எம்.பி.,க்களை தரக்குறைவாகபேசும் கெஜ்ரிவால் -நோட்டீஸ் அனுப்பினார் மத்திய அமைச்சர்

புதுடில்லி: எம்.பி.,க்களை தரக்குறைவாக பேசுவதுடன் தன்மீதும் அவதூறு பரப்பியதாக கெஜ்ரிவாலுக்கு மத்திய அமைச்சர் விர்பத்ராசிங் நோட்டீஸ் அனுப்பியுள்ளார். இவர் இதற்கு ஒரு வார காலத்தில் விளக்கம் அளிக்க வேண்டும் என்றும் நோட்டீசில் கேட்கப்பட்டுள்ளது.

அன்னா ஹசாரே குழுவில் இடம்பெற்றுள்ள அரவிந்த் கெஜ்ரிவால், சமீபகாலமாக எம்.பி.,க்களை மிக தரக்குறைவாக விமர்சித்து வருகிறார், சமீபத்திய பேட்டியில் அவர் பார்லி., குற்றவாளிகளின் கூடாரமாக இருக்கிறது. எம்,பிக்கள் பலர் கிரிமினல்களாக உள்ளனர், 162 எம்.பி.,க்கள் மீது 522 வழக்குகள் கோர்ட்டில் நிலுவையில் உள்ளன. இதில் 76 வழக்குகள் மிக கொடூரமானது.

2004 ல் 128 எம்.பி,.க்கள் கிரிமினல்களாக இருந்தனர். இது கணிசமாக உயர்ந்து 2009 ல் 162 ஆனது. 2009 ல் காங்கிரஸ் 176 கிரிமினல்களுக்கு தேர்தலில் நிற்க சீட் கொடுத்தது. இதில் 44 பேர் தேர்வு செய்யப்பட்டு விட்டனர். பா.ஜ., 116 பேருக்கு கொடுத்தது. இதிலும் 44 பேர் தேர்வு செய்யப்பட்டு விட்டனர். இதனால் இது போன்ற கிரிமினல்கள் அடங்கிய இந்த பார்லியை., நான் மதிக்க முடியாது. இவ்வாறு அளித்த பேட்டி பார்லி.,யில் எம்.பி.,க்கள் எழுப்பினர். அவர் மீது நடவடிக்கை எடுத்த வலியுறுத்தப்பட்டது.

இந்நிலையில் சிறு மற்றும் குறுந்தொழில் துறை இணை அமைச்சர் விர்பத்ரசிங்நோட்டீஸ் அனுப்பியுள்ளார். இதில் கெஜ்ரிவால் வெளியிட்ட அமைச்சர்கள் சிலர் மீது வழக்குகள் இருப்பதாக கூறி எனது பெயரையும் அதில் சேர்த்துள்ளார். ஆனால் இது போன்று என்மீது எவ்வித குற்றச்சாட்டும் இல்லை . இவர் என்னை பற்றி அவதூறாக கூறியிருக்கிறார். இதனால் அவர் இதற்கு ஒரு வாரகாலத்தில் எனக்கு விளக்கம் அளிப்பதுடன் நிபந்தனையற்ற மன்னிப்பும் கேட்க வேண்டும் என்றும் நோட்டீசில் கூறியுள்ளார். இமாச்சல பிரதேசத்தில் நான் முதல்வராக இருந்த காலத்தில் கூட பா.ஜ.,வை தவிர யாரும் என்னை குறை கூறியதில்லை என்றும் கூறியுள்ளார்.

தினமலர்