வேலைக்கார சிறுமியை வீட்டில் வைத்து பூட்டிவிட்டு வெளிநாடு சென்றுள்ள டாக்டர் தம்பதி

புதுடில்லி:வேலைக்கார சிறுமிக்கு போதிய உணவு கொடுக்காமல், கடுமையாக வேலை வாங்கி கொடுமைப்படுத்தியதோடு, அவளை வீட்டில் வைத்து பூட்டிவிட்டு, வெளிநாடு சென்ற டாக்டர் தம்பதியர் மீது வழக்கு பதியப்பட்டுள்ளது. வீட்டில் அடைபட்டு கிடந்த சிறுமியை, தீயணைப்பு படையினர் உதவியுடன் போலீசார் மீட்டனர்.

டில்லி துவாரகா பகுதியில், அடுக்குமாடி குடியிருப்பில் வசிப்பவர்கள் அனிதா-சுரேஷ் (பெயர்கள் மாற்றப்பட்டுள்ளன). டாக்டர்களான இவர்களின் வீட்டில், 13 வயது சிறுமி வேலை செய்து வருகிறாள். விடுமுறையை கழிப்பதற்காக, தன் மகளுடன் ஆறு நாள் பாங்காக் பயணம் மேற்கொண்டுள்ள டாக்டர் தம்பதியர், செல்லும் முன், வேலைக்கார சிறுமியை வீட்டிலேயே வைத்து பூட்டிவிட்டுச் சென்றனர்.இந்நிலையில், வேலைக்கார சிறுமி நேற்று முன்தினம் மாலை, வீட்டின் பால்கனியில் இருந்து தன்னை காப்பாற்றும்படி கூறி, அழுது சத்தமிட்டதை, பக்கத்து வீடுகளில் வசிப்பவர்கள் பார்த்து, போலீசுக்கு தகவல் கொடுத்தனர். போலீசார் தீயணைப்பு துறையினரை அழைத்து, அவர்களின் உதவியுடன் சிறுமியை மீட்டு, பத்திரமாக கீழே கொண்டு வந்தனர்.

மீட்கப்பட்ட சிறுமி கூறுகையில், ""இதுபோல் நடப்பது இது முதல் முறையல்ல. பல முறை என்னை தனியே வீட்டில் போட்டு பூட்டிவிட்டு, அவர்கள் சென்று விடுவர். இதில், முதல் மூன்று நாட்களுக்கு மட்டுமே உணவு வைக்கப்பட்டிருக்கும். அதன்பின் வரும் நாட்களுக்கு சாப்பிட எதுவும் இருக்காது. வீட்டில் ரகசிய கேமராக்கள் பொருத்தப்பட்டுள்ளன. அவர்கள் வெளியே சென்று விட்டு திரும்பியதும், அந்த கேமராக்களில் பதிவானவற்றை பார்த்துவிட்டு, நான் தவறேதும் செய்திருந்தாலோ, எதையாவது எடுத்து சாப்பிட்டிருந்தாலோ, என்னை அடித்து சித்ரவதை செய்வர். எனது விரல்களுக்கு இடையே பேனாவால் குத்துவர். தலைமுடியை வெட்டி அவமானப்படுத்துவர்'' என்றாள்.

இந்த சிறுமி, ஜார்க்கண்ட் மாநிலத்தில் இருந்து வேலை வாய்ப்பு ஏஜன்சி மூலம், டாக்டர் தம்பதியிடம் வேலைக்கு கொண்டு சேர்க்கப்பட்டவள் என்பதும், சிறுமியின் உடலில் காயங்கள் இருப்பதும், அந்த சிறுமிக்கு இதுவரை சம்பளம் எதுவும் கொடுக்கப்படவில்லை என்பதும், போலீசார் விசாரணையில் தெரிய வந்தது.

சிறுமி குறித்து, அடுக்குமாடி குடியிருப்பின் செயலர் ஆர்.சி.யாதவ் கூறுகையில், ""இந்த சிறுமி இரு தினங்களாக, பால்கனிக்கு வந்து உதவி கோரி அலறியுள்ளாள். நேற்று தான் பக்கத்து வீட்டில் குடியிருப்பவர்கள் போலீஸ் உதவியை நாடலாம் என, முடிவு செய்தனர்'' என்றார்.

டாக்டர் தம்பதியர், தற்போதும் பாங்காக்கில் உள்ளனர். இந்நிலையில், பாதிக்கப்பட்ட சிறுமியை, போலீசார் மாஜிஸ்திரேட் முன் ஆஜர்படுத்தினர். சிறுமியின் வாக்குமூலத்தை மாஜிஸ்திரேட் பதிவு செய்துகொண்டார். இதுகுறித்து, வழக்கு பதிவு செய்யப்பட்டுள்ளது.

தினமலர்

அடகொடுமையே

இவங்க பொண்ண யாராவது இப்படி பண்ணுனா இவங்க அத எதுக்குவங்களா?
படிச்சதுங்களும் இப்டி தான் இருக்குங்க....
என்ன தண்டனை குடுக்கலாம்....

பணம் பந்தியிலே குணம் குப்பையிலே என்று சொல்வது சரியாக பொருந்துகிறது..!

மனதுக்குள் இருக்கும் வக்கிரத்தைக் காண்பிக்க அடுத்த வீட்டு பெண் தானா கிடைத்தாள் இவர்களுக்கு

படித்த மக்கள் இப்படி ஒரு வேலையே செய்வது கொடுமையான ஒரு செயல்.

சே இவங்க எல்லாம் படித்த மிருகங்கள்.
இவர்கள் அந்த சிறுமிக்கு செய்த கொடுமைகளையே திரும்ப இவர்களுக்கு தண்டனையாக தர வேண்டும்

மனசாட்சி இல்லாத ஜென்மங்கள்.............