காபூலில் நடந்த 18 மணி நேர தாக்குதல் முறியடிப்பு; 36 தீவிரவாதிகளும் கொல்லப்பட்டனர்

ஆப்கானிஸ்தான் தலைநகர் காபூலில் நடந்த தாக்குதல் 18 மணி நேர கடும் சண்டைக்குப்பின் முறியடிக்கப்பட்டு, 36 தீவிரவாதிகளும் கொல்லப்பட்டனர். பர்தா அணிந்த தற்கொலைப்படையினர் இந்த தாக்குதலில் ஈடுபட்டது குறித்து பரபரப்பான தகவல்கள் வெளியாகி உள்ளன.

ஆப்கானிஸ்தானில், அமெரிக்கா ஆதரவுடன் ஹமீது ஹர்சாய் தலைமையிலான ஆட்சி நடைபெற்று வருகிறது.

காபூல் முற்றுகை

அவருடைய ஆட்சிக்கு எதிராக தலீபான் தீவிரவாதிகள் தொடர்ந்து தாக்குதல் நடத்தி வருவதால், ஆப்கானிஸ்தான் பாதுகாப்பு படையினருக்கு ஆதரவாக அமெரிக்கா தலைமையிலான பன்னாட்டு நேட்டோ படைகள் அங்கு முகாமிட்டு உள்ளனர்.

இந்த நிலையில், நேற்று முன்தினம் மத்தியானம், ஆப்கானிஸ்தான் தலைநகர் காபூலை முற்றுகையிட்டு தலீபான் தீவிரவாதிகள் அதிரடி தாக்குதலில் ஈடுபட்டனர். அதே நேரத்தில் மூன்று மாகாணங்களைச் சேர்ந்த நகரங்களிலும் அவர்கள் தாக்குதலில் ஈடுபட்டனர்.

பாராளுமன்றம் மீது தாக்குதல்

பாராளுமன்றத்துக்கு அருகில் உள்ள `காபூல் ஸ்டார்' என்ற 5 நட்சத்திர ஓட்டலை அதிரடியாக கைப்பற்றிய தீவிரவாதிகள் அங்கிருந்து பாராளுமன்றம் மற்றும் வெளிநாட்டு தூதரகங்கள் மீது ராக்கெட் வீசியும் துப்பாக்கியால் சுட்டும் தாக்கினார்கள்.

ஜலாலாபாத், லோகர் மற்றும் பக்தியா ஆகிய மூன்று மாநிலங்களிலும் தாக்குதல் நடைபெற்றது. ஜலாலாபாத்தில் விமான நிலையம் தாக்குதலுக்கு உள்ளானது. காபூல் உள்பட தாக்குதல் நடந்த அனைத்து இடங்களிலும், நேட்டோ படைகளின் உதவியுடன் ஆப்கானிஸ்தான் பாதுகாப்பு படையினர் பதிலடி கொடுத்தனர்.

18 மணி நேர தாக்குதல்

நேட்டோ படையினர் பாதுகாப்பு படையினருக்கு உதவியாக ஹெலிகாப்டர்கள் மூலம் குண்டு வீசித் தாக்கினார்கள். நேற்று இரவு முழுவதும் நடந்த இத்தாக்குதல், நேற்று காலையும் தொடர்ந்தது. வெடிச்சத்தத்துடன்தான் நேற்றைய பொழுது விடிந்ததாக, காபூல்வாசிகள் தெரிவித்தனர். ஏறத்தாழ 18 மணி நேரத்துக்குப்பின் நேற்று ஆப்கான் நேரப்படி நேற்று காலை 7.20 மணிக்கு முடிவுக்கு வந்தது.

3 இடங்களில் நடைபெற்ற தாக்குதலில், தலைநகர் காபூல் போர்க்களமாக மாறி இருந்தது. கடைசி தீவிரவாதி கொல்லப்பட்டதும், முற்றுகை நீங்கி அந்த பகுதியில் அச்சம் கலந்த அமைதி நிலவியது. இதேபோல் மேலும் 3 மாகாணங்களில் நடைபெற்ற தாக்குதலையும், நேட்டோ படையினரின் உதவியுடன் ஆப்கானிஸ்தான் பாதுகாப்பு படையினர் முறியடித்தனர்.

36 தீவிரவாதிகளும் பலி

காபூலில் தாக்குதல் நடத்திய தற்கொலைப்படையினர் 36 பேரும் கொல்லப்பட்டு விட்டனர். மொத்தம் 47 பேர், இந்த சண்டையில் பலியானதாகவும், 65 பேர் காயம் அடைந்ததாகவும், ஆப்கானிஸ்தான் உள்துறை மந்திரி பிஸ்மில்லா மொகமதி தெரிவித்தார். பலியானவர்களில், ஆப்கன் பாதுகாப்பு படையினர் 8 பேர், பொது மக்கள் 3 பேர் என்றும் அவர் தெரிவித்தார்.

`பர்தா' அணிந்த தீவிரவாதிகள்

`வசந்தகால தாக்குதல்' என்ற பெயரில் தலீபான்கள் நடத்திய இந்த தாக்குதலில், தற்கொலை படை தீவிரவாதிகள் பங்கேற்றனர். அவர்களில் சிலர் பர்தா அணிந்து, தங்களுக்கு என இலக்கு நிர்ணயித்து ஒதுக்கப்பட்ட கட்டிடங்களுக்கு மலர்க்கொத்துடன் சென்றதாகவும், மந்திரி பிஸ்மில்லா கூறினார்.

முதன் முறையாக ஆப்கானிஸ்தான் பாதுகாப்பு படையினர் தலீபான் தாக்குதலை முறியடித்து விரட்டியடித்து இருப்பதாக நேட்டோ படைப்பிரிவின் செய்தித் தொடர்பாளர் குறிப்பிட்டார். அமெரிக்க ராணுவ தளபதி ஜெனரல் ஜாண் ஆலன், ஆப்கானிஸ்தானுக்கான அமெரிக்க தூதர் ரியான் குரோக்கர் ஆகியோரும் பாதுகாப்பு படையினருக்கு பாராட்டு தெரிவித்தனர்.

அச்சம் அகன்றது

ஆப்கானிஸ்தானில் தலீபான் தீவிரவாதிகளின் ஆட்சி அகற்றப்பட்டு புதிய அரசு அமைந்தபிறகு, நேட்டோ படையினர் படிப்படியாக வாபஸ் பெறப்பட்டு வருகிறார்கள். அங்குள்ள 1 லட்சத்து 30 ஆயிரம் வீரர்களும் 2014-ம் ஆண்டு இறுதிக்குள் ஆப்கானிஸ்தானை விட்டு வெளியேற முடிவு செய்யப்பட்டு இருந்தது.

இந்த நிலையில், தலீபான் தீவிரவாதிகள் திடீரென நடத்திய அதிரடி தாக்குதல், நாட்டின் பாதுகாப்பு குறித்த அச்சத்தை ஏற்படுத்தி இருந்தது. ஆனால், தாக்குதல் வெற்றிகரமாக முறியடிக்கப்பட்டதன் மூலம் அந்த அச்சம் அகன்று உள்ளது.

இதற்கிடையில், ஆப்கானிஸ்தான் 2-வது துணை ஜனாதிபதி கரீம் கலிலியை கொல்ல சதித்திட்டம் தீட்டிய இரு தற்கொலைப்படை திவிரவாதிகள் கைது செய்யப்பட்டு இருப்பதாக, அதிகாரிகள் தெரிவித்தனர்.

தினதந்தி

`வசந்தகால தாக்குதல்' நல்ல பெயர்...

என்ன கொள்கையோ... எதுக்கு இவனுங்களுக்கு இப்படி ஒரு வாழ்க்கை ..

பிளேடு பக்கிரி wrote:`வசந்தகால தாக்குதல்' நல்ல பெயர்...
என்ன கொள்கையோ... எதுக்கு இவனுங்களுக்கு இப்படி ஒரு வாழ்க்கை ..

என்னத்த சொல்ல .....