ஏமனில் அல்-கய்தா தாக்குதல்: பலி எண்ணிக்கை 64 ஆக உயர்வு

**சிவா** · **சிவா** Wed Apr 11, 2012 8:14 am

ஏமன் நாட்டு அதிபராக, 33 ஆண்டுகளாக பதவி வகித்த அலி அப்துல்லா சலேவை பதவி விலக கோரி, ஓராண்டுக்கும் மேலாக மக்கள் போராட்டம் நடத்தினர். இதைத் தொடர்ந்து சலே பதவி விலகினார். தற்போது காபட்ரபோ மன்சூர் ஹாடி புதிய அதிபராக உள்ளார். இந்நிலையில், ஏமனில் தற்போது அல்- கய்தா தீவிரவாதிகளின் அட்டகாசம் அதிகரித்துள்ளது.

ஏமன் நாட்டின் தென்கிழக்கு பகுதியில் அபுயான் மாகாணத்தில் உள்ள ராணுவ முகாம் மீது அல் கொய்தா தீவிரவாதிகள் திடீர் தாக்குதல் நடத்தினர். இதை முறியடிக்க ராணுவத்தினர் பதிலடி கொடுத்தார்கள். இரு தரப்பினர் இடையே கடுமையான துப்பாக்கி சண்டை நடந்தது.

இதில் 24 பேர் பலியானதாக முதலில் தகவல் வெளியானது. இந்த மோதலில் பலியானவர்கள் எண்ணிக்கை 64 ஆக உயர்ந்திருப்பதாக தற்போது தகவல் கிடைத்துள்ளது. 40 தீவிரவாதிகளும், 18 ராணுவ வீரர்களும், அப்பாவி பொதுமக்கள் 6 பேரும் உயிரிழந்துள்ளனர்.

மாலைமலர்