இரக்கம் உள்ளவராய் இருங்கள்

by **சிவா** Sat Apr 07, 2012 11:59 pm

இந்த உலகினில், நாம் வாழும் பொழுது எப்படி வாழ்வது என்று அறியாமலேயே நாம் நமது வாழ்க்கையைக் கடத்துகின்றோம். பிறர் நம்மைப் புகழ்ந்து பேசினால் மகிழ்ச்சி அடைகின்றோம். நமக்கு இடையூறு செய்பவர்களை வெறுக்கின்றோம்.

பைபிளின் புதிய எற்பாடு, உலக வாழ்க்கையில் நாம் அறிந் கொள்ள வேண்டிய ஞானத்தை எடுத்துரைக்கின்றது.

புதிய ஏற்பாடு லூக்காக 6:26ல் எல்லா மனுஷரும் உங்களைக் குறித்து முகஸ்துதியாய்ப் (புகழ்ச்சியாய்) பேசும் போது உங்களுக்கு ஐயோ ஆபத்து! என்று இடித்துரைத்து மானுடரே! நீங்கள் யாவரும் புகழ்ச்சியை விரும்பாதிருங்கள் என்று எடுத்துக் கூறுகின்றது.

அதேபோன்று நாம் நம்மைச் சபிக்கின்றவர்களை வெறுக்கின்றோம். நம்மைப் பகைக்கின்றவர்களை வெறுக்கின்றோம். நம்மிடம் பொருள், பணம் ஆகியவற்றைக் கேட்பவர்களுக்கு உடனே அதைக் கொடுப்பதற்கு மனம் வராமல் தயங்குகின்றோம். லூக்கா, புதிய ஏற்பாடு வசனம் 6:27-28 ல் உங்கள் சத்துருக்களை சிநேகியுங்கள்.

உங்களைப் பகைக்கிறவர்களுக்கு நன்மை செய்யுங்கள். உங்களைப் புறங் கூறுபவர்களை ஆசிர்வதியுங்கள். உங்களை நிந்திக்கிறவர்களுக்காக ஜெபம் பண்ணுங்கள் என்றுரைக்கின்றார். இப்படிச் செய்வதால் நமது மனம் நிம்மதி அடைகின்றது.

வீடு, அலுவலகம், பொது இடங்கள் ஆகியவற்றில் பல்வேறு பிரச்சினைகளை, எதிர்ப்புகளை அவமானங்களை எதிர்கொள்வோருக்கு பைபிளின் புதிய ஏற்பாடு வாழும் நல்வழியை எடுத்தியம்புகின்றது.

உன்னை ஒரு கன்னத்தில் அறைகிறவனுக்கு மறு கன்னத்தையும் காட்டு.

உன் அங்கியை (பொருளை) எடுத்துக் கொள்ளுகிறவனுக்கு, உன் வஸ்திரத்தை (அதிகமான பொருளை)யும் எடுத்துக் கொள்ளத் தடை பண்ணாதே (லூக்கா 6:29) இது என்னவென்றால் நல்லவர்கள், தீயவர்கள் எல்லோருக்கும் பெய்யும் மழைபோல நமது சுபாவம் அமைதல் வேண்டும் என்பதாகும்.

மற்றும் “உன்னிடத்தில் (உதவி) கேட்கிற எவனுக்கும் வேண்டியவன், வேண்டாதவன் என்று பாராமல் கொடு, உன்னுடையதை எடுத்துக் கொள்ளுகிறவனிடத்தில் அதைத் திரும்பக் கேட்காதே” (லூக்கா 6:30) பிறர் தரும் தீமையை எதிர்த்து நிற்காமல் அதை நன்மையாகப் பாவித்து, பிறருக்கு நன்மை செய்திட பைபிள் வலியுறுத்துகின்றது.

தீமையை எதிர்த்துப் போராடும் போது மேலும் தீமைகளைக் செய்திட வேண்டி வரும். ஆனால் நன்மையையும், தீமையையும் ஒன்றாகப் பாவித்து மேன்மேலும் நன்மைகள் செய்து நாம் மகிழ்வடைந்தால், தீமையை மறந்திடலாம்.

இப்படி நாம் வாழ்க்கையை நடத்துவதால் நமக்கு வரும் நன்மை, பலன் என்ன? புதிய எற்பாடு, லூக்கா எழுதிய வசனங்கள் 6:35ல், உங்கள் சத்துருக்களை சிநேகியுங்கள்; நன்மை செய்யுங்கள், கைம்மாறு (பதில் உதவி) கருதாமல் கடன் கொடுங்கள். அப்பொழுது உங்கள் பலன் (சந்தோஷம்) மிகுதியாயிருக்கும்; உன்னதமானவருக்கு (இறைவனுக்கு) பிள்ளைகளாயிருப்பீர்கள்” என்கிறார்.

நாம் மகிழ்ச்சியையும், இக்கட்டையும் சமமாகக் கருத வேண்டும்.

இத்தகைய மனநிலை பெறுவதற்கு நாம் நல்லதையும் தீயவற்றையும் சமமாகப் பாவிப்பதற்கு, இரக்கமான மனநிலையை ஏற்படுத்திக் கொள்ள வேண்டும். அது எப்படிச் சாத்தியப்படும் என்றால் ஆகையால் உங்கள் பிதா (இறைவன்) இரக்க முள்ளவராயிருக்கிறது போல, நீங்களும் இரக்கமுள்ளவர்களாயிருங்கள். (லுக்கா 6:36)

ஆகவே, அன்றாட வாழ்க்கையில் நமக்கு நேரிடும் அவலங்களை, நமது இறுக்கமான மனநிலையை விட்டு இரக்கமான மன நிலையில் இருந்து, இன்பத்தையும் துன்பத்தையும் சமமாகப் பாவித்து, பிறருக்கு உதவிகள் செய்து சமாதானமான வாழ்வு வாழ்வோமாக.

முகநூல்!