்று வந்த நிலையில் நேற்று முன்தினம் இரவு 8.30 மணியளவில் சிகிச்சை பலனின்றி நிவேதா பரிதாபமாக இறந்தார்.

இதையடுத்து அவரது உடல் பாதுகாப்புடன் சென்னையில் இருந்து நேற்று அதிகாலை விழுப்புரம் கொண்டு செல்லப்பட்டு நேற்று மாலை அடக்கம் செய்யப்பட்டது.

தினதந்தி