திருமணமாகி 2 மாதத்தில் கழுத்தை கயிற்றால் இறுக்கி புதுப்பெண் கொலை

by **சிவா** Mon Apr 02, 2012 12:59 pm

First topic message reminder :

மதுரையில் திருமணமாகி 2 மாதத்தில் புதுப்பெண் கழுத்தை கயிற்றால் இறுக்கி கொன்று சேலையில் தூக்குப்போட்டு கணவனும் தற்கொலை செய்து கொண்டார்.

பூட்டிய வீட்டுக்குள் பிணம்

இந்த பயங்கர சம்பவம் பற்றி கூறப்படுவதாவது:-

மதுரை மேல அனுப்பானடி காமாட்சி அம்மன் குறுக்குத்தெருவைச் சேர்ந்தவர் செல்லமுருகன். இவரதுமகன் செந்தில்குமார் (வயது27). தச்சுத்தொழிலாளியாக வேலைபார்த்து வந்தார். இவருக்கும் ஜெய்ந்த்புரத்தை சேர்ந்த கன்னிகா (25) என்பவருக்கும் கடந்த 6.2.2012 அன்று திருமணம் நடந்தது. திருமணமாகி சுமார் 2 மாதமே ஆகிறது. இவர்கள் இருவரும் மேல அனுப்பானடியில் உள்ள ஒரு வீட்டில் வசித்து வந்தனர்.

நேற்று காலை வெகுநேரமாகியும் இவர்களது வீட்டுக்கதவு திறக்கப்படவில்லை. இதனால் சந்தேகம் அடைந்து அக்கம்பக்கம் இருந்தவர்கள் ஜன்னல் வழியாக பார்த்த போது வீட்டுக்குள் செந்தில்குமார் தூக்கில் பிணமாக தொங்கியது தெரியவந்தது. கன்னிகாவும் வீட்டுக்குள் பிணமாக கிடந்தார்.

கொலை-தற்கொலை

இதுபற்றிய தகவல் கிடைத்ததும் தெப்பக்குளம் போலீசார் சம்பவ இடத்துக்கு விரைந்து வந்து வீட்டுக்கதவை திறந்து பார்த்தனர். அங்கே கயிற்றால் கழுத்து இறுக்கப்பட்டு கன்னிகா படுகொலை செய்யப்பட்டு பிணமாக கிடந்தார். செந்தில்குமார் சேலையால் தூக்குபோட்டு பிணமாக தொங்கிக் கொண்டிருந்தார்.

குடும்ப வாழ்க்கையில் வெறுப்படைந்த செந்தில்குமார் மனதை கல்லாக்கி கொண்டு மனைவியை கொலை செய்து விட்டு தானும் தற்கொலை செய்து கொண்டதாக தெரிகிறது. போலீசார் செந்தில்குமாரின் வீட்டில் இருந்த ஒரு டைரியை கைப்பற்றினார்கள்.

கடிதம்

அந்த டைரியில் செந்தில்குமார் கடிதம் ஒன்றை எழுதியுள்ளார். அதில் `என் மனைவியை என்னிடமிருந்து மாமியார் பிரிக்கப்பார்க்கிறார். நான் மேலே செல்கிறேன். என்மனைவியையும் மேலே அழைத்துச் செல்கிறேன். எங்கள் சாவுக்கு யாரும் காரணமல்ல. மாமியாரையோ எனது வீட்டாரையோ எந்த தொந்தரவும் செய்யக் கூடாது. இந்த சாவுக்கு நாங்களே காரணம்' என்று எழுதப்பட்டிருந்தது. செந்தில்குமார் கன்னிகா ஆகிய இருவரின் உடல்களையும் போலீசார் கைப்பற்றி பிரேத பரிசோதனைக்காக மதுரை பெரிய ஆஸ்பத்திரிக்கு அனுப்பி வைத்தனர்.

தொடர்ந்து இதுகுறித்து போலீசார் விசாரித்து வருகிறார்கள்.

தினதந்தி