உயிர் சேதம் இல்லை இந்தோனேசியாவில் மீண்டும் பூகம்பம்

இரா.பகவதி · இரா.பகவதி Tue Apr 17, 2012 4:23 pm

ஜகார்தா: இந்தோனேசியாவின் சுமத்ரா தீவில் நேற்று ஏற்பட்ட பூகம்பம் ரிக்டர் அளவுகோலில் 6.4 புள்ளியாக பதிவானது. உலக அளவில் அடிக்கடி பூகம்பம் ஏற்படும் நாடுகளில் ஒன்று இந்தோனேசியா. கடந்த 11ம் தேதி சுமத்ரா தீவின் பாண்டா ஏஸ் பகுதியில் கடல் பகுதியில் பயங்கர பூகம்பம் ஏற்பட்டது. ரிக்டரில் 8.7 புள்ளியாக பதிவான பயங்கர பூகம்பத்தால் இந்தியா உட்பட 28 நாடுகளுக்கு சுனாமி எச்சரிக்கை விடுக்கப்பட்டு, பின்னர் வாபஸ் பெறப்பட்டது. இதைத்தொடர்ந்து நில அதிர்வுகள் தொடர்ந்த வண்ணம் உள்ளன. எனினும், பெரிய அளவில் உயிர் சேதமோ பொருட்சேதமோ ஏற்படவில்லை.

இந்நிலையில், சுமத்ரா தீவில் நேற்று பூகம்பம் ஏற்பட்டது. இது ரிக்டரில் 6.4 புள்ளியாக பதிவானது. ஆனால், சுனாமி எச்சரிக்கை விடவில்லை. ஏனெனில், ரிக்டரில் 7 புள்ளிக்கு கீழ் ஏற்படும் பூகம்பம் மிதமானதாக கருதப்படுவதாக வானிலை மற்றும் புவியியல் ஏஜென்சி தெரிவித்தது. மேலும், பூகம்பத்தால் எந்தவொரு சேதமும் ஏற்படவில்லை என்று அதிகாரிகள் தெரிவித்தனர். கடந்த 2004ம் ஆண்டில் சுமத்ராவில் ஏற்பட்ட பயங்கர பூகம்பத்தால் சுனாமி ஏற்பட்டு இந்தியா உட்பட பல்வேறு நாடுகளைச் சேர்ந்த 1.7 லட்சம் பேர் பலியானது குறிப்பிடத்தக்கது.
நன்றி