ஆங்-சான்-சூகி முதல் முறையாக பாராளுமன்ற உறுப்பினர் ஆனார்

**சிவா** · **சிவா** Tue Apr 03, 2012 11:50 am

மியான்மர் இடைத்தேர்தலில் போட்டியிட்ட ஜனநாயகவாதி ஆங்-சான்-சூகி முதல் முறையாக வெற்றி பெற்று பாராளுமன்றத்துக்கு செல்கிறார். 44 தொகுதிகளில் போட்டியிட்ட அவரது கட்சி 40 இடங்களை கைப்பற்றியது.

ஜனநாயக போராளி

தற்போது மியான்மர் என்று அழைக்கப்படும் பழைய பர்மா நாட்டில் ஜனநாயகத்துக்காக குரல் எழுப்பி போராடி வருபவர் ஆங்-சான்-சூகி (வயது 66). கடந்த 1990-ம் ஆண்டு நடந்த தேர்தலில் அவரது `ஜனநாயகத்துக்கான தேசிய லீக்' கட்சி அமோக வெற்றி பெற்றது.

ஆனால், அப்போது ஆட்சி நடத்தி வந்த ராணுவ அரசாங்கம் இந்த வெற்றியை ஏற்க மறுத்து தேர்தலே செல்லாது என்று அறிவித்தது. இதைத்தொடர்ந்து நாட்டில் கிளர்ச்சி ஏற்பட்டது. ஜனநாயகவாதி ஆங்-சான்-சூகியை கைது செய்த ராணுவ ஆட்சி, அவரை வீட்டுக் காவலில் சிறையில் அடைத்தது. கடந்த 22 ஆண்டுகளாக அவர் வீட்டுச் சிறையில் இருந்தார்.

சூகி விடுதலை

அவரை விடுதலை செய்யும்படியும், ஜனநாயக முறைப்படி தேர்தல் நடத்தும்படியும் உலக நாடுகள் பலவும் மியான்மர் ராணுவ ஆட்சியை வலியுறுத்தின. செவிடன் காதில் ஊதிய சங்காக இதை ராணுவ ஆட்சி கவனத்தில் கொள்ளவில்லை.

மியான்மரில் பொது மக்களுக்கு ஜனநாயக உரிமைகளை வழங்காவிட்டால் பொருளாதார தடை விதிக்க நேரிடும் என்று மேலை நாடுகள் மிரட்டல் விடுத்ததன் காரணமாக சமீபத்தில் ஆங்-சான்-சூகி விடுதலை செய்யப்பட்டார். அவருடன் சேர்த்து ஆயிரக்கணக்கான அரசியல் கைதிகளும் விடுதலை செய்யப்பட்டனர். சிறுபான்மையினருடன் ராணுவ அரசாங்கம் பேச்சு வார்த்தை நடத்தியது. தணிக்கை முறைகளை தளர்த்தியது. தொழிற்சங்கங்களுக்கு அனுமதி அளித்தது.

தேர்தலில் போட்டி

இந்த நிலையில்தான் அங்கு காலியான 44 தொகுதிகளுக்கு இடைத்தேர்தல் அறிவிக்கப்பட்டது. இந்த 44 தொகுதிகளிலும் ஆங்-சான்-சூகி கட்சியின் வேட்பாளர்கள் போட்டியிட்டனர். கட்சி தலைவரான ஆங்-சான்-சூகியும் கவ்மூ என்ற தொகுதியில் களம் இறங்கினார்.

நேற்று முன்தினம் ஓட்டுப்பதிவு நடந்தது. போட்டியிட்ட 44 தொகுதிகளில் 40 தொகுதிகளில் அவரது கட்சி அமோக வெற்றி பெற்று, கைப்பற்றியதாக அவரது கட்சி அறிவித்தது.

ஆங்-சான்-சூகி வெற்றி

ஆங்-சான்-சூகியும் அவரது தொகுதியில் பெருவாரியான ஓட்டு வித்தியாசத்தில் வெற்றி பெற்றதாக அவரது கட்சி அறிவித்தது.

ஆனால், தேர்தல் கமிஷன் சார்பான அதிகாரபூர்வ அறிவிப்பு வெளியாக இன்னும் சில தினங்கள் ஆகும் என்று அறிவிக்கப்பட்டு உள்ளது.

முதல் முறையாக எம்.பி.

ஆனாலும் ஆங்-சான்-சூகியின் வெற்றியையோ அவரது கட்சியினரின் வெற்றியையோ தேர்தல் கமிஷனின் முடிவுகள் பாதிக்காது என்று தெரிகிறது. இந்த வெற்றியின் மூலம் ஆங்-சான்-சூகி முதல் முறையாக பாராளுமன்றம் செல்கிறார்.

மியான்மர் நாட்டின் எதிர்க்கட்சி தலைவராக தற்போது விளங்கும் சூகியின் கட்சி தலைமை அலுவலகத்தில் அவரது தொண்டர்கள் தினமும் பல்லாயிரக் கணக்கில் திரண்டு சூகிக்கு வாழ்த்து சொல்லி வருகின்றனர். நேற்றும் அங்கு தொண்டர்களின் கூட்டம் அலைமோதியது. அப்போது அங்கு திரண்டு இருந்த தொண்டர்கள் மத்தியில் சூகி பேசுகையில் கூறியதாவது:-

மக்களுக்கு கிடைத்த வெற்றி

``இந்த வெற்றி மக்களுக்கு கிடைத்த வெற்றி. ஏனென்றால் அவர்கள்தான் நாட்டின் அரசியலில் பங்கேற்று ஜனநாயக கடமை ஆற்ற வேண்டும் என்று முடிவு செய்தார்கள். இந்த வெற்றியை கொண்டாடுவது இயல்பானதுதான். அதே சமயம், வெற்றி கொண்டாட்டத்தில் நமது செயல்பாடுகளோ, பேச்சுகளோ மற்ற கட்சியினரை புண்படுத்தும் விதத்தில் அமைந்து விடக்கூடாது என்பதில் எச்சரிக்கையாக இருங்கள். நிதான முறையில், கண்ணியத்தோடு வெற்றியை கொண்டாடுங்கள்.

இந்த வெற்றி மியான்மர் நாட்டில் புதிய சகாப்தத்தை கொண்டு வரும் என்ற நம்பிக்கையை ஏற்படுத்தி உள்ளது. இந்த தேர்தலில் நம்மோடு போட்டியிட்ட மற்ற கட்சியினரும் மியான்மரில் உண்மையான ஜனநாயகம் திளைக்க நம்மோடு ஒத்துழைக்க முன்வருவார்கள் என்றும் நம்புகிறேன்.''

இவ்வாறு அவர் பேசினார். அப்போது அங்கு கூடியிருந்த தொண்டர்கள் சூகி வாழ்க என்று கோஷம் போட்டதுடன், வெற்றியை குறிக்கும் வகையில் `வி' என்ற ஆங்கில எழுத்தை தங்களது விரல்களில் காட்டினார்கள்.

தினதந்தி

**ரா.ரா3275** · **ரா.ரா3275** Tue Apr 03, 2012 11:54 am

மனோதிடம் வென்றது...மனித நேயம் வென்றது...மக்களாட்சித் தத்துவம் வென்றது...
பகிர்விற்கு நன்றி சிவா...

யினியவன் · யினியவன் Tue Apr 03, 2012 11:54 am

வாழ்த்துகள் இந்த சோதனைகள் வென்று சாதனை படைத்த பெண்ணிற்கு.

நம்ம அம்மா, மம்தா, மாயாவதி இவங்கள எல்லாம் இந்த அம்மாட்ட அனுப்பி அமைதியா, ஆர்பாட்டம், அடாவடி இதெல்லாம் பண்ணாம மக்கள் மனசுல எப்படி இடம் புடிக்கறதுன்னு கத்துக்க அனுப்பனும்.

நம்மாளுங்க அந்தம்மா கெடுத்து புடுவாங்களோ?

பாலாஜி · பாலாஜி Tue Apr 03, 2012 11:56 am

வாழ்த்துக்கள் , மியான்மார் மொழியிலும் வாழ்த்துக்கள் .. மகிழ்ச்சி

**பிரசன்னா** · **பிரசன்னா** Tue Apr 03, 2012 12:04 pm

ஆங்-சான்-சூகி முதல் முறையாக பாராளுமன்ற உறுப்பினர் ஆனார் Angsung

யாங்கூன், ஏப்.2: மியான்மரில் 45 நாடாளுமன்ற தொகுதிகளுக்கு நடைபெற்ற இடைத்தேர்தலில் 40 தொகுதிகளுக்கான முடிவு திங்கள்கிழமை அறிவிக்கப்பட்டது. இதில் 40 தொகுதிகளையும் ஆங் சான் சூச்சியின் தேசிய ஜனநாயக லீக் கட்சி கைப்பற்றி அமோக வெற்றி பெற்றுள்ளது.
இன்னும் 5 தொகுதிகளுக்கான முடிவு அறிவிக்கப்படவில்லை என்று அந்நாட்டு அரசு ஊடகம் தெரிவித்துள்ளது.
இத்தேர்தலில் போட்டியிட்ட 15 ஆண்டுகாலமாக வீட்டுக் காவலில் இருந்த ஆங் சான் சூச்சி வெற்றி பெற்றுள்ளார். ஊரகப் பகுதிகளை உள்ளடக்கிய காவ்மூ தொகுதியில் அவர் போட்டியிட்டார்.
தேர்தல் முடிவுகள் ஆங் சான் சூச்சி கட்சிக்கு சாதகமாக அமைந்துள்ளதால் மியான்மர் மீது மேற்கத்திய நாடுகள் விதித்துள்ள பொருளாதாரத் தடை நீங்கும் என்று அரசியல் நோக்கர்கள் தெரிவித்துள்ளனர். இத் தேர்தல் முடிவு மூலம் மியான்மரில் பெரிய அளவிலான அரசியல் மாற்றம் நிகழும் என்றும் அவர்கள் கூறியுள்ளனர்.
மகிழ்ச்சி கொண்டாட்டம்: தேர்தல் வெற்றி ஆங் சான் சூச்சி கட்சியினருக்கு பெருத்த மகிழ்ச்சியை அளித்துள்ளது. அவர்கள் வெற்றியை கோலாகலமாகக் கொண்டாடி வருகின்றனர்.
தேர்தல் முடிவு வெளியானவுடன் யாங்கூனில் உள்ள கட்சித் தலைமையகத்தில் ஆங் சான் சூச்சி செய்தியாளர்களுக்குப் பேட்டியளித்தார். அப்போது அவர் கூறியது: இத்தேர்தல் வெற்றி எங்களுக்குக் கிடைத்ததல்ல; மியான்மர் மக்களுக்கு கிடைத்தது. நாட்டின் அரசியல் நடவடிக்கையில் தாங்களும் பங்கேற்க வேண்டும் என்று மக்கள் விரும்பினர். இதனால் அவர்கள் இப்படியொரு தேர்தல் முடிவை அளித்துள்ளனர்.
இத்தேர்தல் முடிவு மூலம் மியான்மரில் புதிய சகாப்தம் தொடங்கும் என்ற நம்பிக்கை உள்ளது. நாட்டில் ஜனநாயக ரீதியான அரசு அமைய தேர்தலில் போட்டியிட்ட அனைத்துக் கட்சிகளும் ஒத்துழைப்பு அளிக்கும் என்றும் கருதுகிறேன் என்றார்.
45 தொகுதிகளுக்கான இடைத்தேர்தல் ஞாயிற்றுக்கிழமை நடைபெற்றது. இதுகுறித்து தேர்தலுக்கு முந்தைய தினமான சனிக்கிழமை பேட்டியளித்த ஆங் சான் சூச்சி, இடைத்தேர்தல் நேர்மையாக நடக்க வாய்ப்பில்லை. ஆளுங்கட்சி முறைகேட்டில் ஈடுபட திட்டமிட்டுள்ளது என்று குற்றம்சுமத்தியிருந்தார் என்பது குறிப்பிடத்தக்கது.
மியான்மரின் யாங்கூன் நகரில் உள்ள ஜனநாயகத்துக்கான தேசிய லீக் கட்சியின் தலைமையகத்தில்
கூடியிருக்கும் ஆதரவாளர்களை நோக்கி காரில் இருந்தபடியே புன்னகை புரிகிறார் ஆங் சான் சூச்சி.

தினமணி

பது · பது Tue Apr 03, 2012 12:05 pm

பாலாஜி · பாலாஜி Tue Apr 03, 2012 12:10 pm

ஏற்கனவே பதிவில் இருப்பதால் இணைத்துவிட்டேன் பிரசன்னா ...

**ராஜா** · **ராஜா** Tue Apr 03, 2012 12:12 pm

வை.பாலாஜி wrote:ஏற்கனவே பதிவில் இருப்பதால் இணைத்துவிட்டேன் பிரசன்னா ...

தல என்ன இன்னிக்கு இவ்வளவு தெளிவா இருக்கீங்க சூப்பருங்க

பாலாஜி · பாலாஜி Tue Apr 03, 2012 12:13 pm

ராஜா wrote:
வை.பாலாஜி wrote:ஏற்கனவே பதிவில் இருப்பதால் இணைத்துவிட்டேன் பிரசன்னா ...
தல என்ன இன்னிக்கு இவ்வளவு தெளிவா இருக்கீங்க

வெள்ளி கிழமைக்கு இன்னும் நாள் இருக்கு தல

**பிரசன்னா** · **பிரசன்னா** Tue Apr 03, 2012 12:41 pm

வை.பாலாஜி wrote:
ராஜா wrote:
வை.பாலாஜி wrote:ஏற்கனவே பதிவில் இருப்பதால் இணைத்துவிட்டேன் பிரசன்னா ...
தல என்ன இன்னிக்கு இவ்வளவு தெளிவா இருக்கீங்க
வெள்ளி கிழமைக்கு இன்னும் நாள் இருக்கு தல

இணைந்ததில் மகிழ்ச்சி.... அது என்ன வெள்ளிக்கிழமை.... சிரி