புதிய சர்ச்சையில் குடியரசுத் தலைவர்!

ஹர்ஷித் · ஹர்ஷித் Fri Apr 13, 2012 12:42 pm

குடியரசுத் தலைவர் பிரதிபா பாட்டீல் ஓய்வு பெற்றவுடன் வசிக்க திட்டமிட்டுள்ள இல்லம் தொடர்பாக சர்ச்சை எழுந்துள்ளது.
குடியரசுத் தலைவர் பிரதிபா பாட்டீல் வரும் ஜுலை மாதத்தில் ஓய்வு பெறுகிறார். ஓய்வுக்குப் பிறகு அவர் வசிக்க புணேயில் புதிய இல்லம் தயாராகி வருகிறது.
இந்நிலையில் பிரதிபா பாட்டீல் வசிக்க 5 ஏக்கர் நிலம் ஒதுக்கப்பட்டுள்ளதாக ஓய்வு பெற்ற ராணுவத்தினர் அமைப்பு ஒன்று குற்றம்சாட்டியுள்ளது.
"ஜஸ்டிஸ் ஃபார் ஜவான்' என்ற அமைப்பைச் சேர்ந்த ஓய்வு பெற்ற ராணுவ அதிகாரி சுரேஷ் பாட்டீல், "புணேயில் உள்ள கட்கி கண்டோன்மென்டில் 2.60 லட்சம் சதுர அடி நிலம் இதற்காக ஒதுக்கப்பட்டுள்ளது.
4500 சதுர அடியில் வீடு ஒன்றும் கட்டப்பட்டு வருகிறது. இதற்காக பிரிட்டிஷார் காலத்தில் கட்டப்பட்ட இரண்டு மாளிகைகள் இடிக்கப்பட்டுள்ளன.
பிரதிபா வசிக்க உள்ள இடத்தை காக்க இவ்வளவு பெரிய நிலப்பரப்பில் ஏன் வேலியமைக்கப்பட்டுள்ளது' என்று கேள்வியெழுப்பினார்.
எனினும், இந்த விஷயத்தில் விதிகள் ஏதும் மீறப்படவில்லை என்று குடியரசுத் தலைவர் மாளிகை வட்டாரங்கள் தெரிவித்தன. பிரதிபா பாட்டீல் ஓய்வுக்குப் பிறகு வசிக்க உள்ள இல்லம் தொடர்பாக அனைத்து விதிகளும் முறைப்படி கடைப்பிடிக்கப்படுகின்றன.
இது தொடர்பான விதிகளின்படி, குடியரசு முன்னாள் தலைவர் அவரது விருப்பத்திற்கு ஏற்ப இந்தியாவில் எந்தப் பகுதியிலும் மாளிகையில் வசிக்க உரிமை உண்டு. அரசு நிலம் உள்ள பகுதிகளில் வசிப்பதென்றால், மத்திய அமைச்சர்கள் வசிக்கும் மாளிகைகளுக்கு இணையானதாக அது இருக்க வேண்டும்.
அப்பகுதியில் அரசு நிலம் இல்லையெனில், 4,500 சதுர அடிக்கு மிகாமல் இல்லம் அமையவேண்டும். அதில் 2 ஆயிரம் சதுர அடிக்கு மிகாமல் வசிக்கும் பகுதி இருக்க வேண்டும்.
குடியரசுத் தலைவராக இருந்து ஓய்வு பெற்றவர் இறந்துவிட்டால் அவரது வாழ்க்கைத் துணைக்கு அந்த இல்லத்தில் வசிக்க உரிமை உண்டு என்று அந்த விதிகளில் கூறப்பட்டுள்ளது.
5 ஏக்கர் நிலம் முழுவதற்கும் வேலி அமைக்கப்பட்டது ஏன் என்று கேட்டு ராணுவத்தின் தெற்குப்பிரிவு தலைமையகத்துக்கு தகவல் அறியும் உரிமை சட்டத்தின்கீழ் கேட்கப்பட்ட கேள்விக்கு பதிலில்லை என்று சுரேஷ் பாட்டீல் தெரிவித்தார்.
இந்த விஷயம் தொடர்பாக பதிலளித்த குடியரசுத் தலைவர் மாளிகையின் செய்தித் தொடர்பாளர் அர்ச்சனா தத்தா, "அந்த நிலம் ராணுவத்துக்கு சொந்தமானது. அந்த இல்லம் குடியரசுத் தலைவர் வாழும் வரை அவரது வசமிருக்கும். பிறகு ராணுவத்திடம் ஒப்படைக்கப்படும்' என்றார்.
அந்தப் பகுதியில் புதியதாக கட்டுமானப் பணி ஏதும் நடைபெறவில்லை. புதுப்பிக்கும் பணிகள் மட்டுமே நடைபெறுகின்றன. அந்த பகுதியைச் சுற்றி அதிகளவிலான நிலம் வேலியமைக்கப்பட்டுள்ளது தொடர்பான கேள்விக்கு பாதுகாப்பு அமைச்சகம்தான் பதிலளிக்க வேண்டும்.
இந்த விஷயத்தில் விதிகள் ஏதும் மீறப்படவில்லை என்று மட்டும் தெரிவித்துக் கொள்கிறேன் என்று அவர் தெரிவித்தார்.
http://www.dinamani.com

அசுரன் · அசுரன் Fri Apr 13, 2012 12:45 pm

இருக்கும் போது ஒன்னும் சாதிக்கல, ஆனா போகும்போது 5 ஏக்கர்ல வீடா? ஒன்னும் புரியல

அதி · அதி Fri Apr 13, 2012 12:46 pm

இருப்பவர்களுக்கே மேலும் மேலும் கொடுப்பது எப்படி என்பதைப் பற்றித்தான் அதிகம் யோசிப்பார்கள் போல

இரா.பகவதி · இரா.பகவதி Fri Apr 13, 2012 1:40 pm

இப்ப இவங்க என்ன செஞ்சி பூட்டாங்கணு இவ்வளவு கொடுக்குரங்க , பதவியில இருக்கும் பொது தான் இலவசமா உலகம்புறான் சுத்துனங்க, இன்னும் எவ்வளவு பொது சொத்தை எடுக்க போரங்களோ அநியாயம்