இலங்கை அரசுக்கு ஐ.நா. சபை கடும் எச்சரிக்கை

**சிவா** · **சிவா** Sun Mar 25, 2012 8:50 am

கொழும்பில் இருந்து வந்திருந்த மனித உரிமைகள் குழுவினரை மிரட்டிய இலங்கை அரசுக்கு ஐ.நா. சபை மனித உரிமைகள் கவுன்சில் செயலாளர் நவி பிள்ளை கடும் எச்சரிக்கை விடுத்தார்.

நவி பிள்ளை சார்பில் அவருடைய செய்தி தொடர்பாளர் ரூபர்ட் கோல்வில், பி.பி.சி. செய்தி நிறுவனத்துக்கு அளித்த பேட்டியின்போது இந்த எச்சரிக்கையை விடுத்தார். பேட்டியின்போது அவர் மேலும் கூறியதாவது:-

வரலாறு காணாத மிரட்டல்...

"இலங்கைக்கு எதிரான தீர்மானம் தொடர்பாக ஐ.நா. சபையின் மனித உரிமை பேரவையின் கூட்டத்தில் கலந்து கொண்ட கொழும்பு மனித உரிமைகள் செயல்பாட்டாளர்கள் மிரட்டப்பட்டது போன்ற ஒரு சம்பவத்தை சமீபத்திய வரலாற்றில் நாங்கள் கண்டது இல்லை. அந்த அளவுக்கு, 71 பேர் கொண்ட இலங்கை அரசாங்க பிரதிநிதிகளால் அவர்களுக்கு அச்சுறுத்தல்கள் வந்தன.

இதைவிட மிகவும் சங்கடமான விஷயம் என்னவென்றால், இலங்கைக்குள்ளேயே அவர்களுக்கு எதிராக நடத்தப்பட்டுவரும் அவதூறு பிரசாரம்தான். சில தொலைக்காட்சி செய்தி நிகழ்ச்சியின் வாசகங்களை நான் படித்துப் பார்த்தேன். அவை அதிர்ச்சி அளிப்பதாக இருந்தன.

மனித உரிமைகள் ஆர்வலர்கள் பாக்கியசோதி சரவண முத்து, நிமல்கா பெர்னாண்டோ ஆகியோரைப் பற்றி இலங்கை மந்திரி மெர்வின் சில்வா குறிப்பிட்ட கருத்துகள், ஏற்கனவே வெளிவந்த மோசமான-அருவருக்கத்தக்க கட்டுரைகளின் தொடர்ச்சியாகவே தெரிகிறது.

கண்காணித்து வருகிறோம்

செய்தியாளர்கள் என்று சொல்லிக்கொள்ளும் சிலர், மனித உரிமை ஆர்வலர்களின் வீடுகளை கொளுத்த வேண்டும் என்றும், சிலர் அவர்கள் கொல்லப்பட வேண்டும் என்று கூட நேரடியாகவே கூறுகிறார்கள். இந்த புகார்களை ஐ.நா. மனித உரிமை பேரவை கண்காணித்து வருகிறது. தங்கள் கவலைகள் குறித்து இலங்கை அரசுக்கு தெரிவிக்கப்பட்டு உள்ளது.''

இவ்வாறு அவர் கூறினார்.

இந்தியாவுக்கு ராஜபக்சே எச்சரிக்கை

இதற்கிடையில், ஐ.நா. தீர்மானத்தை ஆதரித்த இந்தியாவுக்கு இலங்கை அதிபர் ராஜபக்சே எச்சரிக்கை விடுத்து இருக்கிறார். இலங்கையில் நடைபெற்ற விழா ஒன்றில் கலந்து கொண்டு பேசிய அவர், ஜெனீவா மனித உரிமை கூட்டத்தொடரில் இலங்கை எதிர்கொண்ட தோல்வி குறித்து விடுதலைப்புலிகளின் ஆதரவாளர்கள் மகிழ்ச்சி அடைவதாகவும், ஆனால் எந்த சூழ்நிலையிலும் பயங்கரவாத அச்சுறுத்தல்களுக்கு அடிபணிய மாட்டோம் என்றும் குறிப்பிட்டார்.

தனது பேச்சின்போது இந்தியா உள்ளிட்ட தீர்மானத்தை ஆதரித்து வாக்களித்த நாடுகளை மறைமுகமாக குறிப்பிட்ட ராஜபக்சே, "எங்களுக்கு வாக்களிக்காத நாடுகளுக்கு ஒன்றை நினைவூட்ட விரும்புகிறேன். பயங்கரவாதிகள் அந்த நாடுகளில் மேற்கொள்ள இருக்கும் பாதிப்புகளை அவர்களும் அனுபவிக்க நேரும் என்பதை மறந்து விட வேண்டாம். இது அவர்களுக்கு பின்னர்தான் புரியும்'' என்றும் எச்சரித்தார்.

தினதந்தி

அசுரன் · அசுரன் Sun Mar 25, 2012 9:04 am

ராஜபக்ஷே 11த் அவர் எனப்படும் கடைசிகட்டத்தில் இருக்கிறதாகவே அவரது பேச்சும் செயல்களும் காட்டுகிறது.... அழிவு அருகில் தான் இருக்கிறது என்று நினைக்கிறேன்.