புதியதோர் பாதையில் புறப்படு சோதரா...!

றினா · றினா Sun Apr 01, 2012 7:10 pm

புதியதோர் பாதையில் புறப்படு சோதரா...!

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

அச்சமும் அவலமும் எமை விட்டு நீங்க

அமைதி எம் மண்ணிலே நிலை பெற்று ஓங்க

நச்சவரங்களோ எமை விட்டு நீங்க

நல்லாட்சி மண்ணிலே நிலை பெற்று ஓங்க

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

அரசியல் பண்பாடு எம்மண்ணில் ஓங்க

அதிகார வெறி இந்த மண்விட்டு நீங்க

உரிமைகள் பெற்றிந்த சமுதாயம் ஓங்க

ஊழல் மோசடிகளோ மண்விட்டு நீங்க

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

சூறாவின் அடிப்படை எம் மண்ணில் ஓங்க

தொண்டர்களாகவே தலைவர்கள் பூக்க

வீறாப்பு மட்டுமே பேசுவோர் நீங்க

விடியலின் பாதையில் செல்பவர் ஓங்க

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

கூட்டுத் தலைமையால் விடிவிங்கு தோன்ற

கொள்கைப் பிடிப்புடன் வாழ்பவர் ஓங்க

நாட்டிலெம் சமுதாயம் தலை நிமிர்ந்தோங்க

நற்பணி புரிந்திடும் எம்மவர் ஓங்க

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

வன்முறைக் கலாசாரம் எமை விட்டு நிங்க

மனிதாபிமானமோ நெஞ்சினில் ஓங்க

நின்று நிலைக்கின்ற பண்பாடு தோன்ற

நீதியாய் அரசியல் செய்பவர் ஒங்க

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

சமாதான சக வாழ்வு நிலை பெற்று வாழ

தரமான வாழ்க்கையால் எம் மக்கள் ஒங்க

அமானிதம் பேணுவோர் பதவியைத் தாங்க

அனைவரும் ஒன்றிணைந்திம் மண்ணைக் காக்கும்

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

எது கொண்டு வந்தாலும் ஒற்றுமையே சின்னம்

துடிப்போடு பணியாற்றும் எம்மவர் சின்னம்

அப்பாவி மக்களின் விடியலின் சின்னம்

அனைவரும் கை கோர்த்துத் தூக்கிடும் சின்னம்

புதியதோர் பாதையில் புறப்படு சோதரா!

புத்துயிர் பெற்றிந்த மண் வாழ வேண்டும்!!

**********

தடை எங்கு கண்டாலும் படையங்கு தாண்டும்

குடை சாய்ந்த சிலர் கொள்கை விடை பெற்று நீங்கும்

மடைவீங்கு வெள்ளமாய் நடையங்கு காண்போம்

மலரட்டும் நல்லாட்சி புலரட்டும் பொழுது

புதியதோர் பாதையில் பறரப்படு சோதரா!

புத்துயிர் பெற்றிந்த மண் வாழ வேண்டும்!!

**********