டுவென்டி20 உலக கோப்பை டிக்கெட் விலை ரூ.13 - நேற்று முதல் விற்பனை துவக்கம்

by மகா பிரபு Sat Mar 31, 2012 9:00 pm

இலங்கையில் இந்த ஆண்டு நடைபெற உள்ள டுவென்டி20 உலக கோப்பை கிரிக்கெட் போட்டிக்கான டிக்கெட்களுக்கான குறைந்தபட்ச விலை ரூ.13 ஆக நிர்ணயிக்கப்பட்டுள்ளது. மைதானத்திற்கு வந்து போட்டிகளை பார்க்கும் ரசிகர்களை கவரும் வகையில், டிக்கெட்களின் விலை இப்படி அதிரடியாக குறைக்கப்பட்டுள்ளது.

இலங்கையில் வரும் செப்டம்பர் 18ம் தேதி முதல் டுவென்டி20 உலக கோப்பை கிரிக்கெட் தொடர் துவங்க உள்ளது. இதில் இந்தியா, இலங்கை, பாகிஸ்தான், ஆஸ்திரேலியா, தென் ஆப்பிரிக்கா உட்பட 12 அணிகள் பங்கேற்க உள்ளன. இப்போட்டிகளுக்கான டிக்கெட் விற்பனை நேற்று காலை 9 மணி முதல் துவங்கியது.

சமீபத்தில் இலங்கையில் நடைபெற்ற டெஸ்ட் போட்டிகளுக்கான டிக்கெட்கள் அதிக விலையில் விற்கப்பட்டதால், மைதானத்திற்கு வந்து போட்டிகளை பார்க்கும் ரசிகர்களின் எண்ணிக்கை கணிசமாக குறைந்தது.

இதனால் செப்டம்பர் மாதம் துவங்க உள்ள டுவென்டி20 உலக கோப்பை போட்டிக்கான டிக்கெட் விலை கடுமையாக குறைக்கப்பட்டுள்ளது. இதன்படி லீக் சுற்றுகளுக்கான போட்டிகளுக்கான டிக்கெட் விலை ரூ.13ல் இருந்து துவங்குகிறது. லீக் சுற்று போட்டிகளுக்கான 6 டிக்கெட்கள் வரை ஒரு நபர் வாங்கலாம்.

அதேபோல அரையிறுதிப் போட்டிகள் மற்றும் இறுதிப் போட்டிக்கான டிக்கெட்களின் விலை ரூ.127ல் இருந்து துவங்குகிறது. இறுதிப் போட்டிகளுக்கான டிக்கெட்களின் அதிகபட்ச விலை ரூ.2,289. சூப்பர்-8, அரையிறுதி, இறுதிப் போட்டிகளுக்கான 4 டிக்கெட்கள் வரை ஒரு நபருக்கு வாங்கி கொள்ளலாம். போட்டிகளுக்கான டிக்கெட்களை www.icc-cricket.com என்ற இணையதளம் மூலம் பெறலாம்.

தட்ஸ் தமிழ்