காதலித்தல் தவறில்லை

முஹைதீன் · முஹைதீன் Tue Apr 17, 2012 1:03 pm

காதலித்தல் தவறில்லை

இளமையில்
பிச்சை போட்டதை
நினைத்துக் கொண்டே
முதுமையில்
பிச்சையெடுத்துக் கொண்டிருக்கின்றனர்
சில மூதாட்டிகள்..

இறந்து போன
தன் தந்தையை
நினைத்துக் கொண்டே
தன் நண்பனின்
தந்தையின் சவத்தைப் பார்த்து
அழுது புலம்புகின்றனர்
பல நண்பர்கள்..

உழைத்தால் பலனுண்டு
என்றும் தெரிந்தும் கூட
உழைக்க விரும்பாமல்
உறங்கிக் கொண்டே இருக்கிறார்கள்
எதிர்கால இந்தியாவைத் தாங்கும்
சில தூண்கள்..

விளை நிலத்தை வீடாக்கினால்
உண்ண உணவில்லை..
தெரிந்து கொண்டே-மண்ணை
மனையாக்கிக் கொண்டே இருக்கிறார்கள்
பல விவசாயிகள்..

குடி குடியைக் கெடுக்கும்
படித்துக் கொண்டே
குடித்துக் கொண்டிருக்கிறான்
குடிமகன்..

கல்வியின் அருமையை
அறிந்தும் கூட
கல்வி கற்க அனுப்பாமல்
வாரிசுகளை
கல் தூக்க அனுப்புகிறார்கள்
பல பாமரர்கள்..

காதலித்தல் தவறில்லை..
வாதாடிய மகள்கள்.,
காதலித்தல் தவறென
வாதாடிக் கொண்டிருக்கிறார்கள்
தத்தம் மகள்களிடம்..
-------------------------------------
http://www.madhumathi.com/2012/04/blog-post.html