தேவகோட்டை அருகே வாகனத்தில் அடிபட்டு புள்ளி மான் சாவு

காரைக்குடி- தேவகோட்டை செல்லும் சாலையில் உள்ள சங்கரபதி கோட்டை பகுதியிலும், திருப்பத்தூர்-சிவகங்கை சாலையில் உள்ள மண்மலை காடு, கல்லல், நடராஜபுரம் போன்ற வனத்துறை பகுதிகளில் புள்ளி மான்கள் அதிகளவில் உள்ளது. தற்போது, போதிய மழை பெய்யாததால் கடும் வறட்சி நிலவுகிறது.

காடுகளில் வனத்துறை சார்பில் மான்களுக்கு தேவையான தண்ணீர் தொட்டிகள் மற்றும் பிற வசதிகள் செய்யப்பட்டிருந்தாலும் தற்போது மாவட்டத்தில் கொளுத்தும் கோடை வெயிலால் காடுகளில் உள்ள புல், செடிகள் கருகி விட்டன. இதன் காரணமாக பகல் மற்றும் இரவு நேரங்களில் புள்ளிமான்கள் உணவு மற்றும் தண்ணீரை தேடி காடுகளில் இருந்து ஊர்களுக்குள் வருகிறது. அப்போது, சாலைகளை கடக்கும் போது எதிர்பாராத விதமாக வாகனங்களில் அடி பட்டோ அல்லது ஊரில் உள்ள நாய்கள் கடித்து செத்து விடுகிறது.

மேலும் இரவு நேரங்களில் வெளியில் இரை தேடி விட்டு வரும் இந்த புள்ளி மான்கள் இங்கு வைக்கபட்டுள்ள தண்ணீர் தொட்டிகளை அடையாளம் தெரியாமல் வேறொரு பகுதிகளுக்கு சென்று எதிர்பாராத விதமாக நாய்களிடம் மாட்டிக்கொண்டு அதற்கு இரையாகின்றது.

நேற்று முன்தினம் இரவு திருப்பத்தூர் அருகே உள்ள மதகுபட்டி வனத்துறை காட்டில் உள்ள 5 வயது மதிக்கதக்க பெண் புள்ளி மான் ஒன்று இரை தேடி திருப்பத்தூர்- சிவகங்கை சாலையை கடக்க முயன்ற போது அந்த வழியாக வந்த பஸ்சில் அடிபட்டு இறந்தது.

தகவலறிந்த ஊர் மக்கள் திருப்பத்தூர் வனத்துறை அலு வலகத்திற்கு தகவல் கொடுத்தனர். வனச்சரகர் பழனிச்சாமி தலைமையில் வன அலுவலர் கள் சம்பவ இடத்திற்கு சென்று இறந்த புள்ளிமானை கைபற்றி திருப்பத்தூர் வனச்சரக அலுவலகத்தில் கால்நடை மருத்துவர் முன்னிலையில் பிரேத பரிசோதனை செய்து எரிக்கப்பட்டது.

அடிக்கடி இது போன்று சம்பவங்களால் பலியாகும் புள்ளி மான்களின் இனத்தை பாதுகாக்க வனத்துறை சார்பில் பாதுகாப்பு வேலி மற்றும் கோடை காலங்களில் புள்ளி மான்களுக்கு தேவையான புல் வகைகளை செய்து கொடுக்க வேண்டும் என இந்த பகுதி மக்கள் கோரிக்கை விடுத்துள்ளனர்.

மாலைமலர்

வருத்தமான செய்தி ,