தமிழகத்தில், இதுவரை, ஒரு வாடிக்கையாளர் கூட,ஐந்து கிலோ சிலிண்டர் திட்டத்தில் இணையவில்லை.

மானிய விலை, ஐந்து கிலோ காஸ் சிலிண்டர் திட்டத்தில், இதுவரை, ஒரு வாடிக்கையாளர் கூட இணையவில்லை.

தமிழகத்தில், பொதுத்துறையை சேர்ந்த இந்தியன் ஆயில், பாரத், இந்துஸ்தான் ஆகிய மூன்று எண்ணெய் நிறுவனங்களுக்கு, 1.52 கோடி சமையல் காஸ் சிலிண்டர் வாடிக்கையாளர் உள்ளனர்.

வரவேற்பு இல்லை:

இந்நிறுவனங்கள், வீடு (14.20 கிலோ); வணிகம் (19 கிலோ) என, இரண்டு வகை, காஸ் சிலிண்டர்களை வினியோகம் செய்கின்றன. சென்னை, டில்லி, கோல்கட்டா, மும்பையில், ஐந்து கிலோ சிலிண்டர் விற்கும் திட்டத்தை, மத்திய அரசு, 2013ல் துவக்கியது. சிலிண்டர், ரெகுலேட்டர், ரப்பர் குழாய் என, ஐந்து கிலோ சிலிண்டர் விலை, 2,140 ரூபாய்.

மத்திய அரசு, 14.20 கிலோ எடை கொண்ட வீட்டு சிலிண்டருக்கு மானியம் வழங்கியது போல், ஐந்து கிலோவிற்கு வழங்கவில்லை. இதனால், வீட்டு விலையை விட, ஐந்து கிலோ சிலிண்டர் விலை அதிகமாக இருந்ததால், மக்களிடம் வரவேற்பு கிடைக்கவில்லை. இந்நிலையில்,

மானிய விலையில், ஆண்டுக்கு, 34 ஐந்து கிலோ சிலிண்டர்களை விற்பனை செய்யும் திட்டத்தை, மத்திய அரசு, கடந்த பிப்., மாதம், தமிழகம் உட்பட, பல மாநிலங்களில் துவக்கியது. மானிய விலையில், ஐந்து கிலோ காஸ் சிலிண்டர் இணைப்பு பெற, வாடிக்கையாளர், முகவரி மற்றும் அடையாள சான்றிதழ்; வைப்பு தொகை, 350 ரூபாய்; ரெகுலேட்டர், 150 ரூபாய் ஆகியவற்றை, காஸ் ஏஜன்சிகளிடம் வழங்க வேண்டும். அவர்களுக்கு, மானிய விலையில், ஓர் ஆண்டிற்கு, 34சிலிண்டர்கள் வினியோகம் செய்யப்படும்.


புதிதாக...:

ஏற்கனவே, 14.20 கிலோ எடை கொண்ட, சிலிண்டர் பயன்படுத்தும் வாடிக்கையாளர்கள், ஐந்து கிலோ திட்டத்திற்கு மாற விரும்பினால், பழைய இணைப்பை, ஏஜன்சிகளிடம் ஒப்படைத்து, ஐந்து கிலோ சிலிண்டருக்கு, புதிதாக விண்ணப்பிக்க வேண்டும். ஒரு வாடிக்கையாளர், மானிய விலையில், 14.20 கிலோ அல்லது, ஐந்து கிலோ சிலிண்டர் என, இரண்டில், ஒன்றில் மட்டும் இருக்க முடியும். தற்போது, சென்னையில், மானிய விலை, ஐந்து கிலோ சிலிண்டர் விலை, 223 ரூபாய்.

இதில், 72 ரூபாயை, வாடிக்கையாளர் வங்கி கணக்கில், அரசு, மானியமாக வழங்குகிறது. ஆனால், தமிழகத்தில், இதுவரை, ஒரு வாடிக்கையாளர் கூட, மானிய விலை, ஐந்து கிலோ சிலிண்டர் திட்டத்தில் இணையவில்லை.

இதுகுறித்து, எண்ணெய் நிறுவன அதிகாரி ஒருவர்கூறியதாவது:

மானிய விலை, ஐந்து கிலோ சிலிண்டர் சிவப்பு நிறம்; மானியம் அல்லாத சிலிண்டர் நீல நிறத்தில் விற்கப்படுகிறது. இதில், மானியம் அல்லாத சிலிண்டரை, வாடிக்கையாளர் இஷ்டம் போல் வாங்கி கொள்ளலாம். மானிய விலை, ஐந்து கிலோ சிலிண்டர் திட்டத்தில் இணைந்தால், ஒரு மாதத்திற்கு, மூன்று முறை பதிவு செய்ய வேண்டும். ஏஜன்சி ஊழியர், சிலிண்டரை கொண்டு வரும் போது, வீட்டில் எந் நேரமும் ஆட்கள் இருக்க வேண்டும். இதை யாரும் விரும்பாததால், இத்திட்டத்தில், மக்கள் இணையாமல் உள்ளனர். இவ்வாறு, அவர் கூறினார்.


தினமலர்.