பட்ஜெட்டில் புதிய வரி விதிப்பு எதிரொலி எண்ணெய் விலை உடனடியாக உயர்ந்தது

சென்னை : புதிய வரிவிதிப்பு எதிரொலியாக, ஆயில் விலை உடனடியாக உயர்ந்துள்ளது. சமையல் எண்ணெய் விலை கிலோவுக்கு ரூ.5 வரை அதிகரித்துள்ளது. விற்பனைக்கு 5 சதவீத மதிப்பு கூட்டுவரி விதிக்கப்படுவதற்கு முன்னர் பாமாயில்(1 கிலோ) ரூ.62க்கு விற்றது. தற்போது, ரூ.3 உயர்ந்து ரூ.65 ஆக உயர்ந்துள்ளது. இதே போல, சன்பிளவர் ஆயில் ரூ.72லிருந்து ரூ.75ஆகவும், ரிபைன்ட் கடலை எண்ணெய் ரூ.110லிருந்து ரூ.113க்கும், அக்மார்க் நல்லெண்ணெய் ரூ.135லிருந்து ரூ.140 ஆகவும் உயர்ந்துள்ளது.

அதே போல், சாதா நல்லெண்ணெய் ரூ.80லிருந்து ரூ.85 ஆகவும், தேங்காய் எண்ணெய் ரூ.125லிருந்து ரூ.130ஆகவும், சாதா தேங்காய் எண்ணெய் ரூ.100லிருந்து ரூ.105 ஆகவும், வனஸ்பதி ரூ.63லிருந்து ரூ.72க்கும் உயர்ந்துள்ளது. ஏற்கனவே, அத்தியாவசிய பொருட்களின் விலை விண்ணை மூட்டும் அளவுக்கு உயர்ந்துள்ளது. இந்த நிலையில், எண்ணெய் விலை உயர்ந்துள்ளது நடுத்தரவாசிகளுக்கு மேலும் ஒரு பெரிய சுமையை ஏற்படுத்தியுள்ளது.

இனி வரும் காலங்களில் சமையலுக்கு எண்ணெய் பயன்படுத்த முடியாத நிலை ஒவ்வொரு குடும்ப பெண்களுக்கும் ஏற்பட்டுள்ளது. எனவே, மதிப்பு கூட்டுவரியை மறுபரிசீலனை செய்ய வேண்டும் என்று இல்லத்தரசிகள் கோரிக்கை விடுத்துள்ளனர். இது குறித்து தமிழ்நாடு மளிகை வியாபாரிகள் சங்க தலைவர் எஸ்.பி.சொரூபன் கூறுகையில், பெரிய அளவில் தொழில் செய்து வருபவர்கள் பல பெயர்களில் லைசென்ஸ் எடுத்து வைத்துள்ளனர்.

இந்த அறிவிப்பால் அரசுக்கு வரி இழப்பு தான் ஏற்படும். மேலும், கணக்கை சரிபார்க்க ஒவ்வொரு சிறு வணிகர்களும் தனியாக ரூ.10 ஆயிரம் சம்பளத்தில் ஆட்களை நியமிக்க வேண்டிய கட்டாயத்துக்கு தள்ளப்பட்டுள்ளனர். சிறு வணிகர்கள் இவ்வளவு சம்பளத்தில் பணியாளர்களை நியமிப்பது என்பது முடியாத காரியம். எனவே, மதிப்பு கூட்டுவரியை நீக்க வேண்டும் என்றார்.

கோதுமை, ரவை விலை குறைந்தது

கோதுமை மீது தற்போது விதிக்கப்படும் 2 சதவீத மதிப்புக் கூட்டு வரி முற்றிலும் விலக்கிக் கொள்ளப்படும் ஓட்ஸ் மீது விதிக்கப்படும் 5 சதவீத மதிப்புக் கூட்டு வரி முற்றிலும் விலக்கிக் கொள்ளப்படும் என்று பட்ஜெட்டில் அறிவிக்கப்பட்டுள்ளது. இதனால், கோதுமை, மைதா, ரவை போன்றவற்றின் விலை உடனடியாக குறைந்துள்ளது. அதாவது, கிலோவுக்கு ரூ.2 முதல் ரூ.3 வரை குறைந்துள்ளது. இது நடுத்தர மக்களை மகிழ்ச்சியில் ஆழ்த்தியுள்ளது.