பெற்றோர்கள் எதிர்ப்பு! காதல் ஜோடி தற்கொலை! தாலிகட்டி திருமணம்' நடத்தி ஒரே இடத்தில் புதைத்தனர்!

புதுவை தவளக்குப்பம் அருகே புதுக்காலனியை சேர்ந்தவர் ஏழுமலை. இவரது மகன் லிங்கேஷ்வரன் (வயது 29). இவரும், அதே பகுதியை சேர்ந்த பிளஸ் 2 மாணவியான கர்ணகி (20) என்பவரும் காதலித்து வந்தனர்.

இவர்களது காதலை பெற்றோர் ஏற்றுக்கொள்ளவில்லை. இதையும் மீறி காதலர்கள் பல்வேறு இடங்களில் சுற்றி திரிந்து தங்கள் காதலை வளர்த்தனர். இதற்கு கர்ணகியின் வீட்டில் கடும் எதிர்ப்பு தெரிவிக்கப்பட்டது.

இதைத்தொடர்ந்து கடந்த சில நாட்களுக்கு முன்பு கர்ணகி வீட்டை விட்டு வெளியேறி காதலன் வீட்டிற்கு வந்தார். அங்கும் எதிர்ப்பு கிளம்பவே காதலனும், காதலியும் வீட்டை விட்டு வெளியேறி புதுவையில் பல்வேறு இடங்களில் சுற்றி திரிந்தனர்.

கடந்த வெள்ளிக்கிழமை சுண்ணாம்பாறு படகு குழாம் அருகே உள்ள ஒரு சவுக்கு தோப்பில் அவர்கள் தூக்குப்போட்டு தற்கொலை செய்துகொண்டனர். இதுகுறித்து தவளக்குப்பம் போலீசார் வழக்குப்பதிவு செய்து விசாரணை நடத்தினார்கள்.

இந்த நிலையில் புதுவை அரசு ஆஸ்பத்திரியில் பிரேத பரிசோதனை செய்தபின் அவர்களது உடலை வாங்க இருதரப்பு பெற்றோரும் வரவில்லை. எனவே ஊர் முக்கிய பிரமுகர்களும், காதல் ஜோடியின் நண்பர்களும் உடல்களை பெற்று சென்றனர்.

கர்ணகியின் உடலை அவரது பெற்றோர் ஏற்றுக்கொள்ளவில்லை. பின்னர் லிங்கேஷ்வரனின் பெற்றோர் சமாதானம் அடைந்தனர். இதைத்தொடர்ந்து லிங்கேஷ்வரன் மற்றும் கர்ணகியின் உடல்கள் லிங்கேஷ்வரனின் வீட்டிற்கு எடுத்து செல்லப்பட்டன.

வாழ்வில் ஒன்றுசேர முடியாத அவர்களுக்கு மரணத்துக்கு பின்னராவது திருமணம் செய்துவைப்பது என்று நண்பர்கள் முடிவு செய்தனர். அதன்படி லிங்கேஷ்வரனின் கையில் தாலியை வைத்து அதை கர்ணகியின் கழுத்தில் கட்டினார்கள்.

பின்னர் 2 பேரின் உடல்களையும் ஒரே பாடையில் வைத்து ஒன்றாக ஊர்வலமாக எடுத்துச்சென்று இடுகாட்டில் ஒரே குழியில் கண்ணீர் மல்க அடக்கம் செய்தனர்.

வாழ்வில் ஒன்றுசேர முடியாத காதல் ஜோடி சாவிலாவது ஒன்றாக இணைந்திருக்கட்டும் என்று இந்த முடிவினை எடுத்ததாக அவர்களது நண்பர்கள் தெரிவித்தனர்.

நக்கீரன்.

சாவு ஒன்று தான் தீர்வா எங்கையாவது போயி வாழ்ந்துருக்க வேண்டியது தானே