உறுதியாக சொல்லுங்கள்

மத்திய அரசாங்கம், மின்சார உற்பத்திக்கு மிக முக்கியமான முதலிடத்தைக் கொடுத்து, நாட்டில் எங்கெல்லாம் மின்சார நிலையங்களை தொடங்க முடியுமோ, அங்கெல்லாம் தொடங்குவதற்கான ஏற்பாடுகளை போர்க்கால அடிப்படையில் உடனடியாக எடுக்கவேண்டிய கட்டாய அவசியத்தில் இருக்கிறது. நாட்டில் பல மாநிலங்களில் மின்சாரம் பற்றாக்குறையாக உள்ளது. தமிழ்நாடு போன்ற வளர்ந்து வரும் மாநிலங்கள் மிக கடும் மின்சாரவெட்டை சந்தித்துக்கொண்டிருக்கின்றன. மத்திய அரசாங்கமும், பூடான் போன்ற பக்கத்து நாட்டில் இருந்து இதுவரை மின்சாரத்தை வாங்கிக்கொண்டிருந்தது. பூடான் நாடு நீர்வளம் மிக்க நாடு. அங்குள்ள நீர் ஆதாரத்தை கணக்கிட்டால் 30 ஆயிரம் மெகாவாட் மின்சார உற்பத்தி செய்வதற்கான வாய்ப்பு இருக்கிறது.

இதனால்தான், இந்திய பொதுத்துறை நிறுவனங்களான தேசிய புனல் மின்சார கழகமும் (என்.எச்.பி.சி.), தேசிய அனல் மின்சார கழகமும் (என்.டி.பி.சி.) பூடானில் உள்ள நீர்மின் நிலையங்களில் முதலீடு செய்துள்ளன. அவர்கள் நோக்கம், இந்த நிலையங்களை அங்கு தொடங்கினால் அங்கிருந்து கூடுதலாக மின்சாரத்தை இந்தியாவுக்கு அனுப்பலாம் என்பதுதான்.

இந்த நிலையில், பூடான், இந்தியாவுக்கு வழங்கும் மின்சார ஏற்றுமதியை குறைத்துள்ளது. கடந்த ஆண்டு 6,500 மில்லியன் யூனிட்டை இந்தியாவுக்கு, பூடான் அனுப்பியது. ஆனால், இந்த ஆண்டு அங்குள்ள நிலைமையைக் கருத்தில் கொண்டு 5,480 மில்லியன் யூனிட்தான் அனுப்பமுடியும் என்று எதிர்பார்க்கப்படுகிறது. தமிழ்நாடு போதிய நீர்ஆதாரங்கள் இல்லாமல், புனல் மின்சார நிலையங்களை தொடங்கமுடியாத நிலையில், அனல் மின்சார நிலையங்களை மட்டுமே நம்பிக்கொண்டிருக்கிறது. தற்போது 12,500 மெகாவாட் மின்சாரம் தேவையான நிலையில், 8,500 மெகாவாட்தான் இங்கு உற்பத்தி செய்யப்படுகிறது. அங்கும், இங்குமாக வாங்குவதில் 500 மெகாவாட் தேறுகிறது. எப்படி கூட்டிக்கழித்துப்பார்த்தாலும், 3,500 மெகாவாட் மின்சாரம் பற்றாக்குறையாக இருக்கிறது.

இந்த சூழ்நிலையில், கூடங்குளம் அனல் மின்நிலையத்தின் முதல் யூனிட் உற்பத்தி 45 நாட்களில் தொடங்கும் என்று மத்திய மந்திரி நாராயணசாமி தெரிவித்துள்ளார். கூடங்குளத்தில் முதல் யூனிட்டில் 1000 மெகாவாட் மின்சாரம் கிடைக்கும். 2-வது யூனிட் 2 மாதங்களில் தொடங்கும் என்று மத்திய மந்திரி அறிவித்துள்ளார். ஆக, அடுத்த 2 மாதங்களில் 2000 மெகாவாட் மின்சாரம் கூடங்குளத்தில் கிடைக்கும். `கூடங்குளம் அனல்மின் நிலையம் மிகவும் ஆபத்தானது, எங்களுக்கு வேண்டவே வேண்டாம்' என்று அந்தப்பகுதி மக்கள் பயந்து அலறி, போராட்டம் நடத்திய காலத்தில், `இல்லை, இல்லை, இந்த அனல்மின்நிலையம் பாதுகாப்பானதுதான், உங்களுக்கு ஒன்றும் நேராது' என்று மத்திய அரசாங்கமும், மாநில அரசும் சொன்னதைக் ஏற்றுக்கொண்டு, இப்போது போராட்டம் வலுவிழந்துவிட்டது. அந்த போராட்ட நேரத்தில் மத்திய அரசாங்கம், கூடங்குளம் மின்சார நிலையம் உற்பத்தி தொடங்கினால், தமிழ்நாட்டுக்கு அதிகளவு மின்சாரம் கொடுப்போம், 1000 மெகாவாட் கொடுப்போம் என்றெல்லாம் கூறினார்கள். கடற்கரை மணலை கயிறாக திரிக்கவேண்டாம். ஆனால், கடற்கரையில் அமைந்துள்ள கூடங்குளம் அனல்மின் நிலையத்தின் முதல் 2 யூனிட்டில் உற்பத்தியாகும் மின்சாரத்தையும், அதாவது 2000 மெகாவாட் மின்சாரத்தையும் தமிழ்நாட்டுக்கே வழங்கினால்தான், தமிழக மக்களுக்கு ஓரளவு மனநிறைவு கிடைக்கும்.

ஏற்கனவே முதல்-அமைச்சர் ஜெயலலிதா 2000 மெகாவாட் வேண்டும் என்று கூறியிருக்கிறார். ஆனால், இப்போது மத்திய அரசாங்கம் ஏதேதோ கதை சொல்கிறது. இத்தகைய அனல் மின் நிலையங்களில் இருந்து அந்தந்த மாவட்டத்துக்கு எவ்வளவு மின்சாரம் கொடுப்பது என்பதற்காக ஒரு கொள்கை இருக்கிறது என்றெல்லாம் கதை சொல்கிறார்கள். இதெல்லாம் எடுபடாது. எத்தனையோ ஆபத்துக்கள் வந்துவிடும் என்று அச்சுறுத்திய நிலையிலும், மக்கள் இதை ஏற்றுக்கொண்டிருக்கிறார்கள். இனி 45 நாட்கள் இருக்கும் நிலையில், மத்திய அரசாங்கம், தமிழக அரசுக்கு மிக தெளிவாக எவ்வளவு மின்சாரத்தை தரப்போகிறோம் என்று உறுதி அளிக்கவேண்டும். முதல்-அமைச்சரும், தமிழக மக்களும் கோருகிற வகையில், 2000 மெகாவாட்டை தரும் உறுதியை அளிக்கவேண்டும். `ரிஸ்க்' எங்களுக்கு, மின்சாரம் எங்களுக்கு இல்லையா? என்று தமிழகத்தில் குரல் எழும்பிவிட்டது. இதுபோல, மற்ற மாநிலங்களில் என்.டி.பி.சி. சார்பில் அனல்மின்சார நிலையங்கள் தொடங்கப்பட்டுள்ளதுபோல, தமிழ்நாட்டிலும் மரக்காணம் மற்றும் செய்யூரில் ஏற்கனவே திட்டமிட்டு கைவிடப்பட்ட என்.டி.பி.சி. மின்சார நிலையங்களை உடனடியாக தொடங்க, மத்திய அரசாங்கம் நடவடிக்கை எடுக்கவேண்டும்.

தினதந்தி